[1] སྔོན་ཨེ་ཕཱར་ཡིམ་གྱིས་གླེང་དུས། མི་རྣམས་འདར་ཏེ། ཡེས་ར་ཨེལ་གྱི་ནང་ན་ཁོ་མཐོ་སར་བསྡད་དེ། ཡིན་ཡང་པཱ་ཨལ་གྱི་རྐྱེན་གྱིས་ཁོས་སྡིག་པ་སྤྱད་ནས་ཤི།
[2] ད་ལྟ་སྡིག་པ་ཇེ་མང་དུ་བྱེད་ཅིང་རང་གི་དངུལ་ལས་རང་ལ་བླུགས་སྐུ་རྣམས་བཟོས། རང་གི་འདུ་ཤེས་བཞིན་སྐུ་འདྲ་བཟོས། དེ་ཐམས་ཅད་ལག་ཤེས་པའི་ལས་ཡིན་ཏེ། དེ་དག་གི་སྐོར་དུ་ཁྱོད་རྣམས་ཀྱིས། མཆོད་པ་འབུལ་མཁན་རྣམས་ཀྱིས་བ་ཕྲུག་རྣམས་ལ་ཁ་སྐྱོལ་ཞིག་ཅེས་སྨྲའོ།།
[3] དེའི་ཕྱིར་དེ་དག་ནི་སྔ་དྲོའི་སྤྲིན་ལྟ་བུ་དང་སྔ་སོར་སྟོར་བའི་ཟིལ་བ་ལྟ་བུར་འགྱུར་ཞིང་། རླུང་ཚུབ་ཀྱིས་གཡུལ་ཁ་ལས་འཁྱེར་བའི་སོག་མ་ལྟ་བུ་དང་། དུ་ཁུང་ནང་གི་དུ་བ་ལྟ་བུའོ།།
[4] འོན་ཀྱང་ཡ་ཝཱེ་ང་ནི་ཨེ་ཅིབ་ཡུལ་ནས་ཚུན་དུ་ཁྱོད་ཀྱི་དཀོན་མཆོག་ལགས་ཏེ། ཁྱོད་ཀྱིས་ང་མ་གཏོགས་པར་གཞན་དཀོན་མཆོག་གང་ཡང་ངོ་མི་ཤེས་ཏེ། ཡང་ང་མ་གཏོགས་པར་གཞན་སྐྱབས་མགོན་ཞིག་མེད་དོ།།
[5] དབེན་སྟོང་གི་གནས་སུ་ཁྱོད་ལ་གཟིགས་པ་དེ་ང་ཡིན།
[6] དེ་བཞིན་དུ་ཟོས་ནས་དེ་དག་འགྲངས། འགྲངས་ནས་སེམས་སུ་ང་རྒྱལ་སྐྱེས་པའི་དབང་གིས་དེ་དག་གིས་ང་ནི་བརྗེད།
[7] དེའི་ཕྱིར་ང་དེ་དག་ལ་སེང་གེ་བཞིན་དུ་གྱུར་ཏེ། ལམ་ཁར་ཡོད་པའི་གཟིག་བཞིན་དུ་ངས་དེ་དག་ལ་འཇབ།
[8] ང་ནི་ཕྲུ་གུ་ཕྲོགས་པའི་དོམ་མ་བཞིན་དུ་དེ་དག་ལ་རྒོད་ཀྱང་། ཡང་མོ་སེང་བཞིན་དུ་དེ་དག་དེར་མིད་ཅིང་། གཅན་གཟན་བཞིན་དུ་དེ་རྣམས་འདྲལ་བར་བྱའོ།།
[9] ཀྱེ་ཡེས་ར་ཨེལ། ཁྱོད་ཀྱི་སྐྱབས་ཡིན་པ་ང་ལ་སྡང་བ་ནི་ཁྱོད་ཕུང་བའི་རྒྱུའོ།།
[10] ད་ཁྱོད་རང་གི་གྲོང་ཁྱེར་ཐམས་ཅད་ན་ཁྱོད་སྲུང་བའི་རང་གི་རྒྱལ་པོ་དེ་གང་ན་ཡོད། ང་ལ་རྒྱལ་པོ་ཞིག་དང་སྐུ་དྲག་རྣམས་ཐོང་ཞིག་ཅེས་པའི་ཁྲིམས་དཔོན་རྣམས་གང་ན་ཡོད།
[11] ངས་རང་གི་ཐུགས་ཁྲོའི་ངང་ནས་ཁྱོད་ལ་རྒྱལ་བོ་གནང་སྟེ། ཁོང་ཁྲོའི་ངང་ནས་དེ་ནི་མེད་པར་བཅུག་པ་ཡིན།
[12] ཨེ་ཕཱར་ཡིམ་གྱི་སྡིག་པ་མང་བྱས་ནས། དེའི་ཉེས་པ་མང་པོ་བསགས།
[13] བུད་མེད་ཀྱི་སྐྱེ་གཟེར་རྣམས་དེ་ལ་འབབ་པར་འགྱུར། ཁོ་ནི་བློ་རྨོངས་པའི་བུ་སྟེ། བུ་སྐྱེ་དུས་བུ་མེད་པ་དང་འདྲའོ། །
[14] ངས་དེ་དག་གཤིན་པའི་ཡུལ་ལས་ཐར་བར་འཇུག་སྟེ། འཆི་པ་ལས་སྐྱོབ་པར་འགྱུར། ཀྱེ་འཆི་བ། ཁྱོད་ཀྱི་གནོད་འཚེ་གང་ན་འདུག ། ཀྱེ་གཤིན་ཁམས། ཁྱོད་ཀྱི་འཇིག་པ་གང་ན་ཡོད། སྙིང་རྗེ་ནི་ངའི་སྤྱན་ལས་སྟོར་བར་འགྱུར།
[15] དེ་ནི་རང་གི་སྤུན་གྱི་ཁྲོད་ན་རྒྱས་པར་གྱུར་ཡང་། ཤར་རླུང་སྟེ། གཙོ་བོ་ཡ་ཝཱེའི་རླུང་ནི་དབེན་སྟོང་ནས་ལངས་ནས། དེའི་ཆུ་མགོ་སྐམ་ཞིང་། ཆུ་མིག་རད་ནས། རླུང་དེས་ཁོས་བསགས་པའི་ནོར་ཐམས་བཅད་དབྲོག་པར་འགྱུར་རོ།།
[16] སཱ་མར་ཡས་རང་གི་སྡིག་པ་ཁུར་པར་འགྱུར། དེ་ཅིའི་ཕྱིར་ཞེ་ན། དེས་རང་གི་དཀོན་མཆོག་ལ་ངོ་ལོག་བྱས་པས། དེ་དག་རལ་གྲིས་བརྡབས་ནས། དེ་དག་གི་ཕྲུ་གུ་རྣམས་ས་ལ་བརྡབས་ཏེ། བུད་མེད་སྦྲུམ་མ་རྣམས་གཤེག་པར་འགྱུར་རོ།།