[1] Тійӧ меным гижліт да юасит. Ӧні висьтала юасьӧмныт йылісь: мортыслӧ бур, оз кӧ сія гӧтрась.
[2] Но медбы эд лэдзчисьӧ кыскасьны, быд ай мортлӧ колӧ босьтны аслыс иньӧс, а быд инькалӧн ась лоас аслас жӧник.
[3] Гозйӧн овтӧн ольпасьын жӧник сет асьтӧ иньлӧ, а инь ─ жӧниклӧ.
[4] Инь аслас вывтырлӧ абу кӧзяин, жӧникыс эд. Сідз и жӧник абу кӧзяин аслас вывтырлӧ, иньыс эд.
[5] Гозйӧн олӧм коста ӧтамӧдныт дынісь эд ылӧтчӧ. Баитчӧм бӧрын, медбы кӧслунавны да кеймыны, ӧтамӧдныт дынісь мымдакӧ вермат видзсьыны торйын. Сэсся бӧра олӧ ӧтлаын, медбы эз вермы ылӧтны сотанаыс, одӧ вермӧ кӧ видзсьыны.
[6] Менам висьталӧмӧ абу тшӧктӧм. Дзир висьталі, позьӧ мыся сідз керны.
[7] Ме сьӧрті дак буржык, быдӧнныт бы вӧліт ме кодьӧсь кӧ. Но Енсянь бурсетӧмыс быд мортлӧн аслас: ӧтіклӧн сэтшӧм, мӧдіклӧн мӧдкодь.
[8] Гӧтыртӧммеслӧ да дӧваэслӧ висьтала: буржык нылӧ кольччыны овны ме моз, ӧтікӧн.
[9] Озӧ кӧ вермӧ видзсьыны, ась гӧтрасьӧны, петӧны жӧник сайӧ. Вывтыр ӧзйӧтӧмся буржык эд гӧтрасьны.
[10] Гозйӧн оліссеслӧ висьтала: инь аслас жӧниккӧт ась оз янсӧтчы. Эта тшӧктӧмыс абу менам, сія Дӧсвидзисьлӧн.
[11] А янсӧтчас кӧ, сэк ась олӧ ӧтнас али бурасьӧ жӧникыскӧт. И жӧник иньыскӧт ась оз янсӧтчы.
[12] Мӧдіккеслӧ ассяням висьтала, ог Дӧсвидзисьсянь: Веритісьлӧн иньыс оз кӧ верит да лӧсьӧтчис сыкӧт овны, сэк сылӧ иньыскӧт оз ков янсӧтчыны.
[13] Сідз и веритісь иньлӧн жӧникыс оз кӧ верит да лӧсьӧтчис овны ӧтлаын, сэк иньыслӧ оз ков янсӧтчыны сыкӧт.
[14] Вериттӧм жӧникыс иньыс пыр вежасялӧ. Вериттӧм инь жӧникыс пыр вежасялӧ. Вӧлі бы мӧдмоз кӧ, сэк челядьныс эзӧ бы вӧлӧ сӧстӧмӧсь, а ӧні вежаӧсь.
[15] Кӧда оз верит да лӧсьӧтчис янсӧтчыны, ась янсӧтчӧ. Сэк веритісь жӧникӧс али иньӧс нем оз видз. Дӧсвидзисьыс эд корис миянӧс, медбы олім лӧня.
[16] Инь, кытісь тэныт тӧдны, он я вайӧт жӧниктӧ мезмӧмӧдз? А тэ жӧник, кытісь тӧдан, он я мезды иньтӧ?
[17] Быдыс тіян коласісь ась олӧ, кыдз Ен шуис. Ась кольччӧ сэтшӧмӧн, кытшӧмӧн сія вӧлі, кӧр Дӧсвидзисьыс корис. Сідз ме тшӧкта быд вичкуын.
[18] Мортыс локтіс кӧ Исусыс дынӧ вундыштыштӧм, ась оз суськы. Кӧда локтӧм одзас эз вӧв вундыштыштӧм, ась кольччӧ сідз.
[19] Мортыс вундыштыштӧм, абу я, сія нем оз сет. Медколанаыс то мый: быдӧс керны Енлӧн тшӧктӧммез сьӧрті.
[20] Еныс кортӧдз кинӧн тэ вӧлін, сідз и кольччы.
