[1] وَ بَعَدْ دَا، أَنَا سِمِعْت حَرَكَةْ شَدِيدَةْ فِي السَّمَاوَاتْ مِثِلْ حَرَكَةْ هَنَا نَاسْ كَتِيرِينْ بِلْحَيْن. وَ قَالَوْا: هَلَّيْلُويَا، الْحَمْدُ لِلّٰهْ. رَبِّنَا اللّٰهْ هُو الْقَادِرْ وَ الْمَجِيدْ وَ النَّجَاةْ تَجِي مِنَّهْ هُو بَسْ.
[2] حِسَابَهْ حَقّ وَ عَادِلْ. هُو حَاسَبْ الشَّرْمُوطَةْ الْكَبِيرَةْ الْفَسَدَتْ نَاسْ الْأَرْض بِزِنَاهَا. هِي دَفَّقَتْ دَمّ عَبِيدْ اللّٰهْ وَ اللّٰهْ جَازَاهَا خَلَاصْ.
[3] وَ بَتَّانْ عَاطَوْا: هَلَّيْلُويَا، الْحَمْدُ لِلّٰهْ! دُخَّانْ هَنَا النَّارْ الْأَكَلَتْهَا يَطْلَعْ إِلَى الْأَبَدْ.
[4] وَ الْأَرْبَعَةْ وَ عِشْرِينْ شُيُوخْ وَ الْأَرْبَعَةْ حَيْوَانَاتْ السَّمَاوِيَّةْ سَجَدَوْا قِدَّامْ اللّٰهْ الْقَاعِدْ فِي الْعَرْش وَ قَالَوْا: آمِينْ. هَلَّيْلُويَا، الْحَمْدُ لِلّٰهْ.
[5] وَ حِسّ مِنْ بَكَانْ الْعَرْش أَنْسَمَعْ وَ قَالْ: يَا عَبِيدْ اللّٰهْ، أَشْكُرُوا رَبِّنَا اللّٰهْ. أَيِّ نَادُمْ الْخَايِفْ مِنْ اللّٰهْ وَ يِتَابِعْ كَلَامَهْ بِحَالْ صَالِحَةْ مِنْ الصُّغَارْ لَحَدِّي الْكُبَارْ، خَلِّي يَشْكُرَهْ.
[6] وَ فِي الْبَكَانْ دَا، سِمِعْت حَرَكَةْ مِثِلْ حِسّ هَنَا نَاسْ كَتِيرِينْ مَرَّةْ وَاحِدْ. وَ حِسُّهُمْ مِثِلْ حَرَكَةْ هَنَا مَطَرَةْ شَدِيدَةْ بِلْحَيْن وَ مِثِلْ رَعَدْ شَدِيدْ وَ قَالَوْا: هَلَّيْلُويَا. رَبِّنَا اللّٰهْ الْقَادِرْ قَاعِدْ يَمْلُكْ.
[7] خَلِّي نَفْرَحَوْا وَ نِعَيِّدُوا وَ نِمَجُّدُوا اللّٰهْ أَشَانْ يَوْم هَنَا عِرِسْ الْخَرُوفْ تَمَّ. الْعَرُوسْ جَهَّزَتْ نَفِسْهَا.
[8] بِإِذِنْ اللّٰهْ هِي لِبْسَتْ خَلَقْ هَنَا كِتَّانْ أَصْلِي وَ هُو سَمَحْ بِلْحَيْن و بِرَارِي. وَ الْكِتَّانْ السَّمَحْ دَا يِمَثِّلْ حَسَنَاتْ الصَّالِحِينْ.
[9] وَ الْمَلَكْ حَجَّى لَيِّ وَ قَالْ: أَكْتِبْ «عِرِسْ هَنَا الْخَرُوفْ جَاءْ وَ مَبْرُوكْ لِكُلَّ الْمَعْزُومِينْ». وَ بَتَّانْ، حَجَّى لَيِّ وَ قَالْ: دَا كَلَامْ اللّٰهْ الصَّحِيحْ.
[10] وَ عَجَلَةْ كَيْ، أَنَا سَجَدْت قِدَّامْ رِجِلَيْنَهْ أَشَانْ نَعَبُدَهْ لِلْمَلَكْ وَ لَاكِنْ هُو قَالْ: لَا، مَا تَسْجُدْ لَيِّ أَنَا. أَعَبُدْ اللّٰهْ. أَنَا عَبِدْ مِثْلَكْ إِنْتَ وَ مِثِلْ أَخْوَانَكْ الْيِتَابُعُوا شَهَادَةْ عِيسَى. أَشَانْ شَهَادَةْ عِيسَى، هِي الْكَلَامْ الْيِنَزِّلَهْ الرُّوحْ الْقُدُّوسْ فَوْق الْأَنْبِيَاءْ.
