[1] وَ بِلَاطُسْ وَدَّى عِيسَى دَاخَلْ وَ أَمَرْ عَسْكَرَهْ أَشَانْ يَجْلُدُوهْ.
[2] وَ وَكِتْ جَلَدَوْه خَلَاصْ، الْعَسْكَرْ سَوَّوْا لَيَّهْ تَاجْ مِنْ الشَّوْك وَ خَطَّوْه فِي رَاسَهْ وَ لَبَّسَوْه بِخَلَقْ لَوْنَهْ قَرَدِي مِثِلْ خَلَقْ هَنَا مَلِكْ.
[3] وَ قَمَّوْا يَجُوا قِدَّامَهْ وَ يُقُولُوا «سَلَامْ عَلَيْك، يَا مَلِكْ الْيَهُودْ» وَ يُدُقُّوهْ أَمْ كُفُوفْ.
[4] وَ بِلَاطُسْ مَرَقْ بَتَّانْ. وَ حَجَّى لِلنَّاسْ وَ قَالْ: شِيفُوهْ، نَمُرْقَهْ لَيْكُو أَشَانْ تَعَرْفُوا مَا لِقِيتْ فَوْقَهْ جَرِيمَةْ.
[5] وَ عِيسَى مَرَقْ لَابِسْ التَّاجْ السَّوَّوْه مِنْ الشَّوْك وَ الْخَلَقْ الْقَرَدِي. وَ بِلَاطُسْ حَجَّى لَيْهُمْ وَ قَالْ: دَاهُو الرَّاجِلْ.
[6] وَ كُبَارَاتْ رُجَالْ الدِّينْ وَ خَدَّامِينْهُمْ شَافَوْه وَ عَوَّوْا فَوْقَهْ وَ قَالَوْا: أَكْتُلُوهْ فِي صَلِيبْ! أَكْتُلُوهْ فِي الصَّلِيبْ! وَ بِلَاطُسْ قَالْ: إِنْتُو بَسْ شِيلُوهْ وَ أَكْتُلُوهْ فِي الصَّلِيبْ. كَانْ لَيِّ أَنَا، مَا لِقِيتْ فَوْقَهْ خَطَأْ.
[7] وَ لَاكِنْ الْيَهُودْ رَدَّوْا لَيَّهْ وَ قَالَوْا: عِنْدِنَا قَانُونْ وَ حَسَبْ الْقَانُونْ دَا، هُو لَازِمْ يُمُوتْ أَشَانْ هُو سَوَّى نَفْسَهْ إِبْن اللّٰهْ.
[8] وَ وَكِتْ بِلَاطُسْ سِمِعْ الْكَلَامْ دَا، خَوْف شَدِيدْ كَرَبَهْ بِزِيَادَةْ.
[9] وَ هُو قَبَّلْ فِي بَيْت الْحَكُومَةْ وَ سَأَلْ عِيسَى وَ قَالْ: إِنْتَ جِيتْ مِنْ وَيْن؟ وَ لَاكِنْ عِيسَى مَا رَدَّ لَيَّهْ كَلَامْ.
[10] وَ أَشَانْ دَا، بِلَاطُسْ قَالْ: مَا تِدَوْر تِحَجِّي لَيِّ وَلَّا؟ مَا فِهِمْت عِنْدِي سُلْطَةْ فَوْقَكْ وَ أَنَا نَقْدَرْ نَطْلِقَكْ أَوْ نَكْتُلَكْ فِي الصَّلِيبْ وَلَّا؟
[11] وَ عِيسَى رَدَّ لَيَّهْ وَ قَالْ: مَا عِنْدَكْ سُلْطَةْ فَوْقِي إِلَّا كَانْ أَوَّلْ اللّٰهْ أَنْطَاكْ الْفُرْصَةْ. وَ أَشَانْ دَا، هُو السَّلَّمَانِي لَيْك هُو خَاطِي مِنَّكْ زِيَادَةْ.
