[1] किंक्रिया मण्डलीकी सेविका, हाम्री बहिनी फिबीलाई, म तिमीहरूका सामु प्रशंसा गर्दछु।
[2] तिनलाई प्रभुमा उहाँका सन्तहरूलाई सुहाउने तरिकाले ग्रहण गर भनी म तिमीहरूलाई विन्ती गर्दछु, र उनलाई कुनै पनि कुरामा तिमीहरूको आवश्यकता पर्यो भने सहायता गर, किनकि उनी म लगायत धेरैका निम्ति सहायिका बनेकी छिन्।
[3] ख्रीष्ट येशूमा मेरा सहकर्मी प्रिस्किला र अक्विलालाई अभिवादन।
[4] तिनीहरूले मेरो निम्ति आफ्नो ज्यान जोखिममा पारेका थिए। म मात्र होइन, तर सारा गैरयहूदी मण्डलीहरू पनि तिनीहरूप्रति कृतज्ञ छन्।
[5] तिनीहरूका घरमा भेला हुने मण्डलीलाई पनि अभिवादन छ। इपेनितस मेरो प्रिय मित्र, जो एशियामा प्रभु ख्रीष्टमा आउने पहिलो विश्वासी थिए, उनलाई पनि अभिवादन भनिदेओ।
[6] मरियमलाई पनि अभिवादन भनिदेओ, जो तिमीहरूका निम्ति कडा परिश्रम गरेकी छिन्।
[7] एन्ड्रोनिकस र युनियस, मेरा आफन्तहरू र सङ्गी कैदीहरूलाई पनि अभिवादन भनिदेओ। प्रेरितहरूका बीचमा तिनीहरू प्रख्यात छन्, र मभन्दा पहिले ख्रीष्टमा विश्वास गरेका थिए।
[8] अम्प्लीआतस, प्रभुमा मेरा प्रिय मित्रलाई अभिवादन भनिदेओ।
[9] ख्रीष्टमा मेरो सहकर्मी उर्बानस र मेरो प्रिय मित्र स्ताखुसलाई अभिवादन भनिदेओ।
[10] ख्रीष्टमा दृढ र योग्य ठहरिएका अपेल्लेसलाई अभिवादन। अरिस्तोबुलसको घरानाका सबैलाई अभिवादन भनिदेओ।
[11] मेरा आफन्त, हेरोदियनलाई अभिवादन भनिदेओ। प्रभुमा भएका नर्किससका घरानाका सबै जनहरूलाई अभिवादन भनिदेओ।
[12] प्रभुमा कडा परिश्रम गर्ने नारी, त्रुफेना र त्रोफोसालाई पनि अभिवादन भनिदेओ। प्रभुमा ज्यादै परिश्रमी अर्की नारी मेरी प्रिय मित्र, परसीसलाई अभिवादन भनिदेओ।
[13] प्रभुमा चुनिएका रूफसलाई र तिनकी आमा, जो मेरी पनि आमाझैं हुन्, उनीहरूलाई पनि अभिवादन भनिदेओ।
[14] असिंक्रितस, फ्लेगन, हर्मेस, पाट्रोबास, हर्मास अनि उनीहरूसँग रहने दाजुभाइ-दिदीबहिनीहरूलाई मेरो अभिवादन भनिदेओ।
[15] फिलोलोगस, युलिया, नेरियस र तिनकी बहिनी तथा ओलिम्पास र उनीहरूसँग हुने प्रभुका सन्तहरूलाई अभिवादन भनिदेओ।
[16] ख्रीष्टिय प्रेमसाथ एक-अर्कालाई अभिवादन गर। ख्रीष्टका मण्डलीका सबैले तिमीहरूलाई अभिवादन पठाएका छन्।
[17] दाजुभाइ-दिदीबहिनीहरूहो, म विन्ती गर्छु, तिमीहरूका बीचमा फाटो ल्याउने र तिमीहरूले सिकेका कुराको विरुद्ध बाधा पुर्याउनेहरूसँग होसियार बस। तिनीहरूसँग टाढा बस।
[18] किनकि यस्ता मानिसहरूले हाम्रा प्रभु ख्रीष्टको सेवा होइन, तर आफ्नै स्वार्थ मात्र पूरा गर्दछन्। निर्दोष हृदय भएका मानिसहरूलाई तिनीहरूका चिप्लो र फुर्काउने कुराहरूले बहकाउँछन्।
[19] तिमीहरूको आज्ञाकारीताबारे प्रत्येकले सुनेका छन्; तिमीहरूको कारण म आनन्दित छु; तर म तिमीहरू असल काममा बुद्धिमान् र दुष्ट काममा निर्दोष रहेको चाहन्छु।
[20] शान्तिका परमेश्वरले चाँडै नै शैतानलाई तिमीहरूको पाउहरूमुनि कुल्चाउनुहुनेछ। हाम्रो प्रभु येशूको अनुग्रह तिमीहरूसँग रहोस्।
[21] मेरा सहकर्मी तिमोथीले तिमीहरूलाई आफ्ना अभिवादन पठाउँदैछन्, अनि त्यसरी नै मेरा आफन्तहरू लुकियस, जेसन र सोसिपाटरले पनि।
[22] म तर्तियस, पावलको लागि यो पत्रलाई लेख्ने व्यक्तिको पनि प्रभुमा सबैलाई अभिवादन पठाउँछु।
[23] गायस, जसको पाहुना सत्कारले म र यहाँका पूरै मण्डली आनन्दित छौं, उनले तिमीहरूलाई अभिवादन पठाउँदैछन्। इरास्तस यस शहरका कोषाध्यक्ष र हाम्रा भाइ क्वार्टसले पनि तिमीहरूलाई अभिवादन पठाउँदैछन्।
[24] हाम्रा प्रभु येशू ख्रीष्टको अनुग्रह तिमीहरू सबैसँग रहोस्। आमेन!
[25] अब उहाँलाई, जसले मैले तिमीहरूमा प्रचार गरेको येशू ख्रीष्टका सुसमाचारअनुसार तिमीहरूलाई दृढ पार्न सक्नुहुन्छ, त्यस रहस्यको प्रकाशअनुसार जुन सनातनदेखि गुप्त थियो,
[26] तर अब अनन्तका परमेश्वरको आज्ञाअनुसार प्रकट गरिएको र अगमवक्ताहरूको लेखाइद्वारा थाहा गराइएको छ, ताकि सबै गैरयहूदीहरू विश्वासद्वारा आज्ञाकारी बनून्।
[27] उही अद्वितीय सर्वज्ञानी परमेश्वरलाई येशू ख्रीष्टद्वारा सदा-सर्वदा महिमा होस्। आमेन!