[1] Israelitanakax Elim chiqat mistuwayasin Sin sat wasararuw puripxäna, uka wasarasti Elim, Sinaí uka pä chiqanak taypinkiwa. Ukürkamasti Egiptot mistunipxatapax phaxsi chikatanixänwa.
[2] Uka wasaran taqpach israelitanakax Moisesampitaki, Aaronampitak tuqisipxäna.
[3] Sapxarakïnwa: —¡Tatitux Egipton jiwarayistasapän ukax walïsapänwa! Khayansti aychan phukhunak jak'aruw qunt'asïyätan, t'ant'sa sist'asiñkamaw manq'asïyätan, ukampisa, jumanakax taqinir manq'at jiwarayiriw aka wasarar irpanipxistaxa —sasa.
[4] Ukat Tatitux Moisesar säna: —Nayax alaxpachat t'ant'a jalluyanï, jaqinakax sapüruw apthapisipxani, qawqhatix uka urutak wakiski ukhamarjama. Ukhamat nayax uñjä arunakaxar jaysirïpxatapsa, jan jaysirïpxatapsa.
[5] Suxtïr urusti, sapür apthapisipxirïki ukat sipan pä ukkhamp qhipürumpitak apthapisipxani —sasa.
[6] Ukat Moisesampi, Aaronampix israelitanakar sapxäna: —Jayp'uruw yatipxäta Tatitun jumanakar Egiptot irpsunitapa,
[7] willjtarusti Tatitun jach'a kankañap uñjapxäta; jumanakan arusitanakam jupax ist'iwa. ¿Khitïpxarakta nanakasti, jumanakan nanakar k'umipxañamatakisti? —sasa.
[8] Moisesasti saskakïnwa: —Jayp'thapiruw Tatitux manq'añatak aycha churapxätam, willjtarusti walja t'ant'a churapxarakïtam, sist'asiñkamaw manq'apxäta. Jupax jumanakan arusitanakam ist'iwa, ¿kunatarak nanakatak arusipxtasti? Janiw jumanakax nanakatak arusipktati jan ukasti Tatitutakiw tuqisipxtaxa —sasa.
[9] Ukatsti Moisesax Aaronaruw sarakïna: —Israelitanakar taqinir yatiyam, Tatitun nayraqatapar jak'achasipxpan, jupax arusitanakap ist'iwa —sasa.
[10] Aaronax israelitanakamp parlaskän ukkhasti, akatjamat wasar tuqit mä qinay uñstanir uñjapxäna, Tatitun qhapaq kankañapaw mä qinay taypit uñstanïna.
[11] Tatitusti Moisesarux sänwa:
[12] —Nayax israelitanakan arusitanakap ist'twa. Jupanakamp parlam, akham sarakim: “Jayp'thapirux aycha manq'apxäta, willjtarusti sist'asiñkamaw t'ant'a manq'apxarakïta. Ukhamat jumanakax yatipxäta nayan jumanakan Tatit Diosamätaxa” —sasa.
[13] Uka jayp'pachaw khullunakax purintanisin kawkhankapkäntix uka chiqar phuqhantäna, qhipür willjtasti sullarakiw utjnuqtapkän uka thiyanakar khunjam purintäna.
[14] Sullax wañsxäna ukkhasti, wasar uraq patxan qaqawarar uñtat jisk'a muruq'unakaw uñstäna.
[15] Israelitanakasti janiw kunätapsa yatipkänti, ukat uk uñjasax maynit maynikam jiskt'asipxäna “¿Kunarak akasti?” sasa, Moisesasti jupanakar sänwa: —Akax t'ant'awa, Tatituw manq'añatak uk churapxtam.
[16] Tatitux akham sarakiwa: “Qawqhatix manq'añatak wakiski uk sapa mayni apthapisipxam, utanakaman qawqha jaqïpktatix ukhamarjama, sapa jaqitak niya pä kilo” —sasa.
[17] Israelitanakasti ukham lurapxäna. Mayninakax walja apthapisipxäna, yaqhipanakasti juk'akirak apthapisipxäna,
[18] qawqhatix satäkän ukhamarjama; walja apthapisirinakarux janiw jilt'känti, juk'a apthapisirinakarus janirakiw pist'känti, sapa mayniw qawqtix manq'añatak wakiski ukhamarjam apthapisipxäna.
