[1] ཨེ་ཕཱར་ཡིམ་གྱིས་རླུང་ལ་བརྟེན་ནས་འཚོ་ཞིང་། ཤར་རླུང་གི་རྗེས་སུ་རྒྱུག །ཞག་རེ་བཞིན་རྫུན་མང་དུ་སྨྲ་སྟེ་དབང་ཆོས་བྱེད། ཨ་སུར་དང་ཆད་དོན་བྱེད་དེ། ཨེ་ཅིབ་ཡུལ་དུ་སྣུམ་ནི་སྐྱེལ།
[2] གཙོ་བོ་ཡ་ཝཱེས་ཡ་ཧུ་དཱ་ལ་སྐྱོན་འདོན་བྱས་ཀྱང་། ཡ་ཀོབ་ལ་དེའི་ལམ་རྣམས་བཞིན་དུ་ཆད་པ་དང་། སྤྱོད་པ་བཞིན་དུ་ལན་གཞལ་ལོ།།
[3] དེས་མངལ་གྱི་ནང་ན་རང་གི་སྤུན་གྱི་རྟིང་པར་འཇུས། དར་ལ་བབས་དུས་དཀོན་མཆོག་དང་ཤེད་འགྲན་བཏང་སྟེ།
[4] འོ་ན། ཕོ་ཉ་དང་འགྲན་ཏེ་རྒྱལ། ངུས་ཏེ་ཁོང་ལ་གསོལ་བ་བཏབ་ནས་པེད་ཨེལ་ན་ཡ་ཝཱེ་དང་མཇལ་ཏེ། དེར་ཡ་ཝཱེས་ངེད་ལ་གསུངས་པར་མཛད།
[5] ཡ་ཝཱེ་ནི་དཔུང་ཚོགས་ཀྱི་དཀོན་མཆོག་དང་། ཁོང་གི་དྲན་གསོ་བྱེད་པའི་མཚན་ཡིན་ནོ།།
[6] དེ་བས་ཁྱོད་རང་གི་དཀོན་མཆོག་གི་ཕྱོགས་སུ་སྒྱུར་ཞིག །སྙིང་རྗེ་དང་གཤགས་སྲུང་ཞིང་། རང་གི་དཀོན་མཆོག་ལ་རྒྱུན་དུ་རྟེན་པར་གྱིས་ཤིག
[7] ཀ་ན་ཨན་པའི་ལག་ན་མགོ་སྐོར་བའི་སྲང་ཡོད་དེ། ཟོལ་ཟོག་ལ་དགའོ།།
[8] ཨེ་ཕཱར་ཡིམ་གྱིས་འདི་སྐད་དུ། ད་ཕྱུག་སྟེ་རྒྱུ་ནོར་མང་པོ་ང་ལ་བརྙེད། ངའི་ལས་ཐམས་ཅད་ལས་ཐོབ་པ་རྣམས་ནས་ང་ལ་སྡིག་པ་ཡོད་པ་སུས་ཀྱང་ཚོལ་བར་མི་འགྱུར།
[9] ང་ཡ་ཝཱེ་ནི་ཨེ་ཅིབ་ཡུལ་ནས་ཚུན་དུ་ཁྱོད་ཀྱི་དཀོན་མཆོག་ལགས་སོ།། ད་དུང་དུས་ཆེན་གྱི་ཞག་རྣམས་ཀྱི་ཚུལ་བཞིན་དུ་ངས་ཁྱོད་སླར་གུར་ནང་དུ་གནས་སུ་གཞུག་གོ །
[10] ངས་ལུང་སྟོན་པའི་སྒོ་ནས་ཀྱང་སྨྲས། ཞལ་གཟིགས་མང་པོའང་བསྟན། ལུང་སྟོན་པ་རྣམས་བར་དུ་བཞག་ནས་དཔེ་མང་པོའང་བསྟན་ཏོ།།
[11] གིལ་ཨད་ན་སྡིག་པ་མེད་དམ། ཡང་དག་པ་དེ་དག་སྙིང་པོ་མེད་དེ།དེ་དག་གིས་གིལ་གལ་ན་གླང་རྣམས་མཆོད་པར་གཏོང་སྟེ། ཁོ་ཚོའི་མཆོད་ཁྲི་ནི་ཞིང་བར་གྱི་ས་སྤུང་དང་འདྲ་བར་འགྱུར་འོང་།
[12] སྔོན་ཡ་ཀོབ་ནི་ཨ་རམ་ཡུལ་དུ་བྲོས་ནས། ཡེས་ར་ཨེལ་གྱིས་ཆུང་མ་ཐོབ་ཕྱིར་བྲན་པོ་བྱས། ཁྱོ་མོའི་དོན་དུ་ལུག་འཚོས་ཞིང་།
[13] རྗེས་སུ་ལུང་སྟོན་པ་ཞིག་གི་སྒོ་ནས་གཙོ་བོ་ཡ་ཝཱེས་ཡེས་ར་ཨེལ་ཨེ་ཅིབ་ཡུལ་ནས་ཕྱི་རོལ་དུ་ཡར་དྲངས་ཏེ། ལུང་སྟོན་པ་ཞིག་གི་སྒོ་ནས་གཟུགས་སྐྱོང་མཛད།
[14] ཨེ་ཕཱར་ཡིམ་གྱིས་དཀོན་མཆོག་གི་དགོངས་པ་དྲག་ཏུ་དཀྲུག་པའི་ལས་བྱས་པས། ཁོའི་ཁྲག་དེ་རང་གི་ཐོག་ཏུ་ལུས་བཅུག་ནས། དེའི་གཙོ་བོས་དེ་རང་གི་ངོ་ཚ་དེ་ལ་སླར་ཟློག་པར་འགྱུར་རོ།།