<zabūr 1

[1] mubārak hai wuh jo na bedīnoṅ ke mashware par chaltā, na gunāhgāroṅ kī rāh par qadam rakhtā, aur na tānāzanoṅ ke sāth baiṭhtā hai

[2] balki rab kī sharīat se lutfandoz hotā aur din rāt usī par ġhaur-o-ḳhauz kartā rahtā hai.

[3] wuh nahroṅ ke kināre par lage daraḳht kī mānind hai. waqt par wuh phal lātā, aur us ke patte nahīṅ murjhāte. jo kuchh bhī kare us meṅ wuh kāmyāb hai.

[4] bedīnoṅ kā yih hāl nahīṅ hotā. wuh bhūse kī mānind haiṅ jise hawā uṛā le jātī hai.

[5] is lie bedīn adālat meṅ qāim nahīṅ raheṅge, aur gunāhgār kā rāstbāzoṅ kī majlis meṅ maqām nahīṅ hogā.

[6] kyūṅki rab rāstbāzoṅ kī rāh kī pahrādārī kartā hai jabki bedīnoṅ kī rāh tabāh ho jāegī.