[1] rab kī hamd ho! āsmān se rab kī satāish karo, bulandiyoṅ par us kī tamjīd karo!
[2] ai us ke tamām farishto, us kī hamd karo! ai us ke tamām lashkaro, us kī tārīf karo!
[3] ai sūraj aur chāṅd, us kī hamd karo! ai tamām chamakdār sitāro, us kī satāish karo!
[4] ai bulandtarīn āsmāno aur āsmān ke ūpar ke pānī, us kī hamd karo!
[5] wuh rab ke nām kī satāish kareṅ, kyūṅki us ne farmāyā to wuh wujūd meṅ āe.
[6] us ne nāqābil-e-mansūḳh farmān jārī karke unheṅ hameshā ke lie qāim kiyā hai.
[7] ai samundar ke azhdahāo aur tamām gahrāiyo, zamīn se rab kī tamjīd karo!
[8] ai āg, olo, barf, dhund aur us ke hukm par chalne wālī āṅdhiyo, us kī hamd karo!
[9] ai pahāṛo aur pahāṛiyo, phaldār daraḳhto aur tamām deodāro, us kī tārīf karo!
[10] ai janglī jānwaro, mawīshiyo, reṅgne wālī maḳhlūqāt aur parindo, us kī hamd karo!
[11] ai zamīn ke bādshāho aur tamām qaumo, sardāro aur zamīn ke tamām hukmrāno, us kī tamjīd karo!
[12] ai naujawāno aur kuṅwāriyo, buzurgo aur bachcho, us kī hamd karo!
[13] sab rab ke nām kī satāish kareṅ, kyūṅki sirf usī kā nām azīm hai, us kī azmat āsmān-o-zamīn se ālā hai.
[14] us ne apnī qaum ko sarfarāz karke apne tamām īmāndāroṅ kī shohrat baṛhāī hai, yānī isrāīliyoṅ kī shohrat, us qaum kī jo us ke qarīb rahtī hai. rab kī hamd ho!