[12] وَكِتْ بِلَاطُسْ سِمِعْ الْكَلَامْ دَا، هُو دَوَّرْ يَطْلِقْ عِيسَى لَاكِنْ الْيَهُودْ رَدَّوْا لَيَّهْ بِحِسّ شَدِيدْ وَ قَالَوْا: كَانْ تَطْلِقْ النَّادُمْ دَا، سُلْطَانْ الرَّوْمَانِيِينْ مَا يِرِيدَكْ. كَانْ نَادُمْ يِسَوِّي نَفْسَهْ مَلِكْ، هُو يِسَوِّي نَفْسَهْ عَدُو لِسُلْطَانْ الرَّوْمَانِيِينْ.
[13] وَكِتْ بِلَاطُسْ سِمِعْ الْكَلَامْ دَا، هُو مَرَقْ عِيسَى وَ قَعَدْ تِحِتْ فِي كُرْسِي الْوَالِي الْفِي الْبَكَانْ الْأُسْمَهْ سَاحَةْ الْحُجَارْ وَ بِكَلَامْ الْيَهُودْ أُسْمَهْ جَبَّاثَةْ.
[14] وَ الْيَوْم دَا، جُمْعَةْ هَنَا عِيدْ الْفِصْحَةْ وَ الْوَطَى قَايْلَةْ. وَ بِلَاطُسْ حَجَّى لِلْيَهُودْ وَ قَالْ شِيفُوهْ، دَاهُو مَلِكُّو.
[15] وَ عَوَّوْا فَوْقَهْ وَ قَالَوْا: شِيلَهْ، أَكْتُلَهْ! أَكْتُلَهْ فِي الصَّلِيبْ! وَ بِلَاطُسْ سَأَلَاهُمْ وَ قَالْ: تِدَوْرُوا أَنَا نَكْتُلْ مَلِكُّو فِي صَلِيبْ وَلَّا؟ وَ كُبَارَاتْ رُجَالْ الدِّينْ رَدَّوْا لَيَّهْ وَ قَالَوْا: مَا عِنْدِنَا مَلِكْ إِلَّا سُلْطَانْ الرَّوْمَانِيِّينْ.
[16] وَ خَلَاصْ، بِلَاطُسْ سَلَّمْ عِيسَى لِلْعَسْكَرْ أَشَانْ يَكْتُلُوهْ فِي صَلِيبْ. وَ قَمَّوْا شَالَوْه.
[17] وَ عِيسَى مَرَقْ شَايِلْ الصَّلِيبْ الدَّوَّرَوْا يَكْتُلُوهْ فَوْقَهْ وَ وَدَّوْه فِي بَكَانْ وَاحِدْ أُسْمَهْ بَكَانْ الْجُمْجُمَةْ، وَ بِكَلَامْ عِبْرَانِي أُسْمَهْ جُلْجُثَةْ.
[18] وَ فِي الْبَكَانْ دَا، خَطَّوْا عِيسَى فِي الصَّلِيبْ وَ صَلَبَوْا مَعَايَهْ نَاسَيْن، وَاحِدْ فِي نُصَّهْ الزَّيْنَايْ وَ وَاحِدْ فِي نُصَّهْ الْإِسْرَايْ وَ هُو فِي أُسُطْهُمْ.
[19] وَ بِلَاطُسْ كَتَبْ فِي لَوْح وَاحِدْ وَ عَلَّقَهْ فَوْق فِي رَاسْ الصَّلِيبْ. وَ كَلَامْ الْمَكْتُوبْ فَوْقَهْ بُقُولْ «عِيسَى مِنْ النَّاصِرَةْ مَلِكْ الْيَهُودْ».
[20] وَ صَلَبَوْا عِيسَى قَرِيبْ لِلْمَدِينَةْ و أَشَانْ دَا، يَهُودْ كَتِيرِينْ قَرَوْا الْكَلَامْ مَكْتُوبْ دَا. وَ كَتَبَوْه بِكَلَامْ عِبْرَانِي وَ كَلَامْ لَاتِينِي وَ كَلَامْ يُونَانِي.
[21] وَ كُبَارَاتْ رُجَالْ الدِّينْ حَجَّوْا لِبِلَاطُسْ وَ قَالَوْا: مَا تَكْتِبْ مَلِكْ الْيَهُودْ. أَكْتِبْ النَّادُمْ دَا قَالْ هُو مَلِكْ الْيَهُودْ.