[19] Ukat Moisesax jupanakar sarakïna: —Janiw khitis qhipärmanthitak kuns imañapäkiti —sasa.
[20] Ukampisa, jupanakat yaqhipanakax janiw Moisesar ist'apkänti, jan ukasti waljaniw qhipürutak jilt'ayasipxäna; ukampis uka imat t'ant'arux laq'unakaw aywintxäna, wal thujsxarakïna. Ukat Moisesax jupanakatak walpun q'apisïna.
[21] Willjtanakasti sapa mayniw qawqtix manq'añatak wakiski ukarjam apthapisïna, lupiw junt'utatayasin chullutatayxäna.
[22] Suxtïr urusti pä ukkhamp manq'añ apthapisipxäna, pusi kilo sapa jaqitaki; ukham uñjasin israelitanakan jilïrinakapax Moisesaruw yatiyanipxäna.
[23] Moisesasti jupanakar sänwa: —Tatituw ukham lurañatak arsu. Qharürux sábado uruwa, Tatitur luqtat samarañ uruwa. Kuntix phayasipxañamäki ukxa jichhür phayasipxam, kuntix qhatiyasipxañamäki uksa jichhür qhatiyasipxam; jilt'kani ukxa qharürutak imasipxam —sasa.
[24] Israelitanakasti Moisesan arunakaparjamaw kunatix jilt'katayna ukanak qhipürutak imasipxäna, janiw laq'untkänti, janirakiw thujstkänsa.
[25] Ukat Moisesax jupanakar säna: —Jichhürux sábado uruwa. Tatitur luqtat uruwa, janiw kuns pampan jikxatapkätati. Ukhamasti masür imasipkta uka t'ant'a jichhürux manq'asipxäta.
[26] Jumanakax suxta uruw manq'añ apthapisipxäta, ukampis paqallqür urunxa janiw kunas utjkxaniti, sábado urütap layku —sasa.
[27] Moisesan siskatpachasa, paqallqüri urun yaqhipanakax t'ant'a apthapisirix mistusipkakïnwa, ukampis janiw kuns jikxatapkänti.
[28] Ukat Tatitux Moisesar säna: —¿Kunapachkamas jumanakax kamachi arunakaxampiru, yatichäwinakaxampir jan ist'apkäta?
[29] Amuyapxam, naya, Tatituw samarañ uru churapxsma; ukat nayax suxtïr urunxa, payürutak manq'añ churapxsma. Ukhamasti paqallqüri urunxa, sapa mayni utapan qhiparpan, jan khitis utapat mistpati —sasa.
[30] Ukat jaqinakax paqallqüri urun samarapxäna.
[31] Apthapipkän uka t'ant'asti janq'ünwa, cilantro alin jathapar uñtata, misk'impi lurat t'ant'jam muxsarakïnwa. Israelitanakasti ukarux “maná” sasaw sutichapxäna.
[32] Uka qhipat Moisesax markar säna: —Tatitux akham siwa: “Pä kilo maná t'ant'a mä phukhur uchapxam, wawanakaman wawanakapataki, jumanakar Egiptot irpsunisin wasaran manq'ayapksma uka manq'a jupanakan uñt'apxañapataki” —sasa.
[33] Moisesasti Aaronarux sarakïnwa: —Mä phukhur pä kilo maná t'ant'a phuqhantam. Uksti Tatitun nayraqatapar ucham, wawanakan wawanakapatak imatäpan —sasa.
[34] Aaronasti kunjämtix Tatitux Moisesar siskatayna ukhamarjamaw maná t'ant'a uchat phukhu, arust'äwi arca nayraqatar imäna.
[35] Israelitanakax pusi tunka maraw maná t'ant'a manq'apxäna, jaqinakan utjantat uraqir puriñkama, Canaán uraqin qurpanakapar puriñkama.
[36] Maná t'ant'a tupt'añatakisti, israelitanakax “gomer” sat pä kiloni tupumpiw waytapxäna.