[1] وَ وَكِتْ عِيسَى كَمَّلْ الدُّعَاءْ دَا، هُو قَمَّ مَعَ تَلَامِيذَهْ وَ قَطَعَوْا وَادِي قِدْرُونْ. وَ جَوْا لِجِنَيْنَةْ وَاحِدَةْ وَ دَخَلَوْا فِيهَا.
[2] وَ يَهُوذَا النَّادُمْ الْخَانْ عِيسَى كُلَ عِرِفْ الْبَكَانْ أَشَانْ عِيسَى لَمَّ فَوْقهَا مَعَ تَلَامِيذَهْ عِدَّةْ مَرَّاتْ.
[3] وَ يَهُوذَا جَاءْ لِلْجِنَيْنَةْ بِعَسْكَرْ رَوْمَانِيِّينْ وَ بِنَاسْ مُرَسَّلِينْ مِنْ كُبَارَاتْ رُجَالْ الدِّينْ وَ الْفَرِيسِيِّينْ. وَ هُمَّنْ مُسَلَّحِينْ وَ شَايْلِينْ فَوَانِيسْ وَ عِيدَانْ بِضَاوُوا بَيْهُمْ.
[4] وَ عِيسَى عِرِفْ كُلَّ شَيْء الْيَبْقَى فَوْقَهْ وَ مَشَى لَيْهُمْ وَ قَالْ: تِفَتُّشُوا يَاتُو؟
[5] وَ رَدَّوْا لَيَّهْ وَ قَالَوْا: نِفَتُّشُوا عِيسَى مِنْ حِلَّةْ النَّاصِرَةْ. وَ عِيسَى قَالْ: أَنَا بَسْ هُو. وَ يَهُوذَا الْخَايِنْ قَاعِدْ فِي أُسُطْهُمْ.
[6] وَ وَكِتْ عِيسَى قَالْ «أَنَا بَسْ هُو» هُمَّنْ كَسَّوْا مِنَّهْ وَرَاءْ وَ وَقَعَوْا فِي التُّرَابْ.
[7] وَ مَرَّةْ تَانِيَةْ هُو سَأَلَاهُمْ وَ قَالْ: تِفَتُّشُوا يَاتُو؟ وَ قَالَوْا: عِيسَى مِنْ حِلَّةْ النَّاصِرَةْ.
[8] وَ عِيسَى رَدَّ لَيْهُمْ وَ قَالْ: أَوَّلْ أَوْرَيْتكُو أَنَا بَسْ هُو. وَ خَلَاصْ كَانْ تِدَوْرُونِي، خَلُّوا النَّاسْ الْمَعَايِ يَمْشُوا.
[9] وَ هُو قَالْ الْكَلَامْ دَا، أَشَانْ الْكَلَامْ الْقَالَهْ مِنْ أَوَّلْ يِتِمّ. أَوَّلْ هُو قَالْ «مِنْ النَّاسْ الْإِنْتَ أَنْطَيْتنِي، مَا فِي نَادُمْ وَدَّرْ».
[10] وَ سِمْعَانْ بُطْرُسْ عِنْدَهْ سَيْف وَ سَلَّهْ وَ ضَرَبْ بَيَّهْ عَبِدْ هَنَا كَبِيرْ رُجَالْ الدِّينْ وَ قَطَعْ أَدَانَهْ الزَّيْنَةْ. وَ أُسُمْ الْعَبِدْ دَا مَلْخُسْ.
[11] وَ عِيسَى حَجَّى لِبُطْرُسْ وَ قَالْ: دَخِّلْ سَيْفَكْ فِي بَيْتَهْ. كِكَّيْف مَا نَشْرَبْ مِنْ كَاسْ التَّعَبْ الْأَبُوِي أَنْطَانِي؟
[12] وَ الْعَسْكَرْ مَعَ كَبِيرْهُمْ وَ النَّاسْ الْمُرَسَّلِينْ مِنْ كُبَارَاتْ الْيَهُودْ كَرَبَوْا عِيسَى وَ رَبَّطَوْه.
[13] وَ أَوَّلْ شَيْء، وَدَّوْه لِحَنَانْ وَ هُو نَسِيبَهْ أَبُو مَرْتَهْ لِقَيَافَا كَبِيرْ رُجَالْ الدِّينْ فِي السَّنَةْ دِي.
[14] وَ قَيَافَا دَا، هُو بَسْ النَّادُمْ الْقَالْ لِكُبَارَاتْ الْيَهُودْ أَخَيْر لَيْهُمْ كَانْ نَادُمْ وَاحِدْ يُمُوتْ لِفَايْدَةْ الشَّعَبْ.