[22] وَ بِلَاطُسْ رَدَّ لَيْهُمْ وَ قَالْ: الْكَلَامْ الْكَتَبْتَهْ مَا نِغَيِّرَهْ.
[23] وَكِتْ الْعَسَاكِرْ الْأَرْبَعَةْ صَلَبَوْا عِيسَى خَلَاصْ، هُمَّنْ شَالَوْا خُلْقُانَهْ وَ قَسَّمَوْهُمْ أَمْبَيْنَاتْهُمْ وَ جَوَانِيتَهْ بَسْ فَضَّلَتْ. وَ الْجَوَانِيَةْ هِي كُلَّهَا كَيْ مَطْرُورَةْ مَا وَ عِنْدَهَا خَيَاطَةْ.
[24] وَ أَشَانْ دَا، حَجَّوْا أَمْبَيْنَاتْهُمْ وَ قَالَوْا: مَا نِشَرُّطُوهَا. نِسَوُّوا أَمْ عِيَيْدَاتْ وَ النَّادُمْ الْجَاتَهْ فِي قِسْمَهْ يِشِيلْهَا. وَ بِمِثِلْ دَا، كَلَامْ الْكِتَابْ تَمَّ الْبُقُولْ <هُمَّنْ قَسَّمَوْا خُلْقَانِي أَمْبَيْنَاتْهُمْ وَ سَوَّوْا أَمْ عِيَيْدَاتْ لِلُبَاسِي>. وَ دَا بَسْ الشَّيْء السَّوَّوْه الْعَسْكَرْ.
[25] وَ فِيَهْ عَوِينْ وَاقْفَاتْ قَرِيبْ لِلصَّلِيبْ الْعِيسَى قَاعِدْ فَوْقَهْ. وَ هِنَّ أَمَّهْ مَرِيَمْ وَ خَالْتَهْ وَ مَرِيَمْ مَرَةْ كُلُوبَا وَ مَرِيَمْ الْمَجْدَلِيَّةْ.
[26] وَ عِيسَى شَافْ أَمَّهْ وَ شَافْ التِّلْمِيذْ الْهُو يِرِيدَهْ بِلْحَيْن وَاقِفْ قَرِيبْ لَيْهَا. وَ حَجَّى لِأَمَّهْ وَ قَالْ: مَرَةْ زَيْنَةْ شِيفِيهْ، دَا وِلَيْدكِ.
[27] وَ حَجَّى لِتِلْمِيذَهْ وَ قَالْ: شِيفْهَا، دِي أَمَّكْ. وَ التِّلْمِيذْ وَدَّاهَا فِي بَيْتَهْ وَ مِنْ الْيَوْم دَا، هِي سَكَنَتْ مَعَايَهْ.
[28] وَ عِيسَى عِرِفْ كُلَّ شَيْء كَمَّلْ. وَ هُو حَجَّى بَتَّانْ أَشَانْ الْكَلَامْ الْمَكْتُوبْ فِي سَبَبَهْ فِي الْكِتَابْ يِتِمّ. وَ هُو قَالْ: أَنَا عَطْشَانْ.
[29] فِي الْبَكَانْ دَا، فِيَهْ كَوْرَوْ هَنَا خَلّ حَامُضْ وَ بَلَّوْا سَوْسَوْ فِي الْخَلّ وَ خَطَوْه فِي رَاسْ عَقَيْقْ هَنَا زُوفَا وَ رَفَعَوْه فَوْق قَرِيبْ لِخَشْمَهْ.
[30] وَ عِيسَى شِرِبْ مِنْ الْخَلّ وَ قَالْ: تَمَّ خَلَاصْ. وَ دَنْقَرْ رَاسَهْ وَ خَلَّى رُوحَهْ تُفُوتْ.
[31] وَ دَا الْيَوْم الْيِحَصُّلُوا فَوْقَهْ خُمَامْ هَنَا يَوْم السَّبِتْ. وَ أَمْبَاكِرْ يَوْم كَبِيرْ فِي الْعِيدْ. وَ الْيَهُودْ دَوَّرَوْا الْجَنَازَاتْ مَا يَقْعُدُوا فِي الصَّلَبَانْ يَوْم السَّبِتْ. وَ أَشَانْ دَا، طَلَبَوْا مِنْ بِلَاطُسْ يِكَسُّرُوا رِجِلَيْن الْمَصْلُوبِينْ أَشَانْ يُمُوتُوا عَجَلَةْ وَ خَلَاصْ الْجَنَازَاتْ يِدَلُّوهُمْ.
