[1] وَ فِي الْبَكَانْ دَا، شِفْت بَتَّانْ شَيْء آخَرْ. شِفْت مَلَكْ نَازِلْ مِنْ السَّمَاءْ وَ هُو قَادِرْ. وَ هُو لَابِسْ سَحَابَايْ مِثِلْ خَلَقْ وَ عِنْدَهْ حَجَّازْ الْمَطَرَةْ فِي رَاسَهْ. وَ وِجْهَهْ يِرَارِي مِثِلْ الْحَرَّايْ وَ رِجِلَيْنَهْ يِشَابُهُوا مِثِلْ عَمُودْ هَنَا النَّارْ.
[2] وَ عِنْدَهْ فِي إِيدَهْ مَكْتُوبْ صَغَيَّرْ وَ الْمَكْتُوبْ دَا فَاتِحْ. وَ خَطَّ رِجِلَهْ الزَّيْنَةْ فِي رَاسْ الْبَحَرْ وَ رِجِلَهْ الْإِسْرَةْ فِي التُّرَابْ.
[3] وَ حَجَّى بِحِسّ شَدِيدْ مِثِلْ قَرْقَرَانْ الدُّودْ. وَ وَكِتْ هُو حَجَّى، السَّبْعَةْ رَعَدْ كَلَّمَوْا.
[4] وَ وَكِتْ السَّبْعَةْ رَعَدْ دَوْل كَلَّمَوْا خَلَاصْ، أَنَا دَوَّرْت نَكْتِبْ كَلَامْهُمْ. لَاكِنْ سِمِعْت حِسّ مِنْ السَّمَاءْ قَالْ لَيِّ: مَا تِكَلِّمْ لِأَيِّ نَادُمْ بِالْكَلَامْ الْقَالَوْه السَّبْعَةْ رَعَدْ دَوْل. وَ مَا تَكْتِبَهْ.
[5] وَ الْمَلَكْ الشِّفْتَهْ الْوَاقِفْ رِجِلَهْ الْوَاحِدَةْ فِي الْبَحَرْ وَ رِجِلَهْ التَّانِيَةْ فِي التُّرَابْ رَفَعْ إِيدَهْ الزَيْنَهْ لِلسَّمَاءْ.
[6] وَ هُو حَلَفْ بِاللّٰهْ الْحَيّ إِلَى الْأَبَدْ، خَالِقْ السَّمَوَاتْ وَ الْأَرْض وَ كُلَّ شَيْء الْفَوْقهُمْ وَ الْبَحَرْ وَ كُلَّ شَيْء الْفَوْقَهْ. وَ قَالْ: الْوَكِتْ تَمَّ.
[7] وَ وَكِتْ الْمَلَكْ السَّابِعْ يَضْرُبْ الْبُرُنْجِي الْعِنْدَهْ، خَلَاصْ اللّٰهْ يِتِمّ الشَّيْء الْهُو قَدَّرَهْ الْهُو وِحَيْدَهْ يَعَرْفَهْ مِثِلْ أَوَّلْ كَلَّمْ بَيَّهْ لِعَبِيدَهْ الْأَنْبِيَاءْ.
[8] وَ فِي الْبَكَانْ دَا، الْحِسّ الْأَنَا سِمِعْتَهْ الْجَايِ مِنْ السَّمَاءْ كَلَّمْ لَيِّ بَتَّانْ وَ قَالْ: أَمْشِي شِيلْ الْمَكْتُوبْ الْقَاعِدْ فَاتِحْ فِي إِيدْ الْمَلَكْ الْوَاقِفْ رِجِلَهْ الْوَاحِدَةْ فِي الْبَحَرْ وَ رِجِلَهْ الْوَاحِدَةْ فِي التُّرَابْ.
[9] وَ خَلَاصْ، أَنَا مَشَيْت لِلْمَلَكْ وَ طَلَبْت مِنَّهْ الْمَكْتُوبْ الصَّغَيَّرْ. وَ هُو حَجَّى لَيِّ وَ قَالْ: شِيلَهْ وَ آكُلَهْ. وَ أَكِيدْ بَعْدَيْن قَلْبَكْ يَوْجَعَكْ وَ لَاكِنْ في الْأَوَّلْ يَبْقَى حَلُو مِثِلْ الْعَسَلْ فِي خَشْمَكْ.
[10] وَ أَنَا شِلْت الْمَكْتُوبْ الصَّغَيَّرْ مِنْ إِيدَهْ وَ أَكَلْتَهْ. وَ هُو حَلُو مِثِلْ الْعَسَلْ فِي خَشْمِي لَاكِنْ وَكِتْ زَرَطْتَهْ قَلْبِي وَجَعَانِي.
[11] وَ قَالَوْا لَيِّ: وَاجِبْ تِبَلِّغْ بَتَّانْ كَلَامْ اللّٰهْ الْبُخُصّ نَاسْ كَتِيرِينْ مِنْ الشُّعُوبْ وَ الْقَبَايِلْ وَ اللُّغَّاتْ وَ مُلُوكْهُمْ.