[1] āo, ham shādiyānā bajā kar rab kī madahsarāī kareṅ, ḳhushī ke nāre lagā kar apnī najāt kī chaṭān kī tamjīd kareṅ!
[2] āo, ham shukrguzārī ke sāth us ke huzūr āeṅ, gīt gā kar us kī satāish kareṅ.
[3] kyūṅki rab azīm ḳhudā aur tamām mābūdoṅ par azīm bādshāh hai.
[4] us ke hāth meṅ zamīn kī gahrāiyāṅ haiṅ, aur pahāṛ kī bulandiyāṅ bhī usī kī haiṅ.
[5] samundar us kā hai, kyūṅki us ne use ḳhalaq kiyā. ḳhushkī us kī hai, kyūṅki us ke hāthoṅ ne use tashkīl diyā.
[6] āo ham sijdā kareṅ aur rab apne ḳhāliq ke sāmne jhuk kar ghuṭne ṭekeṅ.
[7] kyūṅki wuh hamārā ḳhudā hai aur ham us kī charāgāh kī qaum aur us ke hāth kī bheṛeṅ haiṅ. agar tum āj us kī āwāz suno
[8] “to apne diloṅ ko saḳht na karo jis tarah marībā meṅ huā, jis tarah registān meṅ massā meṅ huā.
[9] wahāṅ tumhāre bāpdādā ne mujhe āzmāyā aur jāṅchā, hālāṅki unhoṅ ne mere kām dekh lie the.
[10] chālīs sāl maiṅ us nasl se ghin khātā rahā. maiṅ bolā, ‘un ke dil hameshā sahīh rāh se haṭ jāte haiṅ, aur wuh merī rāheṅ nahīṅ jānte.’
[11] apne ġhazab meṅ maiṅ ne qasam khāī, ‘yih kabhī us mulk meṅ dāḳhil nahīṅ hoṅge jahāṅ maiṅ unheṅ sukūn detā’.”