[1] Diosax Moisesar sacerdotenakar luqtañxat parlaskakïnwa. Jupasti sänwa: “Nayar luqtirinak sacerdote kankañ katuqayañatakix akham luräta: Mä vaca qallu katüta, pä k'umar urqu ovejanakampi.
[2] Ukxarusti suma trigo jak'ut aceitemp chapuntat jan levaduran t'ant'ampi, tortanakamp luräta, ukatsti aceitemp jawikipat jan levaduran jisk'a muxsa t'ant'anaka,
[3] uka t'ant'anaksti mä canastaruw uchäta, ukatsti qullan chiqawjaruw uk apäta, vaca qallumpi, pä ovejamp chika.
[4] Ukatxa Aaronampiru, wawanakapampirux Tatitump Jikisiñ Carpan mantañapawjaruw irpäta, ukat jupanakar jariqasiyäta;
[5] ukatsti, sacerdote isinakampiw Aaronarux isthapiyäta, túnica jach'a isimpi, efod isimpi, efod isin capapampi, pectoralampi. Ukxarusti efod isirux wak'ampiw chint'äta;
[6] p'iqiparusti turbante ucharakïta, uka patxarusti nayan sacerdotëxatap yatiyir placa uchäta.
[7] Luqtañ aceite aptasin, ukampiw Aaronan p'iqipat warxatäta, ukhamat Diosar luqtat sacerdotëñapataki.
[8] Ukatsti wawanakaparuw jak'achasiyarakïta, jupanakarux túnica isinakampiw isthapiyäta.
[9] Aaronarusa, wawanakaparusa, wak'anakap sum chint'äta, p'iqir uchasiñ turbante satsa sum ucharakïta. Ukhamat jilïr kankañ jupanakar churäta, jupanakaruw sacerdote kankañax wiñayatak wakt'ani.
[10] “Uka qhipatsti, vaca qallurux Tatitump Jikisiñ Carpa nayraqataruw apäta, Aaronampi, wawanakapampi uka uywan p'iqipxar amparanakapamp luqxatañapataki,
[11] ukatsti, Dios nayraqatana, Tatitump Jikisiñ Carpa mantañ punkuruw uka vaca qallu jiwayäta.
[12] Ukatsti ampar luk'anamamp wilar aytasin altaran waxranakap jawsüta, ukat jilt'äki ukampisti altar kayuruw waranukurakïta.
[13] Ukatsti jiphillanakatsa, k'iwchatsa, maymurunakatsa lik'inakap apaqäta, ukatsti altarxaruw nakt'ayäta;
[14] ukampis vaca qallun aychapsa, lip'ichipsa, phurupsa campamentot anqäxaruw nakhantayanxäta, jucha luratanakat wilañcha luqtatätap layku.
[15] “Ukxarusti uka pä ovejat may katüta, ukatsti Aaronampi, wawanakapampix oveja p'iqxar amparanakapamp luqxatapxpan.
[16] Ukat uka oveja jiwayäta, wilapampisti altar thiyanakaruw ch'allsüta;
[17] ukxarusti jisk'a jisk'a kharinuqäta, ukatsti jiphillanaksa, chhuchhullinaksa jariqasin, jisk'a jisk'a kharinuqatampi, p'iqimp kuna mayarukiw uchäta.
[18] Ukat altar patxar oveja nakt'ayasin Tatitur jach'añchas luqtäta, uka nakt'at waxt'an suma q'apkirïñapataki.
[19] “Ukxarusti maya urqu oveja katurakïta, Aaronampi, wawanakapampi uka ovejan p'iqipxar amparanakapamp luqxatapxarakpan.
[20] Ukatsti uka oveja kharinuküta, wilapampisti Aaronampiru, wawanakapampiruw aynach tuqit kupi jinchupat jawt'äta, ukhamarak kupi ampar tayka luk'anata, kupi kayu tayka luk'anampita. Ukatsti jilt'kani uka wilampisti altar thiyanakaruw ch'allakipäta.
[21] Ukxarusti altar patxan jilt'ir wilampita, luqtañ aceitempit mä juk'a aptasin Aaronampiru, jupan isipampiru, wawanakapampiru, wawanakapan isinakapampiruw ch'allakipäta. Ukhamat Aaronampi, wawanakapampi, isinakapampix Diosar luqtatäxani.
[22] “Ukxarusti ovejan lik'ip apsurakïta, wich'inkhata, jiphillapata, k'iwchapata, paypach maymurupata, kupi lankhu charapata; uka ovejan sacerdotenak luqtañatakïtap layku.
[23] Ukxarusti Tatitun nayraqatapankki uka jan levaduran t'ant'a uchat canastatxa, mä muruq'u t'ant'a irsüta, aceitemp chapuntat t'ant'ampi, mä tortampi;
[24] taqi ukanaksti Aaronampina, wawanakapampin amparanakapxaruw uchäta, jupanakax Tatitun nayraqatapan khiwtasaw t'ant'anak luqtapxani.
