[1] ཀྱེ་ཡེས་ར་ཨེལ་པ་རྣམས། ཡ་ཝཱེའི་བཀའ་ལ་ཉོན་ཞིག ། དེ་ཅིའི་ཕྱིར་ཞེ་ན། ཡུལ་འདི་ན་བདེན་པ་ཉིད་དང་། སྙིང་རྗེ་དང་། དཀོན་མཆོག་ངོ་ཤེས་པ་མེད་པའི་རྐྱེན་གྱིས་ཡ་ཝཱེས་ཡུལ་འདིའི་འབངས་ལ་སྐྱོན་བཏོན་ཏེ།
[2] མནའ་རྫུན་མ་སྐྱེལ་པ་དང་། བསླུ་བྲིད། སྲོག་གཅོད། རྐུ་བྱེད་པ། ལོག་གཡེམ་དང་སྡུག་རྩུབ་བཅས་ཀྱིས་ཤ་ཁྲག་གི་འཁོན་པ་ཇེ་མང་ནས་ཇེ་མང་དུ་བྱུང་པས།
[3] དེའི་ཕྱིར་ས་གཞི་འདིར་སྡུག་བསྔལ་གྱིས་ཁེངས་འདུག་སྟེ། དེར་སྡོད་པའི་མི་དང་། རི་དྭགས ། གནམ་གྱི་འདབ་ཆགས་དང་བཅས་ཉིན་རེར་ཉམས་ཐག་པར་འགྱུར་ལ། དེས་མ་ཟད་རྒྱ་མཚོའི་ཉ་རྣམས་ཀྱང་མེད་པར་འགྱུར་རོ།།
[4] ཡིན་ཡང་སུས་ཀྱང་གཞན་དང་མི་རྩོད་པར་སྐྱོན་ཡང་མ་གདོན་ཞིག ། ཁྱོད་ཀྱི་མི་བརྒྱུད་ནི་མཆོད་དཔོན་ལ་རྩོད་པ་རྣམས་དང་འདྲའོ།།
[5] དེའི་ཕྱིར་ཉིན་མོར་ཁྱོད་འགྱེལ་བར་འགྱུར། མཚན་མོར་ཁྱོད་དང་མཉམ་དུ་ལུང་སྟོན་པའང་འགྱེལ་བར་འགྱུར། ཡང་ངས་ཁྱོད་ཀྱི་མ་མེད་པར་བྱའོ།།
[6] ངའི་མི་བརྒྱུད་ལ་ཤེས་བྱ་མི་ལྡན་པས་མེད་པར་གྱུར་པ་དང་། ཁྱོད་ཀྱིས་ཤེས་བྱ་དོར་ན། ངས་ཀྱང་ཁྱོད་དོར་བར་འགྱུར་ཏེ། ཁྱོད་ངའི་དྲུང་ན་མཆོད་དཔོན་ཏུ་མི་སྐོའོ།། ཁྱོད་ཀྱིས་རང་གི་དཀོན་མཆོག་གི་བཀའ་ཁྲིམས་བརྗེད་པས།ངས་ཀྱང་ཁྱོད་ཀྱི་ཕྲུ་གུ་རྣམས་བརྗེད་པར་འགྱུར་རོ། །
[7] མཆོད་དཔོན་ཇེ་ལྟར་ཕེལ་ན་ང་ལ་འགལ་བའི་སྡིག་པ་ལྷག་པར་བྱས་པས། ངས་དེ་དག་གི་གཟི་བརྗིད་ནི་ངོ་ཚ་རུ་སྒྱུར་བར་བྱའོ།།
[8] དེ་དག་གིས་ངའི་མི་བརྒྱུད་ཀྱི་ཉེས་སྡིག་ལ་བརྟེན་ནས་འཚོ་ཤིང་། སེམས་གཏིང་ནས་ངའི་མི་བརྒྱུད་ཀྱིས་ཉེས་བ་བསེགས་པ་ལ་འཐད་དོ།།
[9] ཡང་མི་བརྒྱུད་ལ་འཕོག་པ་ལྟར་མཆོད་དཔོན་ལའང་འཕོག་པར་འགྱུར། ཡང་ངས་དེ་དག་གི་སྤྱོད་པའི་ཕྱིར་ཆད་པས་གཅད་དེ། དེ་དག་གི་སྤྱོད་པ་ལྟར་རྒྱུ་འབྲས་འཁོར་ངེས།
