[1] جَوَابْ مِنِّي أَنَا بُولُسْ الْاللّٰهْ نَادَانِي أَشَانْ نَبْقَى بِإِذْنَهْ رَسُولْ هَنَا عِيسَى الْمَسِيحْ. وَ دَاهُو نَكْتِبْ لَيْكُو مَعَ أَخُونَا سُوسْتَانْ.
[2] وَ أَنِحْنَ نِسَلُّمُوكُو إِنْتُو أُمَّةْ الْمَسِيحْ الْاللّٰهْ إِخْتَارَاكُو الْقَاعِدِينْ فِي حِلَّةْ كُرُنْتُسْ، إِنْتُو الْبِقِيتُوا نَاسْ خَاصِّينْ لِلّٰهْ بِعَلَاقِتْكُو مَعَ الْمَسِيحْ عِيسَى. اللّٰهْ نَادَاكُو فِي دَرْبَهْ أَشَانْ تَبْقَوْا صَالِحِينْ سَوَا مَعَ كُلَّ النَّاسْ الْيَدْعُوا فِي أَيِّ بَكَانْ بِأُسُمْ رَبِّنَا عِيسَى الْمَسِيحْ وَ هُو رَبُّهُمْ و رَبِّنَا.
[3] عَلَيْكُمْ السَّلَامْ وَ الرَّحْمَةْ مِنْ اللّٰهْ أَبُونَا وَ رَبِّنَا عِيسَى الْمَسِيحْ.
[4] نَشْكُرْ اللّٰهْ دَايْماً فِي شَانْكُو وَ فِي شَانْ النِّعْمَةْ الْهُو أَنْطَاكُو بِعَلَاقِتْكُو مَعَ الْمَسِيحْ عِيسَى.
[5] و بِعَلَاقِتْكُو مَعَايَهْ اللّٰهْ بَارَكَاكُو وَ سَوَّاكُو غَنِيِينْ بِالْكَلَامْ وَ كُلَّ الْعِلِمْ.
[6] وَ مِثِلْ دَا، اللّٰهْ ثَبَّتْ أَمْبَيْنَاتْكُو شَهَادِتْنَا الشِّهِدْنَا بَيْهَا لِلْمَسِيحْ.
[7] وَ في شَانْ دَا بَسْ، مَا فِي أَيِّ بَرَكَةْ مِنْ بَرَكَاتْ هَنَا الرُّوحْ الْقُدُّوسْ الْقَصَّرَتْ لَيْكُو إِنْتُو الْقَاعِدِينْ تَرْجَوْا الْيَوْم الْاللّٰهْ يِبَيِّنْ فَوْقَهْ رَبِّنَا عِيسَى الْمَسِيحْ.
[8] الْمَسِيحْ يَحْفَضْكُو لَحَدِّي الْآخِرَةْ. أَشَانْ دَا، فِي يَوْم هَنَا جَيَّةْ رَبِّنَا عِيسَى الْمَسِيحْ تُكُونُوا بَلَا عَيْب.
[9] اللّٰهْ هُو صَادِقْ وَ يِسَوِّي لَيْكُو كُلَّ شَيْء الْهُو قَالَهْ. وَ هُو بَسْ النَّادَاكُو أَشَانْ تَدْخُلُوا فِي الْعَلَاقَةْ الْعِنْدُكُو مَعَ إِبْنَهْ عِيسَى الْمَسِيحْ رَبِّنَا.
[10] يَا أَخْوَانِي، أَنَا نِوَصِّيكُو بِأُسُمْ رَبِّنَا عِيسَى الْمَسِيحْ أَشَانْ كَلَامْكُو يَبْقَى وَاحِدْ لَحَدِّي فُرْقَةْ كَيْ أَمْبَيْنَاتْكُو مَا تَبْقَى. خَلِّي قَلِبْكُو يَبْقَى وَاحِدْ وَ فِكِرْكُو يَبْقَى وَاحِدْ.
[11] يَا أَخْوَانِي، أَنَا قُلْت الْكَلَامْ دَا أَشَانْ نَاسْ وَاحِدِينْ مِنْ بَيْت أَخُتْكُو خُلُوَةْ أَوْرَوْنِي كَدَرْ إِنْتُو قَاعِدِينْ تِلْغَالَطَوْا أَمْبَيْنَاتْكُو.
