[1] ཁྱོད་རྣམས་ཀྱིས་རང་གི་སྤུན་ཟླ་རྣམས་ལ་ཨ་མཱེ་དང་། ལྕམ་སྲིང་རྣམས་ལ་རུ་ཧ་མ་ཞེས་འབོད་ཅིག ། ཡང་ཀི་མཱར་ནི་གཡེམ་མ་ཡིན་ཏེ། ཡེས་ར་ཨེལ་ལ་ཡང་བློ་མ་དཀར་རོ།།
[2] རང་གི་མ་དང་གནས་ལུགས་བརྗོད་པར་གྱིས། དེ་ཅིའི་ཕྱིར་ཞེ་ན། མོ་ནི་ངའི་ཆུང་མ་མ་ཡིན་ཏེ། ང་ཡང་དེའི་ཁྱོ་བོ་མ་ཡིན་ནོ།། ཡང་མོ་ལ་དེའི་གདོང་ལས་ཤར་བའི་འདོད་པའི་ཚུལ་དང་། ལུས་ནས་བྱུང་བའི་ལོག་གཡེམ་གྱི་སྤྱོད་པ་དག་སྤོང་དུ་ཆུག་ཅིག
[3] དེ་མིན་ངས་མོ་གཅེར་བུ་ཕུད་དེ་དུས་ད་ལྟ་སྐྱེས་པ་ཞིག་དང་འདྲ་བར་འགྱུར་ལ། མོ་ནི་དབེན་སྟོང་དང་སྐམ་ས་ལྟར་སྐོམ་ནས་ཤི་པར་འགྱུར།
[4] ཡང་ངས་དེའི་ཕྲུ་གུ་རྣམས་ལ་སྙིང་རྗེ་བར་མི་བྱ་སྟེ། ཅིའི་ཕྱིར་ཞེ་ན། དེ་དག་ལོག་གཡེམ་ལས་བྱུང་པའི་ཕྱིར།
[5] དེ་དག་གི་མ་ཡིས་ལོག་གཡེམ་བྱས་པ་དང་། དེ་དག་མངལ་མཁན་གྱིས་ངོ་ཚ་བའི་ལས་བྱས་ཏེ། གང་ལ་ཞེ་ན། ང་ལ་བག་ལེབ་དང་། ཆུ་དང་། བལ་དང་། སོ་མ་ར་ཙ་དང་། འབྲུ་མར་དང་། བཏུང་བ་སྟེར་བའི་ངའི་གྲོགས་པོ་ཚོའི་རྗེས་སུ་ང་འབྲང་བར་བྱའོ་ཞེས་མོས་སྨྲས་པའི་ཕྱིར་རོ།།
[6] དེ་བས་ན། མོས་རང་གི་ལམ་མི་རྙེད་པའི་ཕྱིར། ངས་མོ་ཡི་རྒྱུ་ལམ་ཚེར་མས་བཀག་སྟེ། རྩིག་པ་ཞིག་སློང་བར་བྱའོ།།
[7] ཁོ་མོ་རང་གི་དགའ་གྲོགས་ཚོའི་ཕྱི་བཞིན་བདའ་ཡང་མི་ནོན། འཚོལ་ཡང་མི་རྙེད་པས། ཁོ་མོས་འདི་ལྟར་དུ། ང་རང་གི་ཁྱོ་དང་པོའི་རྩར་ཕྱིར་ལོག་པར་བྱའོ།།དེ་ཅིའི་ཕྱིར་ཞེ་ན། ད་ལྟ་བས་སྔོན་དུ་ལེགས་སོ་ཞེས་ཟེར་བར་འགྱུར།
[8] གང་ལ་ཞེ་ན། དེ་དག་གིས་པཱ་ཨལ་ལ་ཕུལ་བའི་འབྲུ་དང་། རྒུན་ཆང་གསར་པ་དང་། འབྲུ་མར་ངས་མོ་ལ་བཏང་བ་དང་། གསེར་དངུལ་སྤེལ་བར་མཛད་མཁན་ཡང་ང་ཡིན་པ་མོས་མི་ཤེས་སོ།།
[9] དེའི་ཕྱིར་ང་ལོག་འོང་ཞིང་སྟོན་ཁའི་དུས་སུ་ངའི་འབྲུ་དང་། ངའི་རྒུན་ཆང་ལེན་པར་བྱ་སྟེ། དེའི་གཅེར་བུ་གབ་པའི་ཕྱིར་ངས་བཏང་བའི་བལ་དང་སོ་མ་ར་ཙ་ཡང་མོ་ལས་ལེན་པར་བྱའོ།།
[10] ངས་མོའི་ངོ་ཚ་ནི་མོའི་དགའ་གྲོགས་ཚོའི་མདུན་དུ་མངོན་པར་བྱ་སྟེ། ངའི་ལག་ནས་སུས་ཀྱང་མོ་སྒྲོལ་བར་མི་བྱའོ།།
[11] ཡང་ངས་མོའི་སེམས་སྐྱིད་པར་བྱེད་པའི་དུས་ཆེན་དང་། ཟླ་གསར་དང་། ངལ་གསོ་བའི་ཉིན་དང་། ཆོས་སྟོན་ཐམས་ཅད་འགེགས་པར་བྱའོ།།
