[1] Сідзкӧ, быдыслӧ колӧ вежӧртны: мийӧ Кристослӧ кысъяліссез, юӧртам Еныслісь тӧдлытӧм лӧсьӧтӧмсӧ.
[2] Енлісь уджсӧ кериссеслӧ колӧ лоны надейнӧй отирӧн.
[3] Ме ог видзӧт осудитӧмныт вылӧ али мӧдіккез кыдз осудитӧны менӧ. Ме и ачымӧс ог осудит.
[4] Ме сайын умӧльыс нем абу, но сійӧн ачымӧс ог вермы дорйыны. Менӧ судитісьыс ─ Дӧсвидзись.
[5] Сійӧн Дӧсвидзисьыс локтытӧдз мортсӧ эд осудитӧ. Пемытінас сайӧвтӧмсӧ Сія петкӧтас, морт сьӧлӧмын видзӧмсӧ осьтас. Сэк Еныс быд мортлӧ сетас сэтшӧм ошкӧм, кытшӧм колӧ.
[6] Воннэзӧ, ас йывсим да Аполлосыс йылісь этӧ ме висьтаси, медбы тійӧ велӧтчит миянсянь. Вежа Гижӧтас висьталӧмся, мый оз ков, юраныт эд пыртӧ. Ӧтамӧдныт коласын тіянлӧ оз туй ӧтікӧс лэбтыны, а мӧдікӧс абутӧм туйӧ пуктыны.
[7] Кин тэнӧ вылынжыка пуктіс? Тэ быдӧс босьтін Еныссянь. Босьтін кӧ, мый сэк ошшасян, жыв эн босьт.
[8] Тіян быдӧс эм, тіян коланаысся унажык ни эд. Тійӧ миянтӧг пуксит ӧксуэзӧ! Вӧліт бы тійӧ былись ӧксуэз кӧ, бур бы вӧлі. Сэк и мийӧ вермим бы тіянкӧт юравны!
[9] Ме юрам видза: миянӧс, апостоллэсӧ, Еныс шуӧм лоны жыв суд бӧрсянь вийны петкӧтӧммезӧн, медумӧль отирӧн. Миян вылӧ быдӧнныс видзӧтӧны, ангеллэс да и отирыс.
[10] Мийӧ Кристосыс понда ӧштім вежӧрнымӧс. Тійӧ Кристоскӧт ӧтлаасьӧмсянь мывкыдаӧсь. Мийӧ вынтӧмӧсь, а тійӧ вынаӧсь. Тіянӧс ошкӧны, миянӧс видӧны.
[11] Мийӧ эд ӧнӧдз тшыгьялам, горшным косьмӧ, абу паськӧмным, миянӧс вартлӧны, ветлӧтам горттӧг.
[12] Мийӧ уджалам, асланым киэзӧн шедтам няньсӧ. Миян йылісь умӧля баитӧны, а мийӧ бласлӧвитам. Миянӧс вашӧтлӧны, а мийӧ шы огӧ сетӧ.
[13] Миянӧс видӧны, а мийӧ ны понда кеймам. Му вылісь отирыслӧ мийӧ ёг туйӧ. Быдӧнныс миянӧс ӧнӧдз пуктӧны медумӧль отирӧ.
[14] Гижӧмӧ абу сы понда, медбы пель йыввезӧдз гӧрдӧтіт, а ассим дона челядьӧс моз тіянӧс велӧта.
[15] Тіян вермасӧ лоны Кристослӧн велӧтӧмӧ велӧтіссес сюрс мӧд, но айныт тіян ӧтік. Бур Юӧрсӧ висьтасьӧмнам ме чужті тіянӧс Кристос Исусыслӧ.
[16] Сійӧн кеймися тіянлӧ, керӧ ме моз. Ме эд кера Кристосыс моз.
[17] Эта понда ысті тіян дынӧ Тимофейсӧ. Дӧсвидзиськӧт ӧтлаасьӧм кузя сія менам надейнӧй дона зон. Сія тіянлӧ вайӧтас тӧдвыланыт Кристос Исусыс сьӧрын менчим мунӧмӧс. Ме сідз велӧта быдлаын, быд вичкуын.
[18] Тіян коласісь мукӧдыс асьнысӧ пондісӧ лэбтыны. Нылӧн эд юраныс, ме пӧ ог ни лок тіян дынӧ.
[19] Дӧсвидзисьлӧ кӧ сідз колӧ, ме чожа локта тіян дынӧ. Асьнысӧ лэбтіссеслісь сэк тӧдмала-видзӧта выннысӧ баитӧмныс вылӧ видзӧттӧг.
[20] Енлӧн Юралӧмыс эд вынын, абу кылын.
[21] Мый тіянлӧ буржык: бедьӧн тіян дынӧ локны али радейтӧмӧн да рам сьӧлӧмӧн?