[15] وَ سِمْعَانْ بُطْرُسْ وَ تِلْمِيذْ آخَرْ مَشَوْا وَرَاءْ عِيسَى. وَ التِّلْمِيذْ الْآخَرْ مَعْرُوفْ لِكَبِيرْ رُجَالْ الدِّينْ وَ أَشَانْ دَا، قِدِرْ دَخَلْ فِي حَوْش الْبَيْت مَعَ عِيسَى.
[16] وَ بُطْرُسْ وِقِفْ بَرَّا فِي خَشُمْ الْبَيْت. وَ التِّلْمِيذْ الْمَعْرُوفْ لِكَبِيرْ رُجَالْ الدِّينْ مَرَقْ لِلْخَدَّامَةْ الْمَسْؤُولَةْ فِي الْبَابْ وَ حَجَّى لَيْهَا وَ وَدَّى بُطْرُسْ دَاخَلْ.
[17] وَ الْخَدَّامَةْ سَأَلَتَهْ لِبُطْرُسْ وَ قَالَتْ: إِنْتَ كُلَ تِلْمِيذْ هَنَا الرَّاجِلْ دَا؟ وَ بُطْرُسْ قَالْ: لَا، لَا.
[18] الْوَطَى بَارْدَةْ وَ الْخَدَّامِينْ وَ الْحَرَسْ أَوْقَدَوْا نَارْ فِي كَانُونْ أَشَانْ يِدَّفَّوْا فِي النَّارْ. وَ بُطْرُسْ قَاعِدْ يِدَّفَّا مَعَاهُمْ.
[19] وَ كَبِيرْ رُجَالْ الدِّينْ قَمَّ سَأَلْ عِيسَى مِنْ تَلَامِيذَهْ وَ مِنْ تَعَالِيمَهْ.
[20] وَ عِيسَى رَدَّ لَيَّهْ وَ قَالْ: أَنَا حَجَّيْت كَلَامْ وَاضِحْ قِدَّامْ كُلَّ النَّاسْ. مِنْ الْأَوَّلْ عَلِّمْت النَّاسْ فِي بُيُوتْ الصَّلَاةْ وَ فِي بَيْت اللّٰهْ وَ فِي الْبَكَانَاتْ الْكُلَّ الْيَهُودْ يِلِمُّوا فَوْقهُمْ. مَا قُلْت شَيْء بِأَشِيرْ.
[21] مَالَا تَسْأَلْنِي؟ النَّاسْ السِّمْعَوْا كَلَامِي أَسْأَلْهُمْ مِنْ الْكَلَامْ الْأَنَا قُلْتَهْ لَيْهُمْ. هُمَّنْ بَعَرْفُوا الْكَلَامْ الْأَنَا قُلْتَهْ.
[22] وَ وَكِتْ قَالْ الْكَلَامْ دَا، وَاحِدْ مِنْ الْحَرَسْ الْوَاقْفِينْ جَنْبَهْ شَدَّقَهْ وَ قَالْ: كِكَّيْف تُرُدّ لِكَبِيرْ رُجَالْ الدِّينْ بِمِثِلْ دَا؟
[23] وَ عِيسَى رَدَّ لَيَّهْ وَ قَالْ: كَانْ كَلَامِي كِدِبْ، أَشْهَدْ فَوْق الْكِدِبْ. لَاكِنْ كَانْ كَلَامِي صَحِيحْ، مَالَكْ ضَرَبْتِنِي؟
[24] وَ حَنَانْ وَدَّى عِيسَى مُرَبَّطْ كَيْ لِقَيَافَا كَبِيرْ رُجَالْ الدِّينْ.
[25] وَ سِمْعَانْ بُطْرُسْ وَاقِفْ يِدَّفَّا فِي النَّارْ. وَ قَالَوْا لَيَّهْ: إِنْتَ مَا تِلْمِيذَهْ؟ وَ هُو نَكَرْ وَ قَالْ: لَا، أَنَا مَا تِلْمِيذَهْ.
[26] وَ وَاحِدْ مِنْ خَدَّامِينْ هَنَا كَبِيرْ رُجَالْ الدِّينْ حَجَّى لَيَّهْ. وَ هُو أَخُو هَنَا النَّادُمْ الْبُطْرُسْ قَطَعْ أَدَانَهْ. وَ سَأَلْ بُطْرُسْ وَ قَالْ: أَنَا مَا شِفْتَكْ مَعَايَهْ فِي الْجِنَيْنَةْ وَلَّا؟
[27] وَ بُطْرُسْ نَكَرْ بَتَّانْ وَ طَوَّالِي كَيْ الدِّيكْ عَوْعَى.
