[1] وَ بَعَدْ دَا، أَنَا شِفْت شَيْء آخَرْ. أَنَا شِفْت بَابْ مَفْتُوحْ فِي السَّمَاءْ. وَ سِمِعْت بَتَّانْ نَفْس الْحِسّ الْأَوَّلْ سِمِعْتَهْ، الْحِسّ الْبِشَابِهْ مِثِلْ حِسّ بُرُنْجِي. وَ هُو حَجَّى لَيِّ وَ قَالْ: تَعَالْ لَيِّ هِنِي فَوْق وَ نِوَصِّفَكْ الشَّيْء اللَّابُدَّ يَبْقَى بَعَدَيْن.
[2] وَ عَجَلَةْ كَيْ، أَنَا فِي الرُّؤْيَا شِفْت الْعَرْش فِي السَّمَاوَاتْ وَ سِيدَهْ قَاعِدْ فَوْقَهْ.
[3] وَ الْقَاعِدْ فِي الْعَرْش دَا يِرَارِي مِثِلْ فَارُوسْ وَ عَقِيقْ أَحْمَرْ. وَ فِي شُغُلْ مُحَاوِقْ الْعَرْش مِثِلْ حَجَّازْ الْمَطَرَةْ الْبِرَارِي مِثِلْ يَاقُوتْ أَخَضَرْ.
[4] وَ أَنَا شِفْت أَرْبَعَةْ وَ عِشْرِينْ كَرَاسِي مُحَوِّقِينْ الْعَرْش دَا وَ أَرْبَعَةْ وَ عِشْرِينْ شُيُوخْ قَاعِدِينْ فَوْقهُمْ. وَ أَيِّ وَاحِدْ لَابِسْ خَلَقْ أَبْيَضْ وَ عِنْدَهْ تَاجْ هَنَا دَهَبْ فِي رَاسَهْ.
[5] وَ شِفْت بَرَّاقَةْ تِوَجْوِجْ فِي الْعَرْش وَ سِمِعْت حَرَكَةْ شَدِيدَةْ وَ رَعَدْ. وَ فِي قِدَّامْ الْعَرْش، شِفْت سَبْعَةْ عِيدَانْ مُقَرْقَرِين نَارْ وَ هُمَّنْ بِمَثُّلُوا أَرْوَاحْ اللّٰهْ السَّبْعَةْ.
[6] وَ بَتَّانْ قِدَّامْ الْعَرْش، شِفْت بَكَانْ وَسِيعْ بِشَابِهْ مِثِلْ بَحَرْ هَنَا أَلْمِي صَافِي مَرَّةْ وَاحِدْ لَحَدِّي قَعَرَهْ بِنْشَافْ. وَ شِفْت أَرْبَعَةْ حَيْوَانَاتْ سَمَاوِيَّةْ مُحَوِّقِينْ الْعَرْش مِنْ كُلَّ جِيهَةْ. وَ جِلِدْهُمْ مَلَانْ بِعُيُونْ مِنْ وَرَاءْ وَ مِنْ قِدَّامْ.
[7] وَ الْأَوَّلَانِي مِنْهُمْ بِشَابِهْ مِثِلْ دُودْ وَ التَّانِي مِثِلْ تَوْر وَ التَّالِتْ عِنْدَهْ وِجِهْ مِثِلْ وِجِهْ الْإِنْسَانْ وَ الرَّابِعْ بِشَابِهْ مِثِلْ صَقُرْ كَبِيرْ قَاعِدْ يِطِيرْ.
[8] وَ أَيِّ وَاحِدْ مِنْ الْأَرْبَعَةْ حَيْوَانَاتْ السَّمَاوِيَّةْ دَوْل عِنْدَهْ سِتَّةْ جَنَاحَيْن مَلَانِينْ بِعُيُونْ مِنْ فَوْق وَ مِنْ تِحِتْ. وَ قَاعِدِينْ بِغَنُّوا دَايْماً لَيْل وَ نَهَارْ وَ أَبَداً مَا خَلَّوْا غِنَيْهُمْ. وَ قَاعِدِينْ بُقُولُوا: قُدُّوسْ، قُدُّوسْ، اللّٰهْ الرَّبّ الْقَادِرْ الْقَاعِدْ فِي الْوَكِتْ الْفَاتْ وَ الْوَكِتْ الْحَالِي وَ الْوَكِتْ الْجَايِ، هُو الْقُدُّوسْ.
[9] وَ الْحَيْوَانَاتْ دَوْل قَاعِدِينْ يِمَجُّدُوا الْقَاعِدْ فِي الْعَرْش وَ هُو الْحَيّ إِلَى الْأَبَدْ. وَ هُمَّنْ قَاعِدِينْ يَحْمُدُوهْ وَ يَشْكُرُوهْ. وَ أَيِّ وَكِتْ يِمَجُّدُوهْ مِثِلْ دَا،
[10] الشُّيُوخْ الْأَرْبَعَةْ وَ عِشْرِينْ يَسْجُدُوا قِدَّامْ الْقَاعِدْ فِي الْعَرْش وَ يَعَبُدُوا الْحَيّ إِلَى الْأَبَدْ. وَ أَيِّ وَاحِدْ يَرْمِي تَاجَهْ قِدَّامْ الْعَرْش وَ يُقُولْ:
[11] يَا رَبِّنَا اللّٰهْ، كُلَّ شَيْء هَنَا الْمَجْد وَ الْإِكْرَامْ وَ الْقُدْرَةْ وَاجِبْ لَيْك إِنْتَ أَشَانْ إِنْتَ بَسْ خَلَقْت كُلَّ شَيْء وَ بِمُرَادَاتَكْ إِنْتَ بَسْ، كُلَّ شَيْء بِقِي وَ قَاعِدْ.