[1] mubārak haiṅ wuh jin kā chāl-chalan be'ilzām hai, jo rab kī sharīat ke mutābiq zindagī guzārte haiṅ.
[2] mubārak haiṅ wuh jo us ke ahkām par amal karte aur pūre dil se us ke tālib rahte haiṅ,
[3] jo badī nahīṅ karte balki us kī rāhoṅ par chalte haiṅ.
[4] tū ne hameṅ apne ahkām die haiṅ, aur tū chāhtā hai ki ham har lihāz se un ke tābe raheṅ.
[5] kāsh merī rāheṅ itnī puḳhtā hoṅ ki maiṅ sābitqadmī se tere ahkām par amal karūṅ!
[6] tab maiṅ sharmindā nahīṅ hūṅgā, kyūṅki merī āṅkheṅ tere tamām ahkām par lagī raheṅgī.
[7] jitnā maiṅ tere bā-insāf faisloṅ ke bāre meṅ sīkhūṅgā utnā hī diyānatdār dil se terī satāish karūṅga.
[8] tere ahkām par maiṅ har waqt amal karūṅga. mujhe pūrī tarah tark na kar!
[9] naujawān apnī rāh ko kis tarah pāk rakhe? is tarah ki tere kalām ke mutābiq zindagī guzāre.
[10] maiṅ pūre dil se terā tālib rahā hūṅ. mujhe apne ahkām se bhaṭakne na de.
[11] maiṅ ne terā kalām apne dil meṅ mahfūz rakhā hai tāki terā gunāh na karūṅ.
[12] ai rab, terī hamd ho! mujhe apne ahkām sikhā.
[13] apne hoṅṭoṅ se maiṅ dūsroṅ ko tere muṅh kī tamām hidāyāt sunātā hūṅ.
[14] maiṅ tere ahkām kī rāh se utnā lutfandoz hotā hūṅ jitnā ki har tarah kī daulat se.
[15] maiṅ terī hidāyāt meṅ mahw-e-ḳhyāl rahūṅgā aur terī rāhoṅ ko taktā rahūṅgā.
[16] maiṅ tere farmānoṅ se lutfandoz hotā hūṅ aur terā kalām nahīṅ bhūltā.
[17] apne ḳhādim se bhalāī kar tāki maiṅ zindā rahūṅ aur tere kalām ke mutābiq zindagī guzārūṅ.
[18] merī āṅkhoṅ ko khol tāki terī sharīat ke ajāib dekhūṅ.
[19] duniyā meṅ maiṅ pardesī hī hūṅ. apne ahkām mujh se chhupāe na rakh!
[20] merī jān har waqt terī hidāyāt kī ārzū karte karte niḍhāl ho rahī hai.
[21] tū maġhrūroṅ ko ḍānṭtā hai. un par lānat jo tere ahkām se bhaṭak jāte haiṅ!
[22] mujhe logoṅ kī tauhīn aur tahqīr se rihāī de, kyūṅki maiṅ tere ahkām ke tābe rahā hūṅ.
[23] go buzurg mere ḳhilāf mansūbe bāndhne ke lie baiṭh gae haiṅ, terā ḳhādim tere ahkām meṅ mahw-e-ḳhyāl rahtā hai.
[24] tere ahkām se hī maiṅ lutf uṭhātā hūṅ, wuhī mere mushīr haiṅ.
[25] merī jān ḳhāk meṅ dab gaī hai. apne kalām ke mutābiq merī jān ko tāzādam kar.
[26] maiṅ ne apnī rāheṅ bayān kīṅ to tū ne merī sunī. mujhe apne ahkām sikhā.
[27] mujhe apne ahkām kī rāh samajhne ke qābil banā tāki tere ajāib meṅ mahw-e-ḳhyāl rahūṅ.
[28] merī jān dukh ke māre niḍhāl ho gaī hai. mujhe apne kalām ke mutābiq taqwiyat de.
[29] fareb kī rāh mujh se dūr rakh aur mujhe apnī sharīat se nawāz.
[30] maiṅ ne wafā kī rāh iḳhtiyār karke tere āīn apne sāmne rakhe haiṅ.
[31] maiṅ tere ahkām se lipṭā rahtā hūṅ. ai rab, mujhe sharmindā na hone de.
[32] maiṅ tere farmānoṅ kī rāh par dauṛtā hūṅ, kyūṅki tū ne mere dil ko kushādagī baḳhshī hai.