[28] وَ مَرَقَوْا عِيسَى مِنْ بَيْت قَيَافَا وَ وَدَّوْه فِي بَيْت الْحَكُومَةْ. الْوَطَى بِقَتْ فَجُرْ. الْكُبَارَاتْ ذَاتْهُمْ مَا دَخَلَوْا فِي بَيْت هَنَا الْوَالِي الرَّوْمَانِي أَشَانْ دَا يَوْم الْعِيدْ. وَ كَانْ دَخَلَوْا فِي بَيْت نَادُمْ مَا يَهُودِي، يِتَلُّفُوا طِهَارِتْهُمْ وَ مَا يَقْدَرَوْا يَاكُلُوا عَشَاءْ الْفِصْحَةْ.
[29] وَ أَشَانْ دَا، بِلَاطُسْ الْوَالِي مَرَقْ لَيْهُمْ وَ قَالْ: شُنُو التُّهْمَةْ الْخَطَّيْتُوهَا فَوْق النَّادُمْ دَا؟
[30] وَ رَدَّوْا لَيَّهْ وَ قَالَوْا: النَّادُمْ دَا كَانْ مَا مُجْرِمْ، مَا نِسَلُّمُوهْ لَيْك.
[31] وَ بِلَاطُسْ قَالْ: شِيلُوهْ وَ شَارُعُوهْ حَسَبْ قَانُونْكُو. وَ الْيَهُودْ قَالَوْا: قَانُونَكْ مَا يَسْمَحْ لَيْنَا أَشَانْ نَحْكُمُوا أَيِّ نَادُمْ بِالْمَوْت.
[32] وَ بِمِثِلْ دَا، الْكَلَامْ الْعِيسَى قَالَهْ فِي كَيْفِيَّةْ هَنَا مَوْتَهْ بَدَأْ يَبْقَى.
[33] وَ بِلَاطُسْ قَبَّلْ فِي بَيْت الْحَكُومَةْ وَ نَادَى عِيسَى. وَ سَأَلَهْ وَ قَالْ: إِنْتَ مَلِكْ الْيَهُودْ وَلَّا؟
[34] وَ عِيسَى رَدَّ لَيَّهْ وَ قَالْ: السُّؤَالْ دَا، سُؤَالَكْ وَلَّا سُؤَالْ هَنَا نَاسْ آخَرِينْ؟
[35] وَ بِلَاطُسْ رَدَّ لَيَّهْ وَ قَالْ: هَايْ! أَنَا يَهُودِي وَلَّا؟ قَبِيلْتَكْ إِنْتَ بَسْ وَ كُبَارَاتْ الرُّجَالْ الدِّينْ سَلَّمَوْك لَيِّ. شُنُو الشَّيْء الْإِنْتَ سَوَّيْتَهْ؟
[36] عِيسَى رَدَّ لَيَّهْ وَ قَالْ: مَمْلَكَتِي مَا مَمْلَكَةْ هَنَا الدُّنْيَا. كَانْ مَمْلَكَتِي هَنَا الدُّنْيَا، خَدَّامِينِي يُقُمُّوا يِدَاوُسُوا أَشَانْ الْيَهُودْ مَا يَكُرْبُونِي. وَ لَاكِنْ مُلْكِي مَا جَايِ مِنْ الدُّنْيَا.
[37] وَ بِلَاطُسْ قَالْ: هَـا! إِنْتَ مَلِكْ؟ وَ عِيسَى رَدَّ لَيَّهْ وَ قَالْ: إِنْتَ قُلْت أَنَا مَلِكْ. وَ بِالصَّحِيحْ، دَاهُو السَّبَبْ الْأَنَا مَوْلُودْ وَ جِيتْ فِي الدُّنْيَا، أَشَانْ نَشْهَدْ لِلْحَقّ. أَيِّ نَادُمْ الْيِرِيدْ الْحَقّ يَسْمَعْ كَلَامِي.
[38] وَ بِلَاطُسْ قَالْ: شُنُو الْحَقّ؟ وَ وَكِتْ قَالْ الْكَلَامْ دَا، بِلَاطُسْ مَرَقْ لِلْيَهُودْ وَ قَالْ لَيْهُمْ: أَنَا مَا لِقِيتْ فَوْق النَّادُمْ دَا أَيِّ جَرِيمَةْ.
[39] لَاكِنْ فِي عَادِتْكُو وَاجِبْ نَطْلِقْ مَكْرُوبْ وَاحِدْ فِي عِيدْ الْفِصْحَةْ. تِدَوْرُوا نَطْلِقْ لَيْكُو مَلِكْ الْيَهُودْ وَلَّا؟
[40] وَ بِحِسّ شَدِيدْ قَالَوْا: لَا، مَا هُو. أَطْلِقْ لَيْنَا بَرَابَاسْ. وَ بَرَابَاسْ هُو مُجْرِمْ وَ ثَاوْرِي.