[1] Jacobump chika Egipto markar puripkäna uka wawanakapan sutinakapax akanakänwa:
[2] Rubén, Simeón, Leví, Judá,
[3] Isacar, Zabulón, Benjamín,
[4] Dan, Neftalí, Gad, Aser.
[5] Jacobun wawanakapax taqpachanix paqallq tunkanïnwa. Ukapachasti Joseax Egipto markan jikxatasxäna.
[6] Jaya maranakatsti Jacobux jiwxänwa, Joseasa, jilanakapasa, uka mita jaqinakas jiwarxapxarakïnwa.
[7] Ukampisa, israelitanakax walja wawanakanïnwa, jupanakat saraqirinakasti walpun mirantäna, wali ch'aman markaruw tukurakïna. Egipto markansti taqi chiqanakan israelitanakax utjxäna.
[8] Ukat qhipa maranakatsti, Egipto markan yaqha reyiw utt'asxäna, jupasti janiw Josearux uñt'kataynati, uka reyisti markaparux akham säna:
[9] “Uñjapxam, israelitanakax waljanïxapxiwa, jiwasat sipansa wali ch'amanïpxarakiwa;
[10] ukhamïpansti wakisiw sum amuyt'añasa jupanakan juk'ampi jan mirantañapataki, mä nuwasïwi sartaspa ukkhax uñisirinakasamp mayacht'asisaw jiwasar nuwjawayas markasat sarxapxaspa” sasa.
[11] Ukat egipcionakax lurayir jaqinak uchapxäna israelitanakar wali ch'ama irnaqañanak lurayañataki. Jupanakarusti Pitón, Ramsés sat markanak lurayapxäna. Egiptonkir faraón reyix uka markanakaruw juyranakap imayäna.
[12] Ukampis israelitanakax wali t'aqhisiyat uñjaskasasa juk'ampiw mirantäna. Egipto markankir jaqinakasti israelitanakar wal axsarapxäna.
[13] Egipcio jaqinakax israelitanakar ch'ama lurañanakamp walpun t'aqhisiyäna.
[14] Ukatsti wali t'aqhisita jakayasaxa, ñiq'i tikanak lurayapxäna, pampan lurañanakax utjki taqi uka lurañanak lurayapxarakïna. Taqi uka lurañanakansti israelitanakax wali t'aqhisiyataw uñjasipxäna.
[15] Ukhamarusa, Egipto markankir reyix Sifrá, Puá sat hebreonak taypin utjir wawa usuyir warminakampiw parläna, jupanakarusti akham sarakïna:
[16] —Hebrea warminakar usuyapkät ukkhax wal amuyapxäta, uka wawax imillati jan ukax yuqallacha uka. Uka wawatix imill wawäni ukkhax jakaskpan, yuqall wawäni ukkhasti, ukspach ¡jiwayapxam! —sasa.
[17] Ukampis wawa usuyir warminakax Diosar axsartir warminakänwa, ukat jupanakax Egiptonkir reyin arsutaparjam jan lurapkänti, jan ukasti yuqall wawanakarux jakayapxänwa.
[18] Ukatsti Egiptonkir reyix wawa usuyir warminakar jawsayanisin säna: —¿Kunatarak yuqall wawanakar jakayapxtasti? —sasa.
[19] Uka pani warminakasti reyirux sapxänwa: —Israelita warminakax janiw egipcio warminakjamäkiti; jupanakax wali ch'aman warminakäpxiwa, nanakax usuyir janïr puripkta ukkhax niyaw jupanakax ususxapxi —sasa.
[20] Diosasti ukham askinak wawa usuyir warminakarux lurayäna, ukhamat israelita markax mirantaskakïna, ukatsti juk'at juk'at wali ch'aman tukurakïna. Ukhamarusa, wawa usuyir warminakan Diosar axsartapxatap laykusti, jupax khuyapt'ayänwa, wila masinakaparus juk'amp jilxatayäna.
[22] Faraón reyisti taqpach markaparuw säna: “Israelitanak taypintix yuqall wawanakax yurchixa, jawirar jaquntanipxam, ukampis imilla wawanakax jakaskpan” sasa.