[1] rab kī tamjīd meṅ nayā gīt gāo, kyūṅki us ne mojize kie haiṅ. apne dahne hāth aur muqaddas bāzū se us ne najāt dī hai.
[2] rab ne apnī najāt kā elān kiyā aur apnī rāstī qaumoṅ ke rū-ba-rū zāhir kī hai.
[3] us ne isrāīl ke lie apnī shafqat aur wafā yād kī hai. duniyā kī intihāoṅ ne sab hamāre ḳhudā kī najāt dekhī hai.
[4] ai pūrī duniyā, nāre lagā kar rab kī madahsarāī karo! āpe meṅ na samāo aur jashn manā kar hamd ke gīt gāo!
[5] sarod bajā kar rab kī madahsarāī karo, sarod aur gīt se us kī satāish karo.
[6] turam aur narsingā phūṅk kar rab bādshāh ke huzūr ḳhushī ke nāre lagāo!
[7] samundar aur jo kuchh us meṅ hai, duniyā aur us ke bāshinde ḳhushī se garaj uṭheṅ.
[8] daryā tāliyāṅ bajāeṅ, pahāṛ mil kar ḳhushī manāeṅ,
[9] wuh rab ke sāmne ḳhushī manāeṅ. kyūṅki wuh zamīn kī adālat karne ā rahā hai. wuh insāf se duniyā kī adālat karegā, rāstī se qaumoṅ kā faislā karegā.