[32] وَ الْعَسْكَرْ جَوْا لِأَوَّلْ نَادُمْ الصَّلَبَوْه مَعَ عِيسَى وَ كَسَّرَوْا رِجِلَيْنَهْ وَ سَوَّوْا نَفْس الشَّيْء لِلتَّانِي.
[33] وَ لَاكِنْ وَكِتْ جَوْا لِعِيسَى، شَافَوْا هُو مَيِّتْ خَلَاصْ. وَ أَشَانْ دَا مَا كَسَّرَوْا رِجِلَيْنَهْ.
[34] لَاكِنْ عَسْكَرِي وَاحِدْ تَعَنْ فِي نَايْتَهْ بِحَرْبَةْ وَ طَوَّالِي كَيْ دَفَّقْ مِنَّهْ دَمّ وَ أَلْمِي.
[35] الشَّافَهْ بِعَيْنَهْ شَاهِدْ لَيَّهْ وَ شَهَادْتَهْ صَحِيحَةْ وَ هُو يَعَرِفْ كَلَامَهْ صَحِيحْ وَ هُو يَشْهَدْ أَشَانْ إِنْتُو كُلَ تِآمُنُوا.
[36] وَ الشَّيْء دَا بِقِي أَشَانْ كَلَامْ الْمَكْتُوبْ فِي الْكِتَابْ يِتِمّ. بُقُولْ <مَا يِكَسُّرُوا عَضُمْ وَاحِدْ مِنْ عُضَامَهْ>.
[37] وَ الْكِتَابْ كُلَ بُقُولْ <يُقُمُّوا يِشِيفُوا النَّادُمْ التَّعَنَوْه>.
[38] وَ بَعَدْ دَا، يُوسُفْ مِنْ حِلَّةْ الرَّامَةْ مَشَى لِبِلَاطُسْ وَ طَلَبْ مِنَّهْ جَنَازَةْ عِيسَى. هُو تِلْمِيذْ هَنَا عِيسَى لَاكِنْ وَ قَاعِدْ يِتَابِعَهْ بِسِرّ أَشَانْ هُو خَايِفْ مِنْ الْيَهُودْ. وَ بِلَاطُسْ أَنْطَاهْ إِذِنْ. وَ يُوسُفْ مَشَى شَالْ الْجَنَازَةْ.
[39] وَ نِقُدِيمُسْ النَّادُمْ الْيَوْم وَاحِدْ مَشَى حَجَّى مَعَ عِيسَى بِاللَّيْل، مَشَى مَعَايَهْ وَ جَابْ تَلَاتِينْ كِيلَوْ هَنَا الدِّهِنْ الْعِنْدَهْ فِيهَا صِبِر وَ رِيحَةْ أُسُمْهَا عُودْ.
[40] وَ شَالَوْا جَنَازَةْ عِيسَى وَ بَلَّوْا قَبَقْ طَوِيلْ فِي الدِّهِنْ وَ لَفَّوْا بَيَّهْ جِسْمَهْ. وَ بِمِثِلْ دَا كَفَنَوْه فِي عَادَةْ الْيَهُودْ.
[41] وَ فِيَهْ جِنَيْنَةْ قَرِيبْ لِلْبَكَانْ الْكَتَلَوْا عِيسَى فَوْقَهْ. وَ فِي الْجِّنَيْنَةْ قَبُرْ جَدِيدْ قَاعِدْ وَ لِسَّاعْ مَا دَفَنَوْا فَوْقَهْ نَادُمْ.
[42] الْقَبُرْ دَا قَرِيبْ. وَ الْيَوْم الْيَهُودْ يِحَصُّلُوا فَوْقَهْ خُمَامْ يَوْم السَّبِتْ قَرِيبْ يِكَمِّلْ. وَ أَشَانْ دَا، دَفَنَوْا عِيسَى فِي الْبَكَانْ دَا.