[1] ཤོག་ལ། ངེད་རྣམས་གཙོ་བོ་ཡ་ཝཱེའི་ཕྱོགས་སུ་ཕྱིར་ལོག་པར་བྱའོ།། དེ་ཅིའི་ཕྱིར་ཞེ་ན། ཁོང་གིས་རྨ་ཕྱུང་ནའང་། ཁོང་ཉིད་ཀྱིས་གསོ་བར་མཛད་པར་འགྱུར་ལ། ཁོང་གིས་བརྡུངས་ཀྱང་། ངེད་ཀྱི་རྨ་ཁོང་གིས་བསྡམ་པར་འགྱུར་རོ།།
[2] ཞག་གཉིས་ནས་ངེད་སླར་གསོན་པོར་མཛད་དེ། ཞག་གསུམ་པར་ངེད་བསྒྲེངས་ནས། ཁོང་གི་སྤྱན་དྲུང་དུ་འཚོ་བར་འགྱུར།
[3] དེ་ནས་ངེད་ཀྱིས་ཁོང་རྟོགས་པའི་རིགས། སེམས་གཏིང་ནས་གཙོ་བོ་ཡ་ཝཱེ་ངོ་འཚོལ་དགོས་ཏེ། ཁོང་ནི་ཐོ་རངས་ལྟར་ཕེབས་ཏེ། སྦྲང་ཆར་བཞིན་ཁོང་ངེད་རྩར་འབྱོན་པར་འགྱུར། ཁོང་ནི་ས་གཤེར་བར་བྱེད་པའི་ཆར་པ་བཞིན་དུའོ།།
[4] ཀྱེ་ཨེ་ཕཱར་ཡིམ་། ངས་ཁྱོད་ལ་ཅི་བྱ། ཀྱེ་ཡ་ཧུ་དཱ། ངས་ཁྱོད་ལ་ཅི་བྱ། གང་ལ་ཞེ་ན། ཁྱོད་ཀྱི་སྙིང་རྗེ་ནི་ཐོ་རངས་ཀྱི་སྤྲིན་དང་ཟིལ་པ་བཞིན་ཡལ་བར་འགྱུར།
[5] དེའི་ཕྱིར་ངས་ལུང་སྟོན་པའི་སྒོ་ནས་དེ་དག་བརྡེགས་ནས། ཁོ་བོའི་ཞལ་གྱི་གསུངས་རྣམས་ཀྱིས་དེ་དག་བསད་པ་ཡིན། ཁྱོད་ཀྱི་བར་ཆོད་རྣམས་འོད་ལྟར་འཕྲོས་ཏེ།
[6] དེ་ཅིའི་ཕྱིར་ཞེ་ན། ང་ནི་མཆོད་པ་ལ་མི་དགའ། སྙིང་རྗེའི་སེམས་ལ་དགའ། སྦྱིན་སྲེག་རྣམས་ལས་མི་རྣམས་ཀྱིས་དཀོན་མཆོག་ཤེས་པ་ལ་ལྷག་པར་དགའོ།།
[7] འོན་ཀྱང་དེ་དག་ནི་ཞལ་ཆད་ལས་འགལ་བའི་མི་དང་འདྲ་སྟེ། དེར་ང་ལ་ལོག་པར་བྱས།
[8] གིལ་ཨད་ནི་ལས་ངན་སྤྱོད་པའི་གྲོང་ཁྱེར་ཡིན་ཏེ། ཁྲག་གིས་གྲིབ་ཕོག་པའོ།།
[9] མཆོད་དཔོན་ཚོགས་ཀྱིས་ཇག་དཔུང་བཞིན་དུ་སྒུག་སྟེ། སི་ཀེམ་གྱི་ལམ་ན་སྲོག་བཅད་པའི་སྡུག་པ་བསེགས།
[10] ཡེས་ར་ཨེལ་གྱི་ཁྱིམ་རྒྱུད་ཀྱི་ནང་དུ་འཇིགས་སུ་རུང་པའི་བྱ་བ་ཞིག་ངས་མཐོང་སྟེ། དེར་ཨེ་ཕཱར་ཡིམ་གྱི་ནང་དུ་ལོག་གཡེམ་བྱས་པས། ཡེས་ར་ཨེལ་ལའང་གྲིབ་ཕོག་པ་ཡིན།
[11] ངས་རང་གི་མི་བརྒྱུད་བཙོན་ལས་སྡོག་པའི་ཚེ། ཀྱེ་ཡ་ཧུ་དཱ། ཁྱོད་ལའང་སྟོན་ཐོག་ཅིག་ཐོབ་པར་མཛད་དོ།།