[33] ai rab, mujhe apne āīn kī rāh sikhā to maiṅ umr bhar un par amal karūṅga.
[34] mujhe samajh atā kar tāki terī sharīat ke mutābiq zindagī guzārūṅ aur pūre dil se us ke tābe rahūṅ.
[35] apne ahkām kī rāh par merī rāhnumāī kar, kyūṅki yihī maiṅ pasand kartā hūṅ.
[36] mere dil ko lālach meṅ āne na de balki use apne farmānoṅ kī taraf māil kar.
[37] merī āṅkhoṅ ko bātil chīzoṅ se pher le, aur mujhe apnī rāhoṅ par saṅbhāl kar merī jān ko tāzādam kar.
[38] jo wādā tū ne apne ḳhādim se kiyā wuh pūrā kar tāki log terā ḳhauf māneṅ.
[39] jis ruswāī se mujhe ḳhauf hai us kā ḳhatrā dūr kar, kyūṅki tere ahkām achchhe haiṅ.
[40] maiṅ terī hidāyāt kā shadīd ārzūmand hūṅ, apnī rāstī se merī jān ko tāzādam kar.
[41] ai rab, terī shafqat aur wuh najāt jis kā wādā tū ne kiyā hai mujh tak pahuṅche
[42] tāki maiṅ be'izzatī karne wāle ko jawāb de sakūṅ. kyūṅki maiṅ tere kalām par bharosā rakhtā hūṅ.
[43] mere muṅh se sachchāī kā kalām na chhīn, kyūṅki maiṅ tere farmānoṅ ke intizār meṅ hūṅ.
[44] maiṅ har waqt terī sharīat kī pairawī karūṅga, ab se abad tak us meṅ qāim rahūṅgā.
[45] maiṅ khule maidān meṅ chaltā phirūṅga, kyūṅki tere āīn kā tālib rahtā hūṅ.
[46] maiṅ sharm kie baġhair bādshāhoṅ ke sāmne tere ahkām bayān karūṅga.
[47] maiṅ tere farmānoṅ se lutfandoz hotā hūṅ, wuh mujhe pyāre haiṅ.
[48] maiṅ apne hāth tere farmānoṅ kī taraf uṭhāūṅgā, kyūṅki wuh mujhe pyāre haiṅ. maiṅ terī hidāyāt meṅ mahw-e-ḳhyāl rahūṅgā.
[49] us bāt kā ḳhayāl rakh jo tū ne apne ḳhādim se kī aur jis se tū ne mujhe ummīd dilāī hai.
[50] musībat meṅ yihī tasallī kā bāis rahā hai ki terā kalām merī jān ko tāzādam kartā hai.
[51] maġhrūr merā had se zyādā mazāq uṛāte haiṅ, lekin maiṅ terī sharīat se dūr nahīṅ hotā.
[52] ai rab, maiṅ tere qadīm farmān yād kartā hūṅ to mujhe tasallī miltī hai.
[53] bedīnoṅ ko dekh kar maiṅ āg-bagūlā ho jātā hūṅ, kyūṅki unhoṅ ne terī sharīat ko tark kiyā hai.
[54] jis ghar meṅ maiṅ pardesī hūṅ us meṅ maiṅ tere ahkām ke gīt gātā rahtā hūṅ.
[55] ai rab, rāt ko maiṅ terā nām yād kartā hūṅ, terī sharīat par amal kartā rahtā hūṅ.
[56] yih terī baḳhshish hai ki maiṅ tere āīn kī pairawī kartā hūṅ.
[57] rab merī mīrās hai. maiṅ ne tere farmānoṅ par amal karne kā wādā kiyā hai.
[58] maiṅ pūre dil se terī shafqat kā tālib rahā hūṅ. apne wāde ke mutābiq mujh par mehrbānī kar.
[59] maiṅ ne apnī rāhoṅ par dhyān de kar tere ahkām kī taraf qadam baṛhāe haiṅ.
[60] maiṅ nahīṅ jhijaktā balki bhāg kar tere ahkām par amal karne kī koshish kartā hūṅ.
[61] bedīnoṅ ke rassoṅ ne mujhe jakaṛ liyā hai, lekin maiṅ terī sharīat nahīṅ bhūltā.
