[1] وَ أَنَا نُرُدّ لَيْكُو فِي الشَّيْء الْبُخُصّ اللَّحَمْ الْقَدَّمَوْه ضَحِيَّةْ لِلْأَصْنَامْ. الْكَلَامْ الْإِنْتُو قُلْتُوا «أَنِحْنَ الْمُؤْمِنِينْ كُلِّنَا عِنْدِنَا عِلِمْ»، دَا مَعْرُوفْ. لَاكِنْ نُقُولْ لَيْكُو الْعِلِمْ يِسَبِّبْ الْإِسْتِكْبَارْ وَ الْمَحَبَّةْ بَسْ تِقَوِّي الْأُخُوَّةْ.
[2] كَانْ نَادُمْ بُقُولْ هُو عَارِفْ هُو لِسَّاعْ مَا عِرِفْ مِثِلْ هُو وَاجِبْ يَعَرِفْ.
[3] لَاكِنْ كَانْ نَادُمْ يِحِبّ اللّٰهْ، النَّادُمْ دَا اللّٰهْ عَارْفَهْ.
[4] وَ فِي الشَّيْء الْبُخُصّ أَكِلْ اللَّحَمْ الدَّبَحَوْه ضَحِيَّةْ لِلْأَصْنَامْ، أَكِيدْ أَنِحْنَ نَعَرْفُوا كَدَرْ «الصَّنَمْ هُو يِمَثِّلْ شَيْء الْأَبَداً مَا مَوْجُودْ». وَ نَعَرْفُوا كَدَرْ «مَا فِي إِلٰهْ إِلَّا اللّٰهْ الْوَاحِدْ».
[5] وَ أَكِيدْ، النَّاسْ بُقُولُوا فِي إِلَهَاتْ فِي السَّمَاوَاتْ وَ الْأَرْض. وَ بِالصَّحِيحْ، النَّاسْ بُقُولُوا فِي إِلَهَاتْ وَ أَرْبَابْ كَتِيرِينْ.
[6] وَ لَاكِنْ لَيْنَا أَنِحْنَ الْمُؤْمِنِينْ، اللّٰهْ وَاحِدْ بَسْ قَاعِدْ وَ هُو أَبُونَا الْخَلَقْ كُلَّ شَيْء وَ أَنِحْنَ مَوْجُودِينْ لَيَّهْ هُو. وَ رَبّ وَاحِدْ بَسْ قَاعِدْ وَ هُو عِيسَى الْمَسِيحْ وَ بَيَّهْ هُو كُلَّ شَيْء قَاعِدْ وَ بَيَّهْ هُو أَنِحْنَ حَيِّينْ.
[7] لَاكِنْ نَاسْ وَاحِدِينْ مَا كَرَبَوْا الْعِلِمْ دَا عَدِيلْ. وَ أَخْوَانْ وَاحِدِينْ فِي عَادِتْهُمْ قُبَّالْ مَا آمَنَوْا قَاعِدِينْ يَعَبُدُوا الْأَصْنَامْ. وَ فِي فِكِرْهُمْ، كَانْ يَاكُلُوا اللَّحَمْ دَا، يِشَارُكُوا بَتَّانْ فِي الْعِبَادَةْ دِي. وَ كَانْ أَكَلَوْا، الْعَيْب يِسَوِّيهُمْ أَشَانْ فِكِرْهُمْ فِي الْإِيمَانْ لِسَّاعْ مَا قَوِي.
[8] وَ صَحِيحْ، الْأَكِلْ مَا يِزِيدْ لَيْنَا رِضَاءْ اللّٰهْ. كَانْ مَا نَاكُلُوهْ، مَا نَخْسُرُوا شَيْء قِدَّامْ اللّٰهْ. وَ كَانْ نَاكُلُوهْ كَمَانْ، مَا نَلْقَوْا مِنَّهْ فَايْدَةْ قِدَّامْ اللّٰهْ.
[9] لَاكِنْ أَوْعُوا بَالْكُو أَشَانْ الْحُرِّيَّةْ التِّرِيدُوهَا دِي مَا تَمُرْقَهْ مِنْ الدَّرِبْ لِلْمُؤْمِنْ الْإِيمَانَهْ مَا قَوِي.
[10] أَشَانْ إِنْتَ تُقُولْ إِنْتَ نَادُمْ عَالِمْ وَ كَانْ نَادُمْ إِيمَانَهْ مَا قَوِي يِشِيفَكْ إِنْتَ قَاعِدْ تَاكُلْ فِي بَيْت الْأَصْنَامْ، أَكُونْ هُو كُلَ يَاكُلْ اللَّحَمْ الْقَدَّمَوْه لِلْأَصْنَامْ وَ خَلَاصْ، الْعَيْب يَكُرْبَهْ.
[11] وَ مِثِلْ دَا، إِنْتَ تَابَعْت عِلْمَكْ وَ تَلَّفْت بَيَّهْ أَخُوكْ الرَّبِّنَا الْمَسِيحْ مَاتْ فِي شَانَهْ.
[12] وَ بَيْدَا، إِنْتُو خِطِيتُوا فِي أَخْوَانْكُو وَ جِبْتُوا الْعَيْب فِي الْأَخْوَانْ الْإِيمَانْهُمْ مَا قَوِي وَ خَلَاصْ خِطِيتُوا فِي الْمَسِيحْ.
[13] أَشَانْ دَا، كَانْ اللَّحَمْ النَّاكُلَهْ يَمْرُقْ أَخُوِي مِنْ الدَّرِبْ، أَنَا أَبَداً مَا نَاكُلْ اللَّحَمْ بَتَّانْ أَشَانْ مَا نِدَوْر أَخُوِي يَمْرُقْ مِنْ الدَّرِبْ بِسَبَبِي أَنَا.