[1] وَ أَيُّوبْ شَالْ الْكَلَامْ وَ قَالْ:
[2] كَنْ يَقْدَرَوْا يَوْزُنُوا حِزْنِي وَ يُخُطُّوا كُلَّ دَمَارِي // فِي الْمِيزَانْ،
[3] دَا تَقِيلْ مِنْ رَمْلَةْ هَنَا خَشُمْ الْبَحَرْ، وَ فِي شَانْ دَا، كَلَامِي بِقِي // مَا عِنْدَهْ فَايْدَةْ.
[4] أَشَانْ نَشَاشِيبْ الْقَادِرْ طَعَنَوْنِي وَ نَفْسِي رِوَتْ سَمّ. وَ الْخَوْف الرَّسَّلَهْ الرَّبّ مِثِلْ دَيْش وَقَفْ ضِدِّي.
[5] هَلْ حُمَارْ الْكَدَادَةْ يِكَوِّكْ كَنْ قِدَّامَهْ فِي قَشّ وَلَّا؟ وَ التَّوْر يِكِرّ كَنْ قِدَّامَهْ فِي عَلْفَةْ وَلَّا؟
[6] الْمَاسِخْ بَلَا مِلِحْ يِسْتَاكَلْ وَلَّا؟ بَيَاضْ الْبَيْض طَاعِمْ وَلَّا؟
[7] لَا! قَلْبِي أَبَاهْ وَ قَبَّلَهْ أَشَانْ الشَّيّءْ دَا يِتَمِّمْنِي فِي قَلْبِي.
[8] يَاتُو يَقْبَلْ طَلَبِي؟ خَلِّي الرَّبّ يِحَقِّقْ مُنَايِ!
[9] خَلِّي الرَّبّ يَرْحَكْنِي وَ يَرْفَعْ إِيدَهْ مِنِّي وَ يِدَمِّرْنِي!
[10] وَ فِي تَعَبِي الْمَا عِنْدَهْ حَدّ، أَنَا نُنُطّ وَ نَفْرَحْ وَ نَلْقَى الصَّبُرْ أَشَانْ أَنَا مَا خَالَفْت كَلَامْ الْقُدُّوسْ!
[11] وَيْن الْقُدْرَةْ النَّصْبُرْ بَيْهَا زِيَادَةْ؟ وَ وَيْن نِهَايْتِي فِي طُولْ عُمْرِي؟
[12] هَلْ أَنَا قَوِي مِثِلْ حَجَرْ وَلَّا؟ وَ جِلْدِي قَوِي مِثِلْ نَحَاسْ وَلَّا؟
[13] أَنَا مَا عِنْدِي شَيّءْ الْيِسَاعِدْنِي وَ الْفَزَعْ بَعَّدْ مِنِّي.
[14] التَّعْبَانْ، وَاجِبْ رَفِيقَهْ يَرْحَمَهْ حَتَّى كَانْ التَّعْبَانْ دَا مَا يَخَافْ // مِنْ الْقَادِرْ كُلَ.
[15] رُفْقَانِي خَانَوْنِي مِثِلْ وُدْيَانْ الْأَلْمِيهُمْ كَمَّلْ وَ مِثِلْ مَجَارِي الْأَلْمِيهُمْ فَاتْ.
[16] فِي آخِرْ الشِّتَاءْ، الْبَرَدْ وَ التَّلَجْ يُمُوعُوا وَ الْوُدْيَانْ يِنْمَلُوا.
[17] فِي بِدَايَةْ الصَّيْف، أَلْمِيهُمْ يِكَمِّلْ وَ فِي الْحَمُو، هُمَّنْ يَيْبَسَوْا.
[18] الرُّحَّلْ يِقَبُّلُوا مِنْهُمْ وَ يَمْشُوا عَلَيْ الْكَدَادَةْ وَ يِوَدُّرُوا.
[19] الرُّحَّلْ مِنْ حِلَّةْ تِيمَا يِفَتُّشُوا الْوُدْيَانْ وَ الرُّحَّلْ مِنْ بَلَدْ سَبَأ يُخُطُّوا عَشَمْهُمْ فَوْقهُمْ.
[20] هُمَّنْ أَلْحَيَّرَوْا أَشَانْ أَتْوَكَّلَوْا عَلَيْ أَلْمِيهُمْ. وَ وَكِتْ وَصَّلَوْا، عَشَمْهُمْ أَنْقَطَعْ.
[21] يَا رُفْقَانِي، دَاهُو بِقِيتُوا مِثِلْ الْوُدْيَانْ دَوْل! إِنْتُو شِفْتُوا دَمَارِي وَ خُفْتُوا!
[22] أَنَا مَا قُلْت لَيْكُو: «أَنْطُونِي شَيّءْ!» وَ أَنَا مَا قُلْت لَيْكُو: «قَدُّمُوا لَيِّ هَدَايَا مِنْ مَالْكُو
[23] أَشَانْ تِنَجُّونِي مِنْ إِيدْ الْخَصِيمْ وَ تَفْدَوْنِي مِنْ إِيدْ الْمُجْرِمْ.»
[24] وَصُّونِي وَ أَنَا نَسْكُتْ وَ فَهُّمُونِي مِنْ وَيْن // أَنَا وَدَّرْت.
[25] كَلَامْ الصَّحِيحْ بَوْجَعْ وَ لَاكِنْ لُوَامِتْكُو مَا تَنْفَعْنِي.
[26] هَلْ أَشَّاوَرْتُوا لِتُلُومُونِي وَلَّا؟ وَ أَنَا الْمَا عِنْدِي عَشَمْ، تَجْعَلَوْا كَلَامِي مِثِلْ رِيحْ وَلَّا؟
[27] إِنْتُو! تِسَوُّوا أَمْ عِيَيْدَاتْ لِلْأَتِيمْ! لَحَدِّي رَفِيقْكُو كُلَ، تُخُطُّوهْ لِلْبَيْع!
[28] وَ هَسَّعْ، فَكُّرُوا فَوْقِي وَ وَجُّهُوا عَلَيِّ! شِيفُوا! هَلْ قِدَّامْكُو أَنَا نَكْدِبْ وَلَّا؟
[29] مِنْ فَضُلْكُو، قَبُّلُوا تَعَالُوا! مَا تَظُلْمُونِي! قَبُّلُوا تَعَالُوا! أَنَا دَايْماً صَالِحْ!
[30] هَلْ لِسَانِي يَنْطَقْ بِظُلُمْ وَلَّا؟ هَلْ أَنَا مَا نَفْهَمْ الدَّمَارْ وَلَّا؟