[1] Меным кывсис, тіян коласын пӧ эмӧсь кыскасиссез. Сэтшӧмсӧ и Енсӧ тӧдтӧммеслісь он кыв. Кинкӧ пӧ инь туйӧ видзӧ айыслісь мӧдік иньсӧ.
[2] Тіянлӧ колӧ горзыны да дынсиныт вашӧтны сідз керисьсӧ. Но тійӧ тай сы туйӧ вышитчат.
[3] Ме вывтырнам абу тіян дынын, а ловнам эд тіянкӧт. Ме ӧні жыв тіян дынын и висьтала, мый керны сэтшӧмсӧ кериськӧт.
[4] Кӧр тійӧ ӧксятӧ миян Дӧсвидзись Кристос Исус нимӧн, сэк ме ловнам лоа тіянкӧт. Ӧтлаын лоас и Дӧсвидзись Кристос Исуслӧн выныс.
[5] Сэк сэтшӧма керисьсӧ кольӧ сотанаыслӧ. Ась вывтырыс сылӧн разьсьӧ, а лолыс мезмӧ миян Дӧсвидзись Кристос Исуслӧн локтан Лунӧ.
[6] Немӧн тіянлӧ ошшасьны. Одӧ разь тійӧ тӧдӧ: етша майӧлыс быдсӧн кӧтассӧ шӧммӧтӧ.
[7] Сідзкӧ, пытшксиныт важ шӧмсӧ весӧтӧ, медбы тіянлӧ лоны виль кӧтасӧн. Тійӧ эд шӧмтӧмӧсь. Кристосыс эд Ыджыт лунся Дзельыс. Сылісь вирсӧ кисьтісӧ миян понда, кыдз езъялан козинлісь.
[8] Сійӧн вежалун вылас огӧ локтӧ важ шӧмнаным: лёк керӧмнаным да лэдзчисьӧмнаным. Локтам шӧмтӧм няньӧн: сӧстӧмнас да быльнас.
[9] Ме гижлі тіянлӧ: кыскасиссескӧт эд тӧдчӧ.