[12] وَ أَيِّ نَادُمْ مِنْكُو قَاعِدْ يُقُولْ «أَنَا نَادُمْ هَنَا بُولُسْ» أَوْ «أَنَا هَنَا أَبُلُوسْ» أَوْ «أَنَا هَنَا بُطْرُسْ» أَوْ «أَنَا هَنَا الْمَسِيحْ».
[13] هَايْ! الْمَسِيحْ دَا وَاحِدْ وَلَّا مُفَرَّقْ؟ بُولُسْ دَا مَاتْ فِي الصَّلِيبْ فِي شَانْكُو وَلَّا؟ وَ غَطَّسَوْكُو بِأُسُمْ بُولُسْ وَلَّا؟ أَكِيدْ، لَا.
[14] وَ أَنَا مَا غَطَّسْت أَيِّ نَادُمْ مِنْكُو إِلَّا كِرِيسْبُسْ وَ غَايُسْ وَ أَشَانْ دَا نُقُولْ الْحَمْدُ لِلّٰهْ
[15] وَ بَيْدَا، مَا فِي نَادُمْ الْيَقْدَرْ يُقُولْ هُو غَطَّسَوْه بِأُسْمِي أَنَا.
[16] أَيْوَى، أَنَا غَطَّسْت نَاسْ بَيْت إِسْتِفَانْ كُلَ. لَاكِنْ مَا نَعَرِفْ كَانْ فِي نَادُمْ آخَرْ أَمْبَيْنَاتْكُو أَنَا غَطَّسْتَهْ.
[17] وَ الْمَسِيحْ رَسَّلَانِي مَا أَشَانْ نِغَطِّسْ النَّاسْ لَاكِنْ أَشَانْ نِبَلِّغْ لَيْهُمْ بِشَارَتَهْ. وَ مَا نِبَلِّغْهَا مِثِلْ الْعُلَمَاءْ الْيِبَلُّغُوا فِكِرْهُمْ بِكَلَامْ حَلُو. نِبَلِّغْ مَوْت الْمَسِيحْ فِي الصَّلِيبْ أَشَانْ الصَّلِيبْ كُلَ عِنْدَهْ قُدْرَةْ الْخَاصَّةْ بَيَّهْ.
[18] صَحِيحْ النَّاسْ الْمُوَدِّرِينْ يُقُولُوا كَدَرْ كَلَامْنَا فِي الصَّلِيبْ كَلَامْ بَاطِلْ. لَاكِنْ لَيْنَا أَنِحْنَ الْاللّٰهْ قَاعِدْ يِنَجِّينَا، كَلَامْ هَنَا الصَّلِيبْ عِنْدَهْ قُدْرَةْ اللّٰهْ.
[19] وَ فَكُّرُوا فِي الْكَلَامْ الْاللّٰهْ قَالَهْ فِي الْكِتَابْ <عِلِمْ الْعُلَمَاءْ نِبَطِّلَهْ وَ فِهِمْ الْفَاهِمِينْ نِوَدِّرَهْ>.
[20] وَ هَسَّعْ دَا وَيْن الْفَاهِمْ؟ وَيْن الْعَالِمْ؟ وَيْن الْمُتَكَلِّمْ الْيِرِيدُوهْ نَاسْ الدُّنْيَا؟ أَكِيدْ، اللّٰهْ وَصَّفْ كَدَرْ فِكِرْ نَاسْ الدُّنْيَا بَاطِلْ.
[21] اللّٰهْ سَوَّى كُلَّ شَيْء حَسَبْ فِكْرَهْ هُو وَ مَا أَنْطَى إِذِنْ لِنَاسْ الدُّنْيَا أَشَانْ يَلْقَوْا عَلَاقَةْ مَعَايَهْ بِفِكِرْ إِنْسَانِي. وَ اللّٰهْ شَالْ نِيَّةْ أَشَانْ يِرَسِّلْنَا نِبَلُّغُوا الْكَلَامْ الْيُقُولُوا كَدَرْ هُو كَلَامْ بَاطِلْ وَ يِنَجِّي النَّاسْ الْيِآمُنُوا بَيَّهْ.
