[1] وَ خَلَاصْ، أَلِفَازْ الْمِنْ بَلَدْ تَيْمَانْ شَالْ الْكَلَامْ وَ قَالْ:
[2] هَلْ كَنْ نَادُمْ حَاوَلْ يِكَلِّمْ لَيْك، إِنْتَ تِلْحَمَّلْ وَلَّا؟ وَ لَاكِنْ يَاتُو يَقْدَرْ يِوَقِّفْ كَلَامَهْ؟
[3] دَاهُو إِنْتَ أَدَّبْت نَاسْ كَتِيرِينْ وَ قَوَّيْت إِيدَيْ الضِّعْفَوْا
[4] وَ كَلَامَكْ لَزَمْ الْيِتَّرْتَعَوْا وَ قَوَّى رِكَبْ الْعِيَوْا.
[5] وَ وَكِتْ الْبَلَاءْ دَا جَاءْ لَيْك خَلَاصْ، صَبْرَكْ وَدَّرْ. وَ وَكِتْ لِحِقَكْ، إِنْتَ بَرْجَلْت.
[6] تَقْوَاكْ مَا ضَمَانْ لَيْك وَلَّا؟ وَ كَمَالَكْ مَا يَنْطِيكْ عَشَمْ وَلَّا؟
[7] مِنْ فَضْلَكْ، أَذَّكَّرْ. هَلْ سِمِعْت يَوْم وَاحِدْ بَرِي هِلِكْ؟ أَوْ صَالِحِينْ أَدَّمَّرَوْا؟
[8] أَنَا شِفْت الْيِتَيْرُبُوا الشَّرّ وَ الْيَزْرَعَوْا الْفَسَالَةْ، هُمَّنْ بَسْ يَلْقَوْا نَتِيجِتْهُمْ.
[9] بِنَفْخَةْ مِنْ الرَّبّ، يِدَّمَّرَوْا وَ بِرِيحْ غَضَبَهْ، يِكَمُّلُوا.
[10] الرَّبّ يِسَكِّتْ قَرْقَرَانْ الدُّودْ وَ حِسّ الْوُحُوشْ. وَ يِلْكَسَّرَوْا سُنُونْ عِيَالْ الدُّودْ.
[11] الدُّودْ يُمُوتْ مِنْ قِلَّةْ الْأَكِلْ وَ عِيَالْ الدُّودَايْ يِشِتُّوا.
[12] وَ جَاءْ لَيِّ كَلَامْ بِعَشِيرْ وَ أَدَانِي سِمْعَتْ الْمُخَالَةْ.
[13] وَكِتْ أَفْكَارْ الْبِخَوُّفُوا يَجُوا // مِنْ حِلِمْ اللَّيْل وَ وَكِتْ نَوْم شَدِيدْ كَرَبْ النَّاسْ،
[14] الْخَوْف وَ الرَّجَفَانْ كَرَبَوْنِي وَ عُضَامِي رَجَفَوْا زِيَادَةْ.
[15] وَ رِيحْ فَاتَتْ بِوِجْهِي وَ صُوفْ جِلْدِي قَمَّ.
[16] وَ نَادُمْ جَاءْ وَقَفْ قِدَّامِي وَ أَنَا مَا عِرِفْت شَكْلَهْ. وَ صُورْتَهْ قَاعِدَةْ قِدَّامْ عُيُونِي وَ بِهُدُوءْ، سِمِعْت حِسّ الْبُقُولْ:
[17] «بَنِي آدَم صَالِحْ زِيَادَةْ مِنْ الرَّبّ وَلَّا؟ وَ النَّادُمْ طَاهِرْ زِيَادَةْ مِنْ الْخَالِقْ وَلَّا؟
[18] الرَّبّ مَا يِآمِنْ خَدَّامِينَهْ أَيْوَى، يِشِيفْ مَلَائِكَتَهْ غَلْطَانِينْ.
[19] كَنْ مِثِلْ دَا، كِكَّيْف يِآمِنْ // بَنِي آدَم الْجِسِمْهُمْ مِثِلْ بُيُوتْ الطِّينَةْ؟ وَ كِكَّيْف يِآمِنْ الْخَلَقَاهُمْ مِنْ تُرَابْ وَ الْيِنْرَحْكُوا عَجَلَةْ مِنْ الْأَرْضَةْ؟
[20] مِنْ الْفَجُرْ لِلْعَشِيَّةْ، يِلْكَسَّرَوْا. مَا فِي الْيِفَكِّرْ فَوْقهُمْ وَ يِدَّمَّرَوْا إِلَى الْأَبَدْ.
[21] حُبَالْ خِيَمْهُمْ يَمُرْقُوهُمْ وَ هُمَّنْ يُمُوتُوا بَلَا حِكْمَةْ.»