[1] musībatzadā kī duā, us waqt jab wuh niḍhāl ho kar rab ke sāmne apnī āh-o-zārī unḍel detā hai. ai rab, merī duā sun! madad ke lie merī āheṅ tere huzūr pahuṅcheṅ.
[2] jab maiṅ musībat meṅ hūṅ to apnā chehrā mujh se chhupāe na rakh balki apnā kān merī taraf jhukā. jab maiṅ pukārūṅ to jald hī merī sun.
[3] kyūṅki mere din dhueṅ kī tarah ġhāib ho rahe haiṅ, merī haḍḍiyāṅ koeloṅ kī tarah dahak rahī haiṅ.
[4] merā dil ghās kī tarah jhulas kar sūkh gayā hai, aur maiṅ roṭī khānā bhī bhūl gayā hūṅ.
[5] āh-o-zārī karte karte merā jism sukaṛ gayā hai, jild aur haḍḍiyāṅ hī rah gaī haiṅ.
[6] maiṅ registān meṅ dashtī ullū aur khanḍarāt meṅ chhoṭe ullū kī mānind hūṅ.
[7] maiṅ bistar par jāgtā rahtā hūṅ, chhat par tanhā parinde kī mānind hūṅ.
[8] din bhar mere dushman mujhe lān-tān karte haiṅ. jo merā mazāq uṛāte haiṅ wuh merā nām le kar lānat karte haiṅ.
[9] rākh merī roṭī hai, aur jo kuchh pītā hūṅ us meṅ mere āṅsū mile hote haiṅ.
[10] kyūṅki mujh par terī lānat aur terā ġhazab nāzil huā hai. tū ne mujhe uṭhā kar zamīn par paṭaḳh diyā hai.
[11] mere din shām ke ḍhalne wāle sāy kī mānind haiṅ. maiṅ ghās kī tarah sūkh rahā hūṅ.
[12] lekin tū ai rab abad tak taḳhtnashīn hai, terā nām pusht-dar-pusht qāim rahtā hai.
[13] ab ā, koh-e-siyyūn par rahm kar. kyūṅki us par mehrbānī karne kā waqt ā gayā hai, muqarrarā waqt ā gayā hai.
[14] kyūṅki tere ḳhādimoṅ ko us kā ek ek patthar pyārā hai, aur wuh us ke malbe par tars khāte haiṅ.
[15] tab hī qaumeṅ rab ke nām se ḍareṅgī, aur duniyā ke tamām bādshāh tere jalāl kā ḳhauf khāeṅge.
[16] kyūṅki rab siyyūn ko az sar-e-nau tāmīr karegā, wuh apne pūre jalāl ke sāth zāhir ho jāegā.
[17] muflisoṅ kī duā par wuh dhyān degā aur un kī faryādoṅ ko haqīr nahīṅ jānegā.
[18] āne wālī nasl ke lie yih qalamband ho jāe tāki jo qaum abhī paidā nahīṅ huī wuh rab kī satāish kare.
[19] kyūṅki rab ne apne maqdis kī bulandiyoṅ se jhāṅkā hai, us ne āsmān se zamīn par nazar ḍālī hai
[20] tāki qaidiyoṅ kī āh-o-zārī sune aur marne wāloṅ kī zanjīreṅ khole.
[21] kyūṅki us kī marzī hai ki wuh koh-e-siyyūn par rab ke nām kā elān kareṅ aur yarūshalam meṅ us kī satāish kareṅ,
[22] ki qaumeṅ aur saltanateṅ mil kar jamā ho jāeṅ aur rab kī ibādat kareṅ.
[23] rāste meṅ hī allāh ne merī tāqat toṛ kar mere din muḳhtasar kar die haiṅ.
[24] maiṅ bolā, “ai mere ḳhudā, mujhe zindoṅ ke mulk se dūr na kar, merī zindagī to adhūrī rah gaī hai. lekin tere sāl pusht-dar-pusht qāim rahte haiṅ.
[25] tū ne qadīm zamāne meṅ zamīn kī bunyād rakhī, aur tere hī hāthoṅ ne āsmānoṅ ko banāyā.
[26] yih to tabāh ho jāeṅge, lekin tū qāim rahegā. yih sab kapṛe kī tarah ghis phaṭ jāeṅge. tū unheṅ purāne libās kī tarah badal degā, aur wuh jāte raheṅge.
[27] lekin tū wuhī kā wuhī rahtā hai, aur terī zindagī kabhī ḳhatm nahīṅ hotī.
[28] tere ḳhādimoṅ ke farzand tere huzūr baste raheṅge, aur un kī aulād tere sāmne qāim rahegī.”