[1] Гижӧ Павел, Кристос Исуслӧн апостол. Еныслӧ вӧлі колӧм сувтӧтны менӧ керны апостоллісь уджсӧ. Тимофей вонӧкӧт гижам Коринфӧ Енлӧн вичкулӧ да Акаияись быдӧс вежа отирлӧ.
[2] Ен Айнымсянь да миян Дӧсвидзись Кристос Исуссянь бурсетӧм да лӧнь олан тіянлӧ.
[3] Ошкам Енсӧ, миян Дӧсвидзись Кристос Исуслісь Айсӧ! Сія небыт сьӧлӧма Ай да пыр бурӧтісь Ен.
[4] Сія миянӧс бурӧтӧ быд тӧждісьӧм коста, медбы и мийӧ вермим бурӧтны тӧждісиссесӧ сія бурӧтӧмӧн, кӧдаӧн Еныс бурӧтӧ миянӧс.
[5] Миян оланын Кристосыс понда пессьӧм-мырсьӧмным содӧ. Сы коста содӧ и Кристосыслӧн миянӧс бурӧтӧмыс.
[6] Мийӧ кӧ тӧждам, тӧждам тіянӧс бурӧтӧм да мездӧм понда. Тійӧ миян моз видзсят кӧ пессьӧм-мырсьӧмныт коста, сэк мезмӧмныт лоас быдсӧн бурӧн.
[7] Сійӧн мийӧ бура надейтчам тіян вылӧ. Еныс кӧ бурӧтӧ миянӧс, сідз Сія и тіянӧс бурӧтас да мездас. Тӧдам эд, тійӧ миян моз пессят-мырсят, миян моз тійӧ лоат и бурӧтӧмӧсь.
[8] Воннэзным, сійӧн огӧ кольӧ тіянлӧ висьтавтӧг миян тӧждісьӧм-мырсьӧм йылісь. Сія миян вылӧ усис Асияын. Вӧлі ӧддьӧн сьӧкыт. Эгӧ ни вермӧ видзсьыны. Юраным видзим, огӧ ни пӧ кольччӧ ловьяӧсь,
[9] и миянӧс пӧ сетасӧ вийны. Сійӧн мийӧ эгӧ надейтчӧ ас выланым, а кулӧммесӧ Ловзьӧтісь Ен вылӧ.
[10] Сія мездіс миянӧс, эз лэдз сэтшӧм одз оланнымӧс орӧтны. Тӧдамӧ, и одзлань пондас миянӧс мездыны,
[11] тійӧ кӧ отсалатӧ миянлӧ кеймӧмнаныт. Уналӧн корӧм кузя Еныс миянлӧ козьналіс оланнымӧс. Сійӧн унаӧн буркывтасӧ Енсӧ миянлӧ отсалӧм понда.
[12] Миян сьӧлӧммезным висьталӧны: мийӧ асьнымӧс эгӧ лэбтӧ. Быд морткӧт мийӧ вӧлім осьта сьӧлӧмаӧсь, ӧддьӧнжык тіянкӧт. Миян ладорсянь умӧльыс нем эз вӧв. Сійӧн мийӧ вермам ошшасьны. Асланым морт мывкыдсянь нем эгӧ керӧ, миянӧс туйдӧтіс Еныслӧн бурсетӧмыс.
[13] Мийӧ тіянлӧ гижам дзир сійӧ, мый тійӧ вермат лыддьӧтны да вежӧртны. Надейтча, тійӧ быдӧс бура вежӧртат.
[14] А ӧні тійӧ эстісь мымдакӧ вежӧртіт ни. Сідзкӧ, миян Дӧсвидзись Кристос Исуслӧн бертан лунӧ пондам ошшасьны ӧтамӧднаным.
[15] Этӧ тӧдӧмӧн тіян дынӧ локны ме одзжык ни лӧсьӧтчылі. Тійӧ сэк вермит бы кыкись босьтны Енлісь бурсетӧмсӧ.
[16] Тіян дынӧт лӧсьӧтчи мунны Македонияӧ. Сэтчинсянь мӧді бӧр бертны тіян дынӧ, медбы тійӧ отсаліт меным мунны Иудеяас.
[17] Этадз керны лӧсьӧтчӧмнам видзӧттӧг я ме кери? Менам керӧмӧ разь ассяням вӧлі? Поди, ме ӧтік кадӧ висьтала «сідз», и сэтӧн жӧ «абу сідз»?
[18] Еныс тӧдӧ, тіянлӧ висьталӧмным эз вӧв и «сідз», и «абу сідз».
[19] Енлӧн Зон Кристос Исусыс йылісь тіянлӧ юӧртім ме, Силуан да Тимофей. Кристосыслӧн «сідз» да «абу сідз» ӧтдруг некӧр абу, Сылӧн эд быдӧс «сідз».
[20] Еныслісь быдӧс кӧсйӧммесӧ оланӧ пыртіс Кристос Исусыс. И Сыкӧт ӧтлаасьӧмӧн Енсӧ ошкӧм могись мийӧ шуам: «Аминь».
[21] Еныс вынсьӧтӧ миянӧс тіянкӧт видзсьыны Кристосыс бердӧ. Миянӧс Сія и мавтыштіс:
[22] миян вылӧ пуктіс пас ─ сьӧлӧммезаным сетіс Ассис Ловсӧ. Лолыс висьталӧ миянлӧ: Еныслӧн быдӧс кӧсйӧмыс керсяс.
[23] Ен одзын кыв сета: ме жалейта тіянӧс и сійӧн ӧнӧдз эг вовлы Коринфас.
[24] Мийӧ абу юраліссез тіян веритӧм вылын. Мийӧ тіянлӧ дзир отсалам гажмыны. Тӧдам эд: тійӧ бура сулалат веритӧманыт.