[11] وَ فِي الْبَكَانْ دَا، أَنَا شِفْت السَّمَاءْ فَاتِحْ. وَ شِفْت جُوَادْ أَبْيَضْ. وَ الرَّاكِبْ فَوْقَهْ أُسْمَهْ الْأَمِينْ وَ الصَّادِقْ وَ هُو يِحَارِبْ عَدُوهْ وَ يَحْكِمْ النَّاسْ بِحَالْ صَالِحَةْ.
[12] وَ عُيُونَهْ مِثِلْ نار مُقَرْقِرَةْ وَ فِي رَاسَهْ عِنْدَهْ تِيجَانْ كَتِيرِينْ. وَ أُسُمْ وَاحِدْ مَكْتُوبْ فَوْقَهْ وَ الْأُسُمْ دَا، مَا فِي نَادُمْ يَعَرْفَهْ إِلَّا هُو بَسْ.
[13] وَ هُو لَابِسْ خَلَقْ مَلَانْ بِالدَّمّ وَ الْأُسُمْ الْبِنَادُوهْ بَيَّهْ، هُو كَلِمَةْ اللّٰهْ.
[14] وَ جُنُودْ السَّمَوَاتْ تَابَعَوْه. وَ هُمَّنْ لَابْسِينْ كِتَّانْ أَصْلِي وَ سَمَحْ وَ أَبْيَضْ كَرّ وَ رَاكْبِينْ فِي خَيْل بُيُضْ.
[15] وَ سَيْف مُطَرَّقْ مَارِقْ مِنْ خَشْمَهْ وَ يَضْرُبْ بَيَّهْ الْأُمَمْ. وَ هُو يَحْكِمْ فَوْقهُمْ بِإِيدْ قَوِيَّةْ مِثِلْ الْحَدِيدْ. هُو بَسْ الْيِفَجِّخْ الْعِنَبْ فِي الْبَكَانْ الْيِفَجُّخُوهْ فَوْقَهْ وَ مَعَنَاتَهْ هُو مَسْؤُولْ فِي بَكَانْ هَنَا غَضَبْ اللّٰهْ الْقَادِرْ.
[16] وَ عِنْدَهْ أُسُمْ مَكْتُوبْ فِي خَلَقَهْ وَ فِي دَارِجْتَهْ وَ الْأُسُمْ دَا، هُو مَلِكْ الْمُلُوكْ وَ سُلْطَانْ السَّلَاطِينْ.
[17] وَ فِي الْبَكَانْ دَا، شِفْت مَلَكْ وَاحِدْ وَاقِفْ فِي الْحَرَّايْ. وَ هُو نَادَى بِحِسّ شَدِيدْ لِكُلَّ الطُّيُورْ الطَّايِرْينْ فِي السَّمَاءْ وَ قَالْ: تَعَالُوا، لُمُّوا وَ آكُلُوا الْعَشَاءْ الْاللّٰهْ جَهَّزَهْ لَيْكُو.
[18] آكُلُوا لَحَمْ الْمُلُوكْ وَ لَحَمْ هَنَا كُبَارَاتْ الْعَسْكَرْ وَ لَحَمْ النَّاسْ الْقَادْرِينْ وَ لَحَمْ الْخَيْل وَ الرَّاكِبِينْ فَوْقهُمْ. أَيْوَى، آكُلُوا لَحَمْ هَنَا كُلَّ النَّاسْ مِنْ الْحُرِّينْ وَ الْعَبِيدْ وَ الصُّغَارْ وَ الْكُبَارْ.
[19] وَ شِفْت الْحَيْوَانْ الْفَسِلْ وَ مُلُوكْ الْأَرْض مَعَ عَسْكَرْهُمْ لَامِّينْ أَشَانْ يِحَارُبُوا الرَّاكِبْ فِي الْجُوَادْ الْأَبْيَضْ وَ عَسْكَرَهْ.
[20] وَ الْحَيْوَانْ غَلَبَوْه وَ كَرَبَوْه. وَ كَرَبَوْا مَعَايَهْ الْكَدَّابْ الْبُقُولْ هُو نَبِي الْأَوَّلْ سَوَّى عَجَايِبْ فِي قِدَّامَهْ. و الْعَجَايِبْ دَوْل، هُو سَوَّاهُمْ أَشَانْ يُغُشّ بَيْهُمْ النَّاسْ الْقِبَلَوْا عَلَامَةْ الْحَيْوَانْ الْفَسِلْ وَ سَجَدَوْا لِصَنَمَهْ. وَ رَمَّوْا الْحَيْوَانْ وَ الْكَدَّابْ حَيِّينْ فِي بَحَرْ هنا النَّارْ الْمُأَوْقِدَةْ بِكِبْرِيتْ أَصْفَرْ.
[21] وَ عَسْكَرْهُمْ كُلَ مَاتَوْا بِسَيْف هَنَا الرَّاكِبْ فِي الْجُوَادْ وَ دَا السَّيْف الْمَارِقْ مِنْ خَشْمَهْ. وَ كُلَّ الطُّيُورْ شِبْعَوْا مِنْ لَحَمْ الْمَيْتِينْ دَوْل.