[1] ངས་ཡེས་ར་ཨེལ་གསོ་བར་མཛད་པ་ན། ཨེ་ཕཱར་ཡིམ་གྱི་ཉེས་པ་དང་། སཱ་མར་ཡའི་ལས་ངན་མངོན་དུ་བྱུང་སྟེ། ཅི་ལ་ཞེ་ན། དེ་རྣམས་ཀྱིས་རྫུན་སྤྱོད་བྱེད་པ་དང་། ནང་དུ་རྐུན་མ་འཛུལ། ཕྱི་ན་ཇག་པའི་དཔུང་གིས་འཕྲོག
[2] ངས་ཁོ་ཚོའི་ལས་ངན་པ་ཐམས་ཅད་ཐུགས་སུ་འཛིན་པ་ལ་དེ་ཚོས་བསམ་བློ་མ་བཏང་པས། ད་ལྟ་ངའི་སྤྱན་དྲུང་དུ་དེ་དག་རང་གི་ལས་རྣམས་ཀྱིས་ཀུན་ནས་སྐོར།
[3] དེ་ཚོས་རང་གི་ལས་ངན་གྱིས་རྒྱལ་པོ་དང་། རྫུན་གྱིས་སྐུ་དྲག་རྣམས་དགའ་པར་བྱེད་དེ།
[4] དེ་ཐམས་བཅད་ཀྱི་འདོད་པ་ནི་མེ་ལྟར་འབར་ཏེ། བག་ལེབ་བརྒྱབ་མཁན་གྱིས་ཕྱེ་བརྫི་པ་ནས་སྐྱུར་ལང་བའི་བར་དུ་མེ་འབུད་མཚམས་ཆད་དོ།།
[5] ངེད་ཀྱི་རྒྱལ་པོ་དགའ་སྤྲོར་རོལ་པའི་ཉིན་མོར་སྐུ་དྲག་རྣམས་ཀྱིས་ཆང་བཏུང་སྟེ་གང་སར་བསྐྱུགས་པ་དང་། རྒྱལ་པོ་ནི་ཤོབ་ཅན་དག་དང་འགྲོགས་ནས་དེའི་ལག་པ་འཇུས།
[6] ལྐོག་འཇབ་བྱེད་མཁན་གྱི་སེམས་ནི་མེ་ཐབ་ལྟར། ཁོ་ཚོས་སྒུག་འདུག་པ་ནི་བག་ལེབ་རྒྱབ་མཁན་མཚན་གང་བོར་ཉལ་པ་ལྟར་ཡིན་ཏེ། ཡང་སྔ་དྲོར་བསླེབས་ཏེ་མེ་ལྟར་འབར།
[7] དེ་ཐམས་ཅད་མེ་ལྟར་འབར་ཏེ། རང་གི་ཁྲིམས་དཔོན་རྣམས་ནི་མེད་པར་བྱེད། དེའི་རྒྱལ་པོ་ཐམས་ཅད་ཀྱང་ལྷུང་ནས་འདུག དེ་དག་གི་ཁྲོད་ན་ངའི་མཚན་བརྗོད་མཁན་སུའང་མེད་དོ།།
[8] ཨེ་ཕཱར་ཡིམ་ནི་ཕྱི་རོལ་པ་རྣམས་དང་འདྲེས་པས། མ་བཟློགས་པའི་བག་ལེབ་དང་འདྲ་སྟེ།
[9] ཕྱི་རོལ་པའི་རྒྱལ་ཁམས་རྣམས་ཀྱིས་དེའི་སྟོབས་ཟད་པར་གྱུར་ཡང་དེས་མ་ཤེས། དབུ་སྐྲ་དཀར་པོ་གྱུར་ཡང་དེས་མ་ཤེས།
[10] ཡེས་ར་ཨེལ་གྱི་ང་རྒྱལ་གྱིས་རང་གི་གཟི་བརྗིད་ཉམས་ཏེ། དེ་དག་དེ་ཐམས་བཅད་དང་འཕྲད་ཀྱང་། ཡ་ཝཱེ་རང་གི་དཀོན་མཆོག་གི་ཕྱོགས་སུ་མ་ལོག་སྟེ། ཁོང་མ་བཙལ་ཏོ།།
[11] ཨེ་ཕཱར་ཡིམ་ནི་ཕུག་རོན་བླུན་པོ་བསམ་མེད་དང་འདྲ་སྟེ། དེ་དག་གིས་ཨེ་ཅིབ་ཡུལ་ལ་འབོད་ཅིང་། ཨ་སུར་ཡུལ་ལ་འགྲོ་འོ།།
[12] དེ་དག་འགྲོ་དུས་ངས་རང་གི་རྒྱ་དེ་དག་གི་ཐོག་ཏུ་གཡུག་སྟེ། གནམ་མཁའི་བྱ་ལྟར་གཟུང་ནས། དེ་དག་གི་ཚོགས་ཀྱི་ནང་དུ་ཐོས་པ་བཞིན་དུ་དེ་དག་ལ་ཆད་པ་གཅད་ངེས།
[13] དེ་དག་གིས་ང་སྤངས་པས་བཀྲ་མི་ཤིས། ང་ལ་ངོ་ལོག་བྱས་པས་མེད་པར་བཟོ་ངེས། ངས་དེ་དག་སྐྱོབ་པར་འདོད་ཀྱང་། དེ་དག་གིས་ང་ལ་རྫུན་རྒྱབས།
[14] དེ་དག་གིས་རང་གི་མལ་ས་ནས་ཞུ་ཡང་། སེམས་བསམ་པས་ང་མ་ཞུ། དེ་དག་འབྲུ་དང་རྒུན་ཆང་གི་ཕྱིར་ཚོགས་ཀྱང་། ང་ལ་ངོ་ལོག་བྱས།
[15] ངས་དེ་དག་ལ་བསླབས་ནས་ཁོ་ཚོར་གཏན་པོར་བཅུག་མོད། དེ་དག་གིས་ད་དུང་ང་ལ་བསམ་སྦྱོར་ངན་པ་བྱེད།
[16] དེ་དག་འཁོར་ཡང་། བླ་ན་མེད་པ་ཁོང་གི་ཕྱོགས་སུ་མི་འཁོར་ཏེ། དེ་རྣམས་ནི་ལྷོད་པར་འདུག་པའི་གཞུ་ལྟར། དེ་དག་གི་སྐུ་དྲག་རྣམས་ཀྱིས་གང་འདོད་བརྗོད་པས་རལ་གྲི་ཁ་ནས་སྲོག་ཤོར་ཏེ། དེའི་ཕྱིར་ཨེ་ཅིབ་ཡུལ་ན་དེ་དག་ལ་འཕྱ་བར་འགྱུར་རོ།།