[1] Эм кӧ тіян мыйкӧ ӧтамӧдныт вылӧ, кыдз тійӧ лысьтат судитчыны вериттӧм отир дынын? Мыля одӧ локтӧ бӧрйисьны веритісь отир дынӧ?
[2] Тійӧ одӧ разь тӧдӧ: веритіссес эд пондасӧ судитны быдӧс отирсӧ, кӧдна олісӧ му вылас? Пондат кӧ суд вылас бӧрйисьны быд морткӧт, ӧні одӧ разь вермӧ бӧрйисьны учӧтик торас?
[3] Одӧ разь тӧдӧ: мийӧ пондам судитны ангеллэсӧ? Сідзкӧ, эта оланын керӧммезас вермамӧ жӧ бӧрйисьны.
[4] Тійӧ, эм кӧ быд лунся оланісь кытшӧмкӧ мог, мунат сэтшӧм судитіссез дынӧ, кӧдна вичкуас абуӧсь.
[5] Рожанытӧ кулят! Абу разь ас коласаныт ӧтік мывкыда морт, кӧда вермас воннэзныт коласын бӧрйисьны?
[6] А тійӧ вон вонкӧт тай судитчат. Эшӧ и судитчыны мунат вериттӧм отир дынӧ.
[7] Тійӧ кӧ ӧтамӧд коласаныт судитчат, этӧн ни эд аслыныт умӧльсӧ керат. Абу я буржык тіянлӧ умӧльсӧ нуӧтны? Тіянлісь мыйкӧ мырддясӧ кӧ, абу разь буржык кольччыны сідз, бӧрйисьтӧг?
[8] Тійӧ эд и асьныт воннэзнытлісь мырддятӧ, кератӧ нылӧ умӧльсӧ.
[9] Одӧ разь тӧдӧ: умӧльсӧ кериссес Енлӧн Юраланінӧ озӧ сюрӧ? Эд бӧбасьӧ! Кыскасиссез, ас керӧм еннэзлӧ копрасиссез, гозйӧн олӧм коста ӧтамӧд сайсянь ветлӧтіссез, ай отир ӧтамӧдкӧт инькӧт моз оліссез,
[10] гусясиссез, горшасиссез, кодаліссез, лёк кылаэз, отирлісь мырддиссез Енлӧн Юраланінӧ озӧ сюрӧ.
[11] И тіян коласісь мукӧдыс вӧлісӧ сэтшӧмӧсь. Ӧні миян Дӧсвидзись Кристос Исус нимӧн да миян Енлӧн Лов вынӧн тійӧ лоит сӧстӧм да вежа отирӧн, Ен сьӧрті веськыта оліссезӧн.
[12] «Меным позьӧ керны быдӧс», но быдӧсісь абу бурыс. «Меным позьӧ керны быдӧс», но менӧ ась нем оз домав, оз видз.
[13] Сёяныс кынӧм понда. Кынӧмыс лӧсьӧтӧм сёян понда. Ӧтсӧ и мӧдсӧ Еныс разяс. Вывтырным абу лӧсьӧтӧм кыскасьны. Сія ─ Дӧсвидзисьлӧ. Дӧсвидзисьыс ─ вывтырнымлӧ.
[14] Еныс миянлісь Дӧсвидзисьсӧ ловзьӧтіс. Аслас вынӧн ловзьӧтас и миянӧс.
[15] Одӧ разь тійӧ тӧдӧ: тіян вывтырныт Кристос вывтырлӧн тор? Босьта я Кристосыс вывтырись торсӧ, медбы керны сійӧ кыскасись инькалӧ торӧн? Сідз некӧр ог кер!
[16] Одӧ разь тійӧ тӧдӧ: кин ӧтлаасяс кыскасись инькакӧт, сія мортыс лоӧ сыкӧт ӧтік вывтырӧн? Вежа Гижӧтас эд висьталӧм: «Кыкыс лоасӧ ӧтік вывтырӧн».
[17] А Дӧсвидзиськӧт ӧтлаасьӧм мортыс лоас Сыкӧт ӧтік лов.
[18] Ветлӧтӧм-кыскасьӧмсис пышшӧ. Кыскасисьыс эд аслас вывтыр вылӧ лэбтісьӧ, сылӧ умӧльсӧ керӧ. Мӧдік умӧль керӧммез вывтырсӧ сідз озӧ вӧрзьӧтӧ.
[19] Одӧ разь тійӧ тӧдӧ: тіян вывтыррезныт ─ Вежа Лолыслӧн оланін, и Сія олӧ тіян пытшкын? Вежа Ловсӧ тіянлӧ сетіс Еныс. Тійӧ и асьныт абу асланытӧсь.
[20] Тіянӧс небӧм понда уна сетӧм. Сійӧн асланыт лолӧн, вывтырӧн вайӧ Еныслӧ ошкӧмсӧ. Тійӧ эд быдсӧн Еныслӧн.