[1] dāūd kā zabūr. zamīn aur jo kuchh us par hai rab kā hai, duniyā aur us ke bāshinde usī ke haiṅ.
[2] kyūṅki us ne zamīn kī bunyād samundaroṅ par rakhī aur use daryāoṅ par qāim kiyā.
[3] kis ko rab ke pahāṛ par chaṛhnī kī ijāzat hai? kaun us ke muqaddas maqām meṅ khaṛā ho saktā hai?
[4] wuh jis ke hāth pāk aur dil sāf haiṅ, jo na fareb kā irādā rakhtā, na qasam khā kar jhūṭ boltā hai.
[5] wuh rab se barkat pāegā, use apnī najāt ke ḳhudā se rāstī milegī.
[6] yih hogā un logoṅ kā hāl jo allāh kī marzī daryāft karte, jo tere chehre ke tālib hote haiṅ, ai yāqūb ke ḳhudā. (silāh)
[7] ai phāṭako, khul jāo! ai qadīm darwāzo, pūre taur par khul jāo tāki jalāl kā bādshāh dāḳhil ho jāe.
[8] jalāl kā bādshāh kaun hai? rab jo qawī aur qādir hai, rab jo jang meṅ zor-āwar hai.
[9] ai phāṭako, khul jāo! ai qadīm darwāzo, pūre taur par khul jāo tāki jalāl kā bādshāh dāḳhil ho jāe.
[10] jalāl kā bādshāh kaun hai? rabb-ul-afwāj, wuhī jalāl kā bādshāh hai. (silāh)