[12] ཡང་འདི་ནི་ངའི་དགའ་གྲོགས་རྣམས་ཀྱིས་ང་ལ་བྱིན་པའི་རྔན་པའོ་ཞེས་མོས་ཟེར་བའི་རྒུན་ཤིང་དང་། སེ་ཡབ་ཤིང་རྣམས་ངས་མེད་པར་བཟོས་ནས། དེ་རྣམས་བདག་པོ་མེད་པའི་ནགས་ཚལ་དུ་བྱས་ཏེ། སྤང་རྒོད་ཀྱི་གཅན་གཟན་རྣམས་ཀྱིས་དེ་དག་ཟ་བར་འགྱུར་རོ།།
[13] ཡང་པཱ་ཨལ་གྱི་ཉིན་མོ་རྣམས་ལ། མོས་དེ་དག་ལ་བདུག་སྤོས་ཀྱིས་བདུགས་ཏེ། རང་ལ་རྣ་ལོང་དང་རྒྱན་ཆས་བརྒྱན་ཏེ། དགའ་གྲོགས་ཀྱི་ཕྱི་བཞིན་བྲངས་ནས། བདག་བརྗེད་པར་བྱས་པ་ལ་ངས་མོ་ལ་ཉེས་ཆད་གཅད་ངེས་ཞེས་གཙོ་བོ་ཡ་ཝཱེས་གསུངས་སོ།།
[14] དེ་བས་ཀྱེ་ཧོ། ངས་མོ་སླུ་ཞིང་། དབེན་སྟོང་ལ་དྲངས་ནས། སྙིང་བརྩེ་བའི་གཏམ་གླེང་སྟེ། མོར་སེམས་འགུལ་འཐེབ་པར་བྱའོ།།
[15] བདག་གིས་མོ་ལ་དེར་རང་གི་རྒུན་ཚལ་རྣམས་དང་། ཨ་ཀོར་གྱི་ལུང་པའི་ཚབ་ཏུ་རེ་བའི་སྒོ་ཞིག་སྟོན་པར་བྱའོ།། ཡང་དེར་མོའི་ལང་ཚོའི་ཉིན་མོ་རྣམས་དང་། མོ་ཨེ་ཅིབ་ཡུལ་ནས་ཐོན་པའི་ཉིན་མོ་རྣམས་དང་འདྲ་བར་གླུ་ལེན་པར་འགྱུར་རོ།།
[16] ཡང་ཉིན་དེར་ཁྱོད་ཀྱིས་ང་ལ་①ཡི་ཤི་ཞེས་འབོད་པར་འགྱུར་པ་ལས། སླར་པཱ་ཨལ་འབོད་པར་མི་འགྱུར་རོ་ཞེས་གཙོ་བོ་ཡ་ཝཱེས་གསུངས་སོ།། ཡི་ཤི་ནི་ངའི་སྐྱེས་པ་ཞེས་པའི་དོན།
[17] དེ་ཅིའི་ཕྱིར་ཞེ་ན། ངས་པཱ་ཨལ་གྱི་མིང་རྣམས་མོའི་ངག་ལས་མེད་པར་བྱས་ནས། དེ་དག་གི་མིང་སུས་ཀྱང་བརྗོད་པར་མི་འགྱུར་རོ།།
[18] ཡང་ཉིན་དེར་ངས་ཁོ་ཚོའི་དོན་དུ་ཐང་གི་དུད་གྲོ་དང་། གནམ་གྱི་འདབ་ཆགས་དང་། སའི་ལྟོ་འགྲོ་རྣམས་དང་བཅས་སུ་ཞལ་ཆད་མཛད་ཅིང་། ངས་ས་གཞི་ལས་གཞུ་དང་རལ་གྲི་དང་འཐབ་མོ་མེད་པར་བྱ་སྟེ། དེ་དག་ཞི་བདེ་ངང་ཉལ་དུ་གཞུག་གོ །
[19] ཡང་ཁྱོད་ངའི་གཏན་གྱི་བག་མ་དང་།འོ་ན། དྲང་བ་ཉིད་དང་། དྲང་བདེན་དང་། བཀའ་དྲིན་དང་། ཐུགས་རྗེ་རྣམས་ཀྱི་སྒོ་ནས་ངའི་བག་མར་བྱ་སྟེ།
[20] ཡང་སེམས་དྲང་པོས་ཁྱོད་ངའི་བག་མ་བྱས་ན། ཁྱོད་ཀྱིས་གཙོ་བོ་ཡ་ཝཱེའི་ངོ་ཤེས་པར་འགྱུར་རོ།།
[21] གཙོ་བོ་ཡ་ཝཱེས་འདི་སྐད་དུ། ཉིན་དེར་ངས་ལན་འདེབས་པར་བྱ་སྟེ། ངས་ནམ་མཁའ་ལ་ལན་དང་། ནམ་མཁས་ས་གཞི་ལ་ལན་དང་།
[22] ས་གཞིས་འབྲུ་དང་རྒུན་ཆང་དང་འབྲུ་མར་ལ་ལན་དང་། དེ་དག་གིས་ཡེ་སི་རེ་ཨེལ་ལ་ལན་འདེབས་པར་བྱའོ།།
[23] ཡང་ངས་མོ་ནི་ཡུལ་གྱི་ནང་དུ་ས་བོན་ལྟར་འདེབས་ཤིང་། ལོ་རུ་ཧ་མ་དང་ཨ་མཱེ་ལ་སྙིང་རྗེ་གནང་སྟེ། ཁྱོད་ངའི་མི་བརྒྱུད་དོ་ཞེས་སྨྲ་བར་བྱ་སྟེ། ཡང་དེ་དག་གིས། ངའི་དཀོན་མཆོག་ལགས་ཞེས་ཞུ་བར་འགྱུར་རོ།།