[1] dāūd kā zabūr. hikmat kā yih gīt tārdār sāzoṅ ke sāth gānā hai. yih us waqt se mutālliq hai jab zīf ke bāshindoṅ ne sāūl ke pās jā kar kahā, “dāūd hamāre pās chhupā huā hai.” ai allāh, apne nām ke zarī'e se mujhe chhuṭkārā de! apnī qudrat ke zarī'e se merā insāf kar!
[2] ai allāh, merī iltijā sun, mere muṅh ke alfāz par dhyān de.
[3] kyūṅki pardesī mere ḳhilāf uṭh khaṛe hue haiṅ, zālim jo allāh kā lihāz nahīṅ karte merī jān lene ke darpai haiṅ. (silāh)
[4] lekin allāh merā sahārā hai, rab merī zindagī qāim rakhtā hai.
[5] wuh mere dushmanoṅ kī sharārat un par wāpas lāegā. chunāṅche apnī wafādārī dikhā kar unheṅ tabāh kar de!
[6] maiṅ tujhe razākārānā qurbānī pesh karūṅga. ai rab, maiṅ tere nām kī satāish karūṅga, kyūṅki wuh bhalā hai.
[7] kyūṅki us ne mujhe sārī musībat se rihāī dī, aur ab maiṅ apne dushmanoṅ kī shikast dekh kar ḳhush hūṅgā.