[1] وَ شِفْت مَكْتُوبْ مَلْفُوفْ فِي إِيدْ الزَّيْنَةْ هَنَا الْقَاعِدْ فِي الْعَرْش وَ الْمَكْتُوبْ دَا عِنْدَهْ كِتَابَةْ دَاخَلْ وَ بَرَّا. وَ الْمَكْتُوبْ مَخْتُومْ بِسَبْعَةْ خِتِمْ.
[2] وَ شِفْت مَلَكْ قَادِرْ كَلَّمْ بِحِسّ شَدِيدْ وَ قَالْ: يَاتُو الْوَاجِبْ لَيَّهْ يُفُكّ الْخِتِمْ وَ يَفْتَحْ الْمَكْتُوبْ؟
[3] وَ فِي السَّمَاوَاتْ وَ فِي الْأَرْض وَ تِحِتْ الْأَرْض، مَا فِي نَادُمْ الْوَاجِبْ لَيَّهْ يِشِيلْ الْمَكْتُوبْ وَ يَفْتَحَهْ وَ يَقْرِي الْكَلَامْ الْقَاعِدْ فَوْقَهْ.
[4] وَ أَنَا بَكَيْت بَكِي شَدِيدْ أَشَانْ مَا فِي نَادُمْ الْوَاجِبْ لَيَّهْ يَفْتَحْ الْمَكْتُوبْ وَ يَقْرِي الْكَلَامْ الْقَاعِدْ فَوْقَهْ.
[5] وَ فِي الْبَكَانْ دَا، وَاحِدْ مِنْ الشُّيُوخْ حَجَّى لَيِّ وَ قَالْ: مَا تَبْكِي. شِيفْ، النَّادُمْ الْأُسْمَهْ دُودْ هَنَا قَبِيلَةْ يَهُوذَا قَاعِدْ. وَ هُو الْمَلِكْ الْمِنْ ذُرِّيَّةْ دَاوُدْ. وَ هُو بَسْ الْأَنَّصَرْ. وَ أَشَانْ دَا، وَاجِبْ لَيَّهْ هُو يُفُكّ السَّبْعَةْ خِتِمْ وَ يَفْتَحْ الْمَكْتُوبْ.
[6] وَ فِي الْبَكَانْ دَا، أَنَا شِفْت خَرُوفْ وَاقِفْ جَنْب الْعَرْش أَمْبَيْن الْأَرْبَعَةْ حَيْوَانَاتْ قِدَّامْ الشُّيُوخْ. وَ الْخَرُوفْ بِشَابِهْ مِثِلْ أَوَّلْ دَبَحَوْه. وَ عِنْدَهْ سَبْعَةْ قُرُونْ وَ سَبْعَةْ عُيُونْ الْيِمَثُّلُوا أَرْوَاحْ اللّٰهْ السَّبْعَةْ الْمُرَسَّلِينْ فِي كُلَّ الْأَرْض.
[7] وَ الْخَرُوفْ مَشَى لِلْقَاعِدْ فِي الْعَرْش وَ شَالْ الْمَكْتُوبْ مِنْ إِيدَهْ الزَّيْنَةْ.
[8] وَ وَكِتْ الْخَرُوفْ شَالْ الْمَكْتُوبْ الْأَرْبَعَةْ حَيْوَانَاتْ وَ الْأَرْبَعَةْ وَ عِشْرِينْ شُيُوخْ سَجَدَوْا قِدَّامَهْ. وَ أَيِّ وَاحِدْ عِنْدَهْ جِقِنْدِيَةْ وَ مُخْبَرْ هَنَا دَهَبْ وَ فَوْقَهْ بَخُورْ. وَ مَخَابِرْهُمْ دَوْل بِمَثُّلُوا صَلَاوَاتْ الصَّالِحِينْ.
[9] وَ غَنَّوْا غِنَيْء جَدِيدْ وَ دَاهُو غِنَيْهُمْ: إِنْتَ بَسْ الْوَاجِبْ تِشِيلْ الْمَكْتُوبْ وَ تُفُكّ خِتْمَهْ أَشَانْ إِنْتَ دَبَحَوْك وَ بِدَمَّكْ فَدَيْت النَّاسْ مِنْ أَيِّ قَبِيلَةْ وَ أَيِّ لُغَّةْ وَ مِنْ أَيِّ أُمَّةْ وَ مِنْ أَيِّ شَعَبْ. وَ فَدَيْتهُمْ أَشَانْ يَبْقَوْا شَعَبْ خَاصّ لِلّٰهْ.
[10] وَ إِنْتَ كَوَّنْتُهُمْ مَمْلَكَةْ وَ سَوَّيْتْهُمْ رُجَالْ دِينْ أَشَانْ يَعَبُدُوا اللّٰهْ. وَ هُمَّنْ يَحْكُمُوا فِي الْأَرْض.
[11] وَ بَتَّانْ أَنَا شِفْت وَ سِمِعْت حِسّ هَنَا مَلَائِكَةْ كَتِيرِينْ بِلْحَيْن وَ هُمَّنْ مُحَوِّقِينْ الْعَرْش وَ الْحَيْوَانَاتْ السَّمَاوِيَّةْ وَ الشُّيُوخْ. وَ عَدَدْهُمْ أُلُوفْ وَ مَلَايِينْ وَ زِيَادَةْ مِنْ دَا مَرَّةْ وَاحِدْ.
[12] وَ كَلَّمَوْا بِحِسّ شَدِيدْ وَ قَالَوْا: الْخَرُوفْ الدَّبَحَوْه وَاجِبْ لَيَّهْ هُو بَسْ الْقُدْرَةْ وَ الْمَالْ وَ الْعِلِمْ وَ الْقُوَّةْ وَ الْإِكْرَامْ وَ الْمَجْد وَ الشُّكُرْ.
[13] وَ أَنَا سِمِعْت حِسّ هَنَا كُلَّ الْمَخْلُوقِينْ الْعَايْشِينْ فِي السَّمَاوَاتْ وَ فِي الْأَرْض وَ تِحِتْ الْأَرْض وَ فِي الْبَحَرْ. وَ كُلُّهُمْ قَالَوْا: الشُّكُرْ وَ الْإِكْرَامْ وَ الْقُدْرَةْ الْمَجِيدَةْ وَ الْقُوَّةْ تَبْقَى دَايْماً وَ إِلَى الْأَبَدْ لِلْقَاعِدْ فِي الْعَرْش وَ لِلْخَرُوفْ. آمِينْ.
[14] وَ الْأَرْبَعَةْ حَيْوَانَاتْ قَالَوْا: آمِينْ! وَ الشُّيُوخْ سَجَدَوْا و عَبَدَوْه لِلْقَاعِدْ فِي الْعَرْش وَ لِلْخَرُوفْ.