[1] Абу разь ме апостол? Менӧ разь мыйкӧ видзӧ? Эг разь ме адззыв Кристос Исуссӧ, миянлісь Дӧсвидзисьсӧ? Тійӧ ӧтлаасит Дӧсвидзисьыскӧт, сія лоӧмыс абу разь менам уджсянь?
[2] Мӧдіккезлӧ ме, натьтӧ, абу апостол, а тіянлӧ ме апостол. Тійӧ Кристосыскӧт ӧтлаасит ─ эта ни эд висьталӧ: ме апостол.
[3] Этадз ачымӧс дорья ме вылӧ умӧльсӧ баитіссез одзын.
[4] Оз разь туй миянлӧ сёйны да юны?
[5] Огӧ разь мийӧ вермӧ новйӧтны сьӧраным веритісь иньӧс, кыдз мӧд апостоллэс? Сідз эд керӧны Дӧсвидзисьлӧн воннэс да Кифаыс.
[6] Дзир меным да Варнавалӧ я колӧ уджавны, медбы аслыным шедтыны сёянсӧ?
[7] Кытшӧм воин олӧ аслас сьӧм вылӧ? Кытшӧм виноград быдтісь оз сёй воӧм ягӧдсӧ? Кытшӧм пода вӧдитісь оз сёй нылісь йӧвсӧ?
[8] Менам этадз баитӧмӧ абу дзир отирлӧн авйӧм сьӧрті, этадз эд висьталӧм и Моисейлӧн Туйдӧтын.
[9] Туйдӧтас гижӧм: «Вартісь порозыслісь ӧмсӧ эн пӧднав». Пороззэс понда разь тӧждісьӧ Еныс?
[10] Миян понда я сідз висьталӧм? Сідз гижӧм миянлӧ: «Гӧрись гӧрӧ, вартісь вартӧ, кыкнанныс видзчисьӧны босьтны воӧмсис пайнысӧ».
[11] Мийӧ тіян сьӧлӧммезӧ кӧдзим Лолыслісь кӧдзыссӧ. Уна я сія, босьтам кӧ тіянсянь вывтырнымлӧ колӧмсӧ?
[12] Мӧдіккез кӧ вермӧны босьтны тіян дынын отсӧтсӧ, оз разь позь миянлӧ? Миянлӧ эд позьӧжык, но мийӧ нем эгӧ корлӧ тіянлісь. Мийӧ пыр асьным мырсям, медбы миянсянь эз вӧв некытшӧм падмӧт нуӧтны Кристослісь Бур Юӧрсӧ.
[13] Одӧ разь тійӧ тӧдӧ: Вежа Керкуас уджаліссес сёянсӧ босьтӧны Вежа Керкусис? Тӧдат эд: вежауджаліссес, кӧдна вайӧны езъялан козиннэз, босьтӧны ассиныс пайсӧ езъяланін вылас пуктӧмсис.
[14] Сідз и Дӧсвидзисьыс тшӧктіс: Бур Юӧрсӧ висьтасиссеслӧ оланын коланаыс ась локтӧ эта уджсянь.
[15] Тіянлісь ме нем эг босьтлы. Этӧ гижа не сійӧн, медбы меным отсаліт. Тіянлісь мыйкӧ босьтӧмся меным буржык кувны! Этӧ ошшасьӧмӧс некин оз вермы пуктыны абутӧм туйӧ.
[16] Ме висьтася Бур Юӧрсӧ. Сэтӧн меным немӧн ошшасьны. Меным сійӧ колӧ керны. Ӧддьӧн умӧль меным лоас, ог кӧ висьтась.
[17] Кера кӧ ме этӧ ассяням, сэк меным сы понда вештасӧ. Тшӧктӧм сьӧрті кӧ ─ сэк ме кера дзир меным сетӧм уджсӧ.
[18] Мый понда меным вештыны? Ме нуӧта Кристосыс йылісь Бур Юӧрсӧ да висьтасьӧмӧ понда нем ог босьт. Кыдз апостол, висьтасьӧмӧ понда ме верми бы и босьтны, но ме ог босьт.
[19] Менӧ некин немӧн оз видз. Ме ачымӧс быдӧнныслӧ раб туйӧ пукта. Сідз ме Кристосыс дынӧ верма вайӧтны отирсӧ унажык.
[20] Иудейескӧт ме вӧлі кыдз иудей, медбы нійӧ вайӧтны Кристос дынӧ. Моисейлӧн Туйдӧт сьӧрті оліссескӧт ме вӧлі Туйдӧт сьӧрті олісьӧн. Сідз кери, медбы вайӧтны Кристосыс дынӧ Моисейлӧн Туйдӧт сьӧрті оліссесӧ.
[21] Моисейлӧн Туйдӧттӧг оліссезлӧ ме вӧлі туйдӧттӧг олісь кодь. Ме сідз ачымӧс видзи, медбы Туйдӧттӧг оліссесӧ вайӧтны Кристосыс дынӧ. Еныс одзын эд ме абу Туйдӧттӧг олісь. Ме ола Кристослӧн Туйдӧт сьӧрті.
[22] Вынтӧммескӧт ме вӧлі вынтӧм кодь. Сідз ачымӧс видзи, медбы вынтӧммесӧ вайӧтны Кристос дынӧ. Ме быдӧнныс понда кери быдӧс, медбы ны коласісь мукӧдсӧ вайӧтны мезмӧмӧдз.
[23] Быдӧс этӧ кера Бур Юӧр понда, медбы и ме вылын вӧлі сылӧн бласлӧвитӧмыс.
[24] Одӧ разь тійӧ тӧдӧ? Котӧртӧмын вермасиссес котӧртӧны быдӧнныс. Козинсӧ эд сетӧны ӧтіклӧ. Сідзкӧ, котӧртӧ, медбы босьтны козинсӧ.
[25] Вермасиссес лӧсьӧтчӧмныс коста уна мыйись видзсьӧны, керӧны быдӧс коланасӧ, медбы вермыны. Нылӧ сетӧны юркытшсӧ дзир ӧні кежӧ, и сія сісьмӧ. Мийӧ эд лӧсьӧтчам босьтны пыр кежӧ юркытшсӧ, кӧда оз сісьмы.
[26] Сійӧн ме ог котӧрт весись. Пессьӧмӧ коста киэзнам ог ӧвтчы весись.
[27] Ме ассим вывтырӧс видза, тшӧкта уджавны, медбы мӧдіккезлӧ висьтасьӧмӧ коста ачым вӧлі туяна мортӧн да эг кольччы козинтӧг.