[22] أَيْوَى، الْيَهُودْ يِدَوْرُوا يِشِيفُوا الْعَلَامَةْ التَّبْقَى لَيْهُمْ دَلِيلْ وَ الْيُونَانِيِّينْ يِفَتُّشُوا الْحَقّ بِعِلِمْ الدُّنْيَا
[23] لَاكِنْ أَنِحْنَ نِبَلُّغُوا لِكُلَّ النَّاسْ بِالْمَسِيحْ الْكَتَلَوْه فِي الصَّلِيبْ. وَ الْكَلَامْ دَا يِزَعِّلْ الْيَهُودْ وَ هُو كَلَامْ بَاطِلْ لِلْيُونَانِيِّينْ.
[24] لَاكِنْ لِكُلَّ النَّاسْ الْاللّٰهْ نَادَاهُمْ فِي دَرْبَهْ، كَانْ مِنْ الْيَهُودْ وَلَّا مِنْ الْيُونَانِيِّينْ كُلَ، الْمَسِيحْ هُو قُدْرَةْ اللّٰهْ وَ فِكِرْ اللّٰهْ.
[25] وَ النَّاسْ بُقُولُوا فِكِرْ اللّٰهْ بَاطِلْ لَاكِنْ فِكِرْ اللّٰهْ قَوِي مِنْ فِكِرْهُمْ مَرَّةْ وَاحِدْ. وَ النَّاسْ بُقُولُوا الشَّيْء اللّٰهْ سَوَّاهْ مَا عِنْدَهْ قُدْرَةْ، لَاكِنْ اللّٰهْ دَايْماً قَادِرْ مِنْهُمْ بِلْحَيْن.
[26] وَ بِكَلَامْ آخَرْ، يَا أَخْوَانِي، فَكُّرُوا فِي كِكَّيْف حَالِتْكُو قُبَّالْ اللّٰهْ مَا نَادَاكُو فِي دَرْبَهْ. أَوَّلْ دَا، فِي فِكِرْ النَّاسْ، شِيَّةْ مِنْكُو نَاسْ عِنْدُهُمْ فِكِرْ وَ شِيَّةْ مِنْكُو عِنْدُهُمْ قُدْرَةْ وَ شِيَّةْ مِنْكُو عِيَالْ الْكُبَارَاتْ.
[27] لَاكِنْ النَّاسْ الْجَاهِلِينْ حَسَبْ نَاسْ الدُّنْيَا، هُمَّنْ دَوْل بَسْ اللّٰهْ إِخْتَارَاهُمْ أَشَانْ يِجِيبْ الْعَيْب فِي الْعُلَمَاءْ. وَ النَّاسْ الْمَا عِنْدُهُمْ قُدْرَةْ حَسَبْ نَاسْ الدُّنْيَا، هُمَّنْ دَوْل بَسْ اللّٰهْ إِخْتَارَاهُمْ أَشَانْ يِجِيبْ الْعَيْب فِي الْقَادْرِينْ.
[28] أَيْوَى، اللّٰهْ إِخْتَارْ النَّاسْ الْمَسَاكِينْ وَ الْمَحْقُورِينْ وَ الْمَا عِنْدُهُمْ فَايْدَةْ لِنَاسْ الدُّنْيَا أَشَانْ يِبَطِّلْ فَايْدَةْ النَّاسْ الْبُقُولُوا هُمَّنْ بَسْ عِنْدُهُمْ فَايْدَةْ.
[29] وَ خَلَاصْ، مَا فِي إِنْسَانْ عِنْدَهْ حَقّ يِسَوِّي نَفْسَهْ كَبِيرْ قِدَّامْ اللّٰهْ.
[30] وَ اللّٰهْ بَسْ الْأَنْطَاكُو الْعَلَاقَةْ الْعِنْدُكُو مَعَ الْمَسِيحْ عِيسَى. وَ بِالْمَسِيحْ بَسْ نَلْقَوْا فِكِرْ اللّٰهْ. وَ بِالْمَسِيحْ بَسْ اللّٰهْ جَعَلَانَا صَالِحِينْ وَ سَوَّانَا شَعَبَهْ الْخَاصّ وَ فَدَانَا.
[31] وَ أَشَانْ دَا، خَلِّي نِتَابُعُوا الْكَلَامْ الْمَكْتُوبْ فِي الْكِتَابْ <خَلِّي نَادُمْ مَا يِسَوِّي نَفْسَهْ كَبِيرْ. أَخَيْر يُقُولْ اللّٰهْ بَسْ الْكَبِيرْ>.