[25] Ukatsti amparanakapat apaqasin altarxar uk nakt'ayäta, suma q'apkir nakt'ayat luqtäwimp chika. Ukasti Tatitur jach'añchañatak nakt'ayat waxt'awa.
[26] “Aaronar luqtañatakisti, ovejan jaraphip apaqasin Tatituruw luqtäta. Uka jaraphisti jumaruw wakt'ätam.
[27] Ukxarusti suma waxt'a luqtatäki uka jaraphi yaqharuw apaqäta, ukhamarak yanapañatak luqtatäki uka lankhu chara aycha apaqarakïta, ukanakasti luqtat ovejat apaqatawa, Aaronampitaki, wawanakapampitak imatäñapawa.
[28] Ukasti Aaronampitaki, wawanakapampitakïniwa. Aka luräwisti israelitanakatak wiñayatak arsut kamachïniwa, uka waxt'ax israelitanakan Tatitump sumankañatak luqtat wilañchäniwa.
[29] “Aaronan luqtat isinakapxa, wawanakapaw katuqani, jupanakax Tatitur luqtatäpkani, ukhamarak sacerdotëñatak jilïr kankañ katuqapkani ukapacha.
[30] Aarón qhipatsti wawanakapat khitiy sacerdotet sayt'chini ukaxa, qullan chiqawjar wilañcha luqtir mantañatakix paqallqu uruw uka sacerdote isi uchasiñapa.
[31] “Ukxarusti Aaronampiru, wawanakapampir luqtañatak waxt'äwi katuyat urqu ovejan aychapsti qullan chiqawjan qhatiyäta.
[32] Aaronampi, wawanakapampiw uka ovejan aychapampi, canastankir t'ant'amp manq'asipxani, Tatitump Jikisiñ Carpa mantañana.
[33] Jupanakaw uka aycha manq'apxani, juchanakapat pampachäwi jikxatañatak luqtatätap layku, kunapachatix luqtatäpkäna, sacerdote jilïr kankañ katuqapkän ukapacha. Ukampis janiw khiti jan uñt'at jaqis ukanakat manq'añapäkiti, ukanakan qullanätap layku.
[34] Qhipürutakitix luqtat aychampita, t'ant'ampitsa jilt'kani ukaxa, uka jilt'anak nakhantayxätawa, qullanätap laykusti, jan khitis manq'pati.
[35] “Ukhamasti, Aaronampina, wawanakapampin sacerdotëñatak jilïr kankañ katuqañatak luqtäwix paqallqu urüniwa, taqi ukanakasti nayan arsutaxarjam luratäñapawa.
[36] Ukxarusti sapüruw mä vaca qallu luqtäta, juchanak pampachayasiñataki; altar patan juchanakat wilañcha luqtasaw altar q'umachäta, aceitempiw qullanañchañatak ukxar warxatarakïta.
[37] Paqallq uruw altaran juchanakat wilañcha luqtäta; ukhamat uka altarax Diosar katuyatäsin Qullanan Qullanapäxani, uka altarar llamkt'irix Diosatak yaqhachatäxaniwa.
[38] “Sapüruw jan armt'asis altarxan mä maran pä urqu oveja luqtäta.
[39] Willjtarux nayrïr urqu oveja luqtäta, jayp'urusti maynïrïki ukarak luqtäta.
[40] Nayrïr ovejamp chiksti, sumïr jak'uta pä kilo jak'umpi, mä litro oliva aceitempi chapt'at luqtäta, ukxarusti mä litro vinompiw warxatäta, waxt'äkaspas ukhama.
[41] Jayp'thapirusti uka kipkarak maynïr urqu ovejampix luräta, ukhamarak jak'umpita, vinompitsa, ukhamat uka waxt'anakan Tatitutak suma q'apkir nakt'ayat luqtäñapataki.
[42] Taqpach israelitanaka, wawanakapan wawanakapaw wiñayapun akham waxt'anak Jikisiñ Carpar mantañäki uka chiqan nayar luqtañapa, uka chiqan nayax jumamp parlañatak ukankä.
[43] Uka chiqan israelitanakampix jikisï, uka chiqasti nayan ukankatax laykuw qullanañchat uñjasini.
[44] Jikisiñ Carpampi, altaramp nayatakiw yaqhachä, Aaronampiru, wawanakapampirus nayan luqtirixatakiw yaqhachä.
[45] Nayax israelitanak taypin jakä, jupanakan Diosapäyäwa.
[46] Ukhamat jupanakax yatipxani naya, Tatit Diosax Israelan Diosapätaxa, jupanak taypin jakañatak Egipto markat irpsunitaxa. Nayaw jupanakan Tatit Diosapätxa.