[62] ādhī rāt ko maiṅ jāg uṭhtā hūṅ tāki tere rāst farmānoṅ ke lie terā shukr karūṅ.
[63] maiṅ un sab kā sāthī hūṅ jo terā ḳhauf mānte haiṅ, un sab kā dost jo terī hidāyāt par amal karte haiṅ.
[64] ai rab, duniyā terī shafqat se māmūr hai. mujhe apne ahkām sikhā!
[65] ai rab, tū ne apne kalām ke mutābiq apne ḳhādim se bhalāī kī hai.
[66] mujhe sahīh imtiyāz aur irfān sikhā, kyūṅki maiṅ tere ahkām par īmān rakhtā hūṅ.
[67] is se pahle ki mujhe past kiyā gayā maiṅ āwārā phirtā thā, lekin ab maiṅ tere kalām ke tābe rahtā hūṅ.
[68] tū bhalā hai aur bhalāī kartā hai. mujhe apne āīn sikhā!
[69] maġhrūroṅ ne jhūṭ bol kar mujh par kīchaṛ uchhālī hai, lekin maiṅ pūre dil se terī hidāyāt kī farmāṅbardārī kartā hūṅ.
[70] un ke dil akaṛ kar behiss ho gae haiṅ, lekin maiṅ terī sharīat se lutfandoz hotā hūṅ.
[71] mere lie achchhā thā ki mujhe past kiyā gayā, kyūṅki is tarah maiṅ ne tere ahkām sīkh lie.
[72] jo sharīat tere muṅh se sādir huī hai wuh mujhe sone-chāṅdī ke hazāroṅ sikkoṅ se zyādā pasand hai.
[73] tere hāthoṅ ne mujhe banā kar mazbūt bunyād par rakh diyā hai. mujhe samajh atā farmā tāki tere ahkām sīkh lūṅ.
[74] jo terā ḳhauf mānte haiṅ wuh mujhe dekh kar ḳhush ho jāeṅ, kyūṅki maiṅ tere kalām ke intizār meṅ rahtā hūṅ.
[75] ai rab, maiṅ ne jān liyā hai ki tere faisle rāst haiṅ. yih bhī terī wafādārī kā izhār hai ki tū ne mujhe past kiyā hai.
[76] terī shafqat mujhe tasallī de, jis tarah tū ne apne ḳhādim se wādā kiyā hai.
[77] mujh par apne rahm kā izhār kar tāki merī jān meṅ jān āe, kyūṅki maiṅ terī sharīat se lutfandoz hotā hūṅ.
[78] jo maġhrūr mujhe jhūṭ se past kar rahe haiṅ wuh sharmindā ho jāeṅ. lekin maiṅ tere farmānoṅ meṅ mahw-e-ḳhyāl rahūṅgā.
[79] kāsh jo terā ḳhauf mānte aur tere ahkām jānte haiṅ wuh mere pās wāpas āeṅ!
[80] merā dil tere āīn kī pairawī karne meṅ be'ilzām rahe tāki merī ruswāī na ho jāe.
[81] merī jān terī najāt kī ārzū karte karte niḍhāl ho rahī hai, maiṅ tere kalām ke intizār meṅ hūṅ.
[82] merī āṅkheṅ tere wāde kī rāh deḳhte deḳhte dhundlā rahī haiṅ. tū mujhe kab tasallī degā?
[83] maiṅ dhueṅ meṅ sukaṛī huī mashk kī mānind hūṅ lekin tere farmānoṅ ko nahīṅ bhūltā.
[84] tere ḳhādim ko mazīd kitnī der intizār karnā paṛegā? tū merā tāqqub karne wāloṅ kī adālat kab karegā?
[85] jo maġhrūr terī sharīat ke tābe nahīṅ hote unhoṅ ne mujhe phaṅsāne ke lie gaṛhe khod lie haiṅ.
[86] tere tamām ahkām purwafā haiṅ. merī madad kar, kyūṅki wuh jhūṭ kā sahārā le kar merā tāqqub kar rahe haiṅ.
[87] wuh mujhe rū-e-zamīn par se miṭāne ke qarīb hī haiṅ, lekin maiṅ ne tere āīn ko tark nahīṅ kiyā.
[88] apnī shafqat kā izhār karke merī jān ko tāzādam kar tāki tere muṅh ke farmānoṅ par amal karūṅ.