[10] དེ་དག་གིས་གཙོ་བོ་ཡ་ཝཱེ་སྤངས་པས། དེ་དག་གིས་ཟ་ཡང་མི་ཚིམ་སྟེ། ལོག་པར་གཡེམ་ཡང་བརྒྱུད་འཕེལ་བར་མི་འགྱུར་ཏེ།
[11] ལོག་གཡེམ་དང་། རྒུན་ཆང་། རྒུན་ཆང་གསར་པས་སེམས་འཕྲོག་པར་བྱེད་དོ།།
[12] ངའི་འབངས་མིས་ཤིང་ལྟུམ་ལ་ཞུ་སྟེ། དེའི་དབྱུག་པས་ཁོ་ཚོར་ལམ་སྟོན་པར་བསམ་པ་དང་། ལོག་གཡེམ་གྱི་སེམས་ཀྱིས་དེ་དག་གི་ལམ་སྟོར་བཅུག་ནས། རང་གི་དཀོན་མཆོག་སྤངས་ཏེ་ལོག་པར་གཡེམ།
[13] རི་རྩེ་རྣམས་ན་མཆོད་པ་འབུལ་ཞིང་། རི་ཕྲན་དང་། བེ་ཤིང་། དབྱར་པ། ཨེ་ལཱ་ཤིང་གི་ལྐོག་ན་སྤོས་བདུགས་གོ ། རྒྱུ་མཚནདེ་དག་གི་བསིལ་གྲིབ་ལེགས་པའི་ཕྱིར་རོ།།དེ་བས་ཁྱོད་ཀྱི་བུ་མོ་དག་གིས་ལོག་གཡེམ་བྱེད་དེ། མནའ་མ་དག་གིས་ཀྱང་ལོག་གཡེམ་བྱེད་དོ།།
[14] ཁྱོད་ཀྱི་བུ་མོ་རྣམས་ཀྱིས་ལོག་གཡེམ་བྱས་པའི་ལས་དང་། མནའ་མ་རྣམས་ཀྱིས་ལོག་པར་གཡེམ་པའི་ལས་ལ་ངས་ཆད་པ་མི་གཅད་དེ། ཅི་ལ་ཞེ་ན། དེ་དག་ཁོ་རང་རྣམས་ཀྱང་གཡེམ་མོ་དང་བཅས་འགྲོགས་ཤིང་། ཆོས་རྫུ་སྨད་འཚོང་མ་དང་འགྲོགས་ནས་མཆོད་པ་འབུལ་ལོ།། དེ་བས་ཤེས་རྨོངས་ཅན་གྱི་མི་སྡེ་འདི་སྣུབ་པར་འགྱུར་རོ།།
[15] ཀྱེ་ཡེས་ར་ཨེལ་ཁྱོད་འདོད་ཆགས་ལ་སྤྱོད་ཀྱང་། ཡ་ཧུ་དཱས་སྡུག་པ་མ་སྤྱོད་ཅིག ། གིལ་གལ་དུ་མ་འགྲོ་ཤིག ། པེད་ཨ་ཝེན་ཁར་མ་འཛེགས་ཤིག ། གཙོ་བོ་ཡ་ཝཱེ་གསོན་པོའོ་ཞེས་མནའ་མ་སྐྱེལ་ཞིག །
[16] དེ་ཅི་ལ་ཟེར་ན། ཡེས་ར་ཨེལ་གྱི་མི་བརྒྱུད་ནི་བ་མོ་བཞིན་གཏུམ་པོ་ཡིན་པས། ད་ལྟ་གཙོ་བོ་ཡ་ཝཱེས་དེ་དག་གུ་ཡངས་སར་ལུ་གུ་བཞིན་འཚོ་བར་འགྱུར་ཐུབ་བམ།
[17] ཨེ་ཕཱར་ཡིམ་ནི་སྐུ་འདྲ་དང་ཆགས་པས། དེ་ལྟར་བྱེད་དུ་ཆུག །
[18] དེ་དག་གིས་ཆང་འཐུང་རྗེས། སྟུད་མར་ལོག་གཡེམ་བྱེད། དེའི་དཔོན་པོ་རྣམས་ནི་ངོ་ཚའི་ལས་ལ་རབ་ཏུ་དགའ།
[19] རླུང་གིས་དེ་དག་རང་གི་ནང་མོ་བཏུམ་སྟེ། རང་གི་མཆོད་པ་རྣམས་ཀྱིས་དེ་དག་སྐྱེངས་པར་འགྱུར་རོ།།