[21] Еныс корикӧ раб кӧ вӧлін, эн пов. Позьӧ кӧ петны йӧз кипод увтісь, кер, кыдз буржык.
[22] Дӧсвидзисьыс корӧ кӧ рабӧс, Кристосыслӧн сія мездӧтчӧм морт. Дӧсвидзисьыс корӧ кӧ мездӧтчӧм мортӧс, сія Кристослӧн раб.
[23] Тіянӧс небӧм понда уна сетӧм. Сідзкӧ, эд керсьӧ мортлӧ рабӧн.
[24] Вон, кин тэ вӧлін Енлӧн корӧм коста, Ен одзын сэтшӧмӧн и кольччы.
[25] Том ныввез йылісь Кристосыслӧн тшӧктӧмыс эз вӧв. Ме дзир туйдӧта тіянӧс. Дӧсвидзисьыс небыт сьӧлӧмсянь менӧ керис надейнӧй мортӧн, сійӧн меным позьӧ веритны.
[26] Ӧння сьӧкыт кад сьӧрті ме шуа: мортыслӧ буржык кольччыны, кыдз эм.
[27] Тэ кӧ ӧтлаӧтӧм инькӧт, эн кошшы янсӧтчыны. Кольччин кӧ иньтӧг, эн кошшы иньсӧ.
[28] А гӧтрасян кӧ, умӧльсӧ он кер. Нывка петас кӧ жӧник сайӧ, умӧльсӧ оз кер. Но сэтшӧммес эд уна пондасӧ мырсьыны, а ме тіянӧс жалейта.
[29] Воннэзӧ, ме тіянлӧ висьтала, кадыс кольччис етша. Сійӧн гӧтыраэс юраныт видзӧ, жыв тійӧ абу гӧтыраӧсь.
[30] Горзіссез, олӧ жыв одӧ горзӧ, гажӧтчиссез, жыв одӧ гажӧтчӧ, небиссез, жыв одӧ небӧ.
[31] Му вылісьнас олісьыс, ов сідз, жыв тэнат нем абу. Быдӧс, мый мийӧ адззам му вылісьсӧ, сія ӧшас.
[32] Меным колӧ, медбы тійӧ олітӧ тӧждісьтӧг. Гӧтыртӧмыс тӧждісьӧ Дӧсвидзисьыс йылісь. Сія юрас видзӧ керны быдӧс Сы сьӧрті.
[33] Гӧтыраыс тӧждісьӧ му вылісьыс понда, медбы керны иньыс сьӧрті. Инь да нывка абу ӧткодьӧсь.
[34] Жӧниктӧмыс тӧждісьӧ Дӧсвидзисьыс понда, кыдз керны Сы сьӧрті. Тӧждісьӧ сӧстӧма видзны вывтырсӧ, ловсӧ. А инь тӧждісьӧ му вылісьыс понда, медбы керны жӧникыс сьӧрті.
[35] Этадз баитӧмнам ог домав тіянӧс. Висьталӧмӧ сьӧрті кӧ керат, тіянлӧ буржык. Тійӧ сэк вермат сӧстӧма видзсьӧмӧн, дугдывтӧг кысъявны Дӧсвидзисьлӧ.
[36] Кин шуӧ кӧ, аслас нывлӧ пӧрисьмытӧдз кольччыны нывкаавны умӧль, сэк ась керӧ, кыдз сылӧ колӧ. Сэтшӧммес ась петӧны жӧник сайӧ.
[37] Шуам, мортыс пуктіс сьӧлӧм вылас кольны нывсӧ нывкаавны. Сылӧн абу кӧ некытшӧм сьӧкыт мог сетны нывсӧ жӧник сайӧ, сэк мортыс вермас сідз керны.
[38] Сійӧн ассис нывсӧ жӧник сайӧ сетісьыс бурӧ керӧ. Кӧда оз сет, керӧ буржыка.
[39] Туйдӧтыс иньӧс кӧрталӧ жӧникыскӧт. Кулас кӧ жӧникыс, сія вермас петны мӧдік сайӧ. Дзир колӧ, медбы мӧдікыс вӧлі Кристослӧ веритісьӧн.
[40] Но ме сьӧрті кӧ, дӧваыс лоас шудажык, оз кӧ пет мӧдік сайӧ. Еныс и меным эд сетіс Ассис Ловсӧ. Сійӧн сідз и баита.