[1] Ӧні висьтала Енлӧн вежа отирлӧ отсасьӧм йылісь. Галатияись вичкулӧ ме эта йылісь висьталі ни. Тійӧ ӧктӧ ны моз.
[2] Дӧсвидзисьлӧн лунӧ быдӧнныт шедтӧмсиныт сьӧмсӧ янсӧтлӧ, мымда вермат сетны, да видзӧ торйын. Сэк менам локтӧм коста оз понды ковны ӧктыны.
[3] Ас колассиныт бӧрйӧ кынымкӧ мортӧс. Кӧр ме локта тіян дынӧ, сэк ыста нійӧ Ерусалимас нӧбӧтны ӧктӧм отсӧтнытӧ, сьӧраныс сета гижӧттэз.
[4] Ковсяс кӧ меным аслым мунны, сэк нія мунасӧ мекӧт.
[5] Ме тіян дынӧ локта Македониясӧ кытшӧвтӧм бӧрын. Ӧні эд ме муна Македонияӧттяс.
[6] Тіян дынын олышта, натьтӧ. Поди, и тӧвсӧ чулӧта. Кытчӧ понда мунны, тійӧ менӧ кольлалат.
[7] Ӧні мунтӧнням ог мӧд кежавны тіян дынӧ. Дӧсвидзисьыс кӧ лэдзас, тіян дынын сэсся лӧсьӧтча мыйкӧ дырна олыштны.
[8] Ефесас ме ола Витдаслун вежалунӧдз.
[9] Эстӧн керны этӧ ыджыт уджсӧ меным ыбӧсыс паськыта осьтӧм, но тырмӧны и паныт лэбтісиссес.
[10] Локтас кӧ тіян дынӧ Тимофейыс, сы сьӧрын видзӧтӧ, медбы некин сылӧ умӧльсӧ эз кер. Сія эд ме моз керӧ Дӧсвидзисьыслісь уджсӧ.
[11] Сійӧ абутӧм туйӧ некин эд пуктӧ. Сылӧ туй вылас мый колӧ, ӧктӧ да сійӧ бура кольлалӧ, ась локтӧ ме дынӧ. Мийӧ воннэзӧкӧт сійӧ видзчисям.
[12] Ӧні Аполлос вонным йылісь. Ме ӧддьӧн тшӧкті сійӧ мунны тіян дынӧ воннэзӧкӧт, но сія ӧні эз понды мунны. Локтас, кӧр адззас кадсӧ.
[13] Лоӧ лӧсьӧтчӧмӧсь, веритӧмнаныт видзсьӧ, эд полӧ, чорыта сулалӧ!
[14] Быдӧс керӧ радейтан сьӧлӧмсянь!
[15] Воннэзӧ, тійӧ тӧдат Стефансӧ гортіссескӧт. Акаиясис медодз эд нія пондісӧ веритны. Нія асьнысӧ быдсӧн сетӧны Кристос отирлӧ, бура отсасьӧны. Кора тіянӧс:
[16] бурӧ пуктӧ сэтшӧммесӧ да и быд отсасисьсӧ да уджалісьсӧ.
[17] Стефаныс, Фортунатыс да Акаикыс локтӧмсянь ме гажми. Тійӧ абуӧсь, дак нія мекӧт тіян туйӧ.
[18] Нія менчим да тіянлісь сьӧлӧммезнымӧс лӧньсьӧтісӧ. Асся вылынжыка пуктӧ сэтшӧм отирсӧ!
[19] Тіянлӧ ыстӧны юӧр Асия мусис вичкуэс. Акил Прискиллакӧт да ны ордӧ ӧксьывлісь веритіссес Дӧсвидзись нимӧн ыстӧны тіянлӧ пым юӧр.
[20] Юӧр тіянлӧ ыстӧны воннэзныт быдӧнныс. Ӧтамӧднытӧ окалӧ вежа окалӧмӧн.
[21] Месянь, Павелсянь, юӧрыс гижӧм аслам киӧн.
[22] Кин оз радейт миянлісь Дӧсвидзись Кристос Исуссӧ, сія ёрдӧм. «Марана та» ─ Дӧсвидзисьным, лок!
[23] Дӧсвидзись Кристос Исуслӧн бурсетӧмыс ась пыр лоӧ тіянкӧт!
[24] Кристос Исускӧт ӧтлаасьӧм отир, ме тіянӧс радейта быдӧннытӧ. Аминь.