[89] ai rab, terā kalām abad tak āsmān par qāim-o-dāim hai.
[90] terī wafādārī pusht-dar-pusht rahtī hai. tū ne zamīn kī bunyād rakhī, aur wuh wahīṅ kī wahīṅ barqarār rahtī hai.
[91] āj tak āsmān-o-zamīn tere farmānoṅ ko pūrā karne ke lie hāzir rahte haiṅ, kyūṅki tamām chīzeṅ terī ḳhidmat karne ke lie banāī gaī haiṅ.
[92] agar terī sharīat merī ḳhushī na hotī to maiṅ apnī musībat meṅ halāk ho gayā hotā.
[93] maiṅ terī hidāyāt kabhī nahīṅ bhūlūṅgā, kyūṅki un hī ke zarī'e tū merī jān ko tāzādam kartā hai.
[94] maiṅ terā hī hūṅ, mujhe bachā! kyūṅki maiṅ tere ahkām kā tālib rahā hūṅ.
[95] bedīn merī tāk meṅ baiṭh gae haiṅ tāki mujhe mār ḍāleṅ, lekin maiṅ tere āīn par dhyān detā rahūṅgā.
[96] maiṅ ne dekhā hai ki har kāmil chīz kī had hotī hai, lekin tere farmān kī koī had nahīṅ hotī.
[97] terī sharīat mujhe kitnī pyārī hai! din bhar maiṅ us meṅ mahw-e-ḳhyāl rahtā hūṅ.
[98] terā farmān mujhe mere dushmanoṅ se zyādā dānishmand banā detā hai, kyūṅki wuh hameshā tak merā ḳhazānā hai.
[99] mujhe apne tamām ustādoṅ se zyādā samajh hāsil hai, kyūṅki maiṅ tere āīn meṅ mahw-e-ḳhyāl rahtā hūṅ.
[100] mujhe buzurgoṅ se zyādā samajh hāsil hai, kyūṅki maiṅ wafādārī se tere ahkām kī pairawī kartā hūṅ.
[101] maiṅ ne har burī rāh par qadam rakhne se gurez kiyā hai tāki tere kalām se lipṭā rahūṅ.
[102] maiṅ tere farmānoṅ se dūr nahīṅ huā, kyūṅki tū hī ne mujhe tālīm dī hai.
[103] terā kalām kitnā lazīz hai, wuh mere muṅh meṅ shahd se zyādā mīṭhā hai.
[104] tere ahkām se mujhe samajh hāsil hotī hai, is lie maiṅ jhūṭ kī har rāh se nafrat kartā hūṅ.
[105] terā kalām mere pāoṅ ke lie charāġh hai jo merī rāh ko raushan kartā hai.
[106] maiṅ ne qasam khāī hai ki tere rāst farmānoṅ kī pairawī karūṅga, aur maiṅ yih wādā pūrā bhī karūṅga.
[107] mujhe bahut past kiyā gayā hai. ai rab, apne kalām ke mutābiq merī jān ko tāzādam kar.
[108] ai rab, mere muṅh kī razākārānā qurbāniyoṅ ko pasand kar aur mujhe apne āīn sikhā!
[109] merī jān hameshā ḳhatre meṅ hai, lekin maiṅ terī sharīat nahīṅ bhūltā.
[110] bedīnoṅ ne mere lie phandā tayyār kar rakhā hai, lekin maiṅ tere farmānoṅ se nahīṅ bhaṭkā.
[111] tere ahkām merī abadī mīrās ban gae haiṅ, kyūṅki un se merā dil ḳhushī se uchhaltā hai.
[112] maiṅ ne apnā dil tere ahkām par amal karne kī taraf māil kiyā hai, kyūṅki is kā ajr abadī hai.
[113] maiṅ dodiloṅ se nafrat lekin terī sharīat se muhabbat kartā hūṅ.
[114] tū merī panāhgāh aur merī ḍhāl hai, maiṅ tere kalām ke intizār meṅ rahtā hūṅ.
[115] ai badkāro, mujh se dūr ho jāo, kyūṅki maiṅ apne ḳhudā ke ahkām se lipṭā rahūṅgā.
[116] apne farmān ke mutābiq mujhe saṅbhāl tāki zindā rahūṅ. merī ās ṭūṭne na de tāki sharmindā na ho jāūṅ.
[117] merā sahārā ban tāki bach kar har waqt tere āīn kā lihāz rakhūṅ.
[118] tū un sab ko radd kartā hai jo tere ahkām se bhaṭke phirte haiṅ, kyūṅki un kī dhokebāzī fareb hī hai.
[119] tū zamīn ke tamām bedīnoṅ ko nāpāk chāṅdī se ḳhārij kī huī mail kī tarah phaiṅk kar nest kar detā hai, is lie tere farmān mujhe pyāre haiṅ.
[120] merā jism tujh se dahshat khā kar thartharātā hai, aur maiṅ tere faisloṅ se ḍartā hūṅ.
[121] maiṅ ne rāst aur bā-insāf kām kiyā hai, chunāṅche mujhe un ke hawāle na kar jo mujh par zulm karte haiṅ.
[122] apne ḳhādim kī ḳhushhālī kā zāmin ban kar maġhrūroṅ ko mujh par zulm karne na de.
[123] merī āṅkheṅ terī najāt aur tere rāst wāde kī rāh deḳhte deḳhte rah gaī haiṅ.
[124] apne ḳhādim se terā sulūk terī shafqat ke mutābiq ho. mujhe apne ahkām sikhā.
[125] maiṅ terā hī ḳhādim hūṅ. mujhe fahm atā farmā tāki tere āīn kī pūrī samajh āe.
[126] ab waqt ā gayā hai ki rab qadam uṭhāe, kyūṅki logoṅ ne terī sharīat ko toṛ ḍālā hai.
[127] is lie maiṅ tere ahkām ko sone balki ḳhālis sone se zyādā pyār kartā hūṅ.
[128] is lie maiṅ ehtiyāt se tere tamām āīn ke mutābiq zindagī guzārtā hūṅ. maiṅ har farebdih rāh se nafrat kartā hūṅ.
[129] tere ahkām tājjubangez haiṅ, is lie merī jān un par amal kartī hai.
[130] tere kalām kā inkishāf raushnī baḳhshtā aur sādālauh ko samajh atā kartā hai.
[131] maiṅ tere farmānoṅ ke lie itnā pyāsā hūṅ ki muṅh khol kar hāṅp rahā hūṅ.
[132] merī taraf rujū farmā aur mujh par wuhī mehrbānī kar jo tū un sab par kartā hai jo tere nām se pyār karte haiṅ.
[133] apne kalām se mere qadam mazbūt kar, kisī bhī gunāh ko mujh par hukūmat na karne de.
[134] fidyā de kar mujhe insān ke zulm se chhuṭkārā de tāki maiṅ tere ahkām ke tābe rahūṅ.
[135] apne chehre kā nūr apne ḳhādim par chamkā aur mujhe apne ahkām sikhā.
[136] merī āṅkhoṅ se āṅsū'oṅ kī nadiyāṅ bah rahī haiṅ, kyūṅki log terī sharīat ke tābe nahīṅ rahte.
[137] ai rab, tū rāst hai, aur tere faisle durust haiṅ.
[138] tū ne rāstī aur baṛī wafādārī ke sāth apne farmān jārī kie haiṅ.
[139] merī jān ġhairat ke bāis tabāh ho gaī hai, kyūṅki mere dushman tere farmān bhūl gae haiṅ.
[140] terā kalām āzmā kar pāk-sāf sābit huā hai, terā ḳhādim use pyār kartā hai.
[141] mujhe zalīl aur haqīr jānā jātā hai, lekin maiṅ tere āīn nahīṅ bhūltā.
[142] terī rāstī abadī hai, aur terī sharīat sachchāī hai.
[143] musībat aur pareshānī mujh par ġhālib ā gaī haiṅ, lekin maiṅ tere ahkām se lutfandoz hotā hūṅ.
[144] tere ahkām abad tak rāst haiṅ. mujhe samajh atā farmā tāki maiṅ jītā rahūṅ.
[145] maiṅ pūre dil se pukārtā hūṅ, “ai rab, merī sun! maiṅ tere āīn ke mutābiq zindagī guzārūṅga.”
[146] maiṅ pukārtā hūṅ, “mujhe bachā! maiṅ tere ahkām kī pairawī karūṅga.”
[147] pau phaṭne se pahle pahle maiṅ uṭh kar madad ke lie pukārtā hūṅ. maiṅ tere kalām ke intizār meṅ hūṅ.
[148] rāt ke waqt hī merī āṅkheṅ khul jātī haiṅ tāki tere kalām par ġhaur-o-ḳhauz karūṅ.
[149] apnī shafqat ke mutābiq merī āwāz sun! ai rab, apne farmānoṅ ke mutābiq merī jān ko tāzādam kar.
[150] jo chālākī se merā tāqqub kar rahe haiṅ wuh qarīb pahuṅch gae haiṅ. lekin wuh terī sharīat se intihāī dūr haiṅ.
[151] ai rab, tū qarīb hī hai, aur tere ahkām sachchāī haiṅ.
[152] baṛī der pahle mujhe tere farmānoṅ se mālūm huā hai ki tū ne unheṅ hameshā ke lie qāim rakhā hai.
[153] merī musībat kā ḳhayāl karke mujhe bachā! kyūṅki maiṅ terī sharīat nahīṅ bhūltā.
[154] adālat meṅ mere haq meṅ laṛ kar merā iwazānā de tāki merī jān chhūṭ jāe. apne wāde ke mutābiq merī jān ko tāzādam kar.
[155] najāt bedīnoṅ se bahut dūr hai, kyūṅki wuh tere ahkām ke tālib nahīṅ hote.
[156] ai rab, tū muta'addid tarīqoṅ se apne rahm kā izhār kartā hai. apne āīn ke mutābiq merī jān ko tāzādam kar.
[157] merā tāqqub karne wāloṅ aur mere dushmanoṅ kī baṛī tādād hai, lekin maiṅ tere ahkām se dūr nahīṅ huā.
[158] bewafāoṅ ko dekh kar mujhe ghin ātī hai, kyūṅki wuh tere kalām ke mutābiq zindagī nahīṅ guzārte.
[159] dekh, mujhe tere ahkām se pyār hai. ai rab, apnī shafqat ke mutābiq merī jān ko tāzādam kar.
[160] tere kalām kā lubb-e-lubāb sachchāī hai, tere tamām rāst farmān abad tak qāim haiṅ.
[161] sardār bilāwajah merā pīchhā karte haiṅ, lekin merā dil tere kalām se hī ḍartā hai.
[162] maiṅ tere kalām kī ḳhushī us kī tarah manātā hūṅ jise kasrat kā māl-e-ġhanīmat mil gayā ho.
[163] maiṅ jhūṭ se nafrat kartā balki ghin khātā hūṅ, lekin terī sharīat mujhe pyārī hai.
[164] maiṅ din meṅ sāt bār terī satāish kartā hūṅ, kyūṅki tere ahkām rāst haiṅ.
[165] jinheṅ sharīat pyārī hai unheṅ baṛā sukūn hāsil hai, wuh kisī bhī chīz se ṭhokar khā kar nahīṅ gireṅge.
[166] ai rab, maiṅ terī najāt ke intizār meṅ rahte hue tere ahkām kī pairawī kartā hūṅ.
[167] merī jān tere farmānoṅ se lipṭī rahtī hai, wuh use nihāyat pyāre haiṅ.
[168] maiṅ tere āīn aur hidāyāt kī pairawī kartā hūṅ, kyūṅki merī tamām rāheṅ tere sāmne haiṅ.
[169] ai rab, merī āheṅ tere sāmne āeṅ, mujhe apne kalām ke mutābiq samajh atā farmā.
[170] merī iltijāeṅ tere sāmne āeṅ, mujhe apne kalām ke mutābiq chhuṛā!
[171] mere hoṅṭoṅ se hamd-o-sanā phūṭ nikle, kyūṅki tū mujhe apne ahkām sikhātā hai.
[172] merī zabān tere kalām kī madahsarāī kare, kyūṅki tere tamām farmān rāst haiṅ.
[173] terā hāth merī madad karne ke lie tayyār rahe, kyūṅki maiṅ ne tere ahkām iḳhtiyār kie haiṅ.
[174] ai rab, maiṅ terī najāt kā ārzūmand hūṅ, terī sharīat se lutfandoz hotā hūṅ.
[175] merī jān zindā rahe tāki terī satāish kar sake. tere āīn merī madad kareṅ.
[176] maiṅ bhaṭkī huī bheṛ kī tarah āwārā phir rahā hūṅ. apne ḳhādim ko talāsh kar, kyūṅki maiṅ tere ahkām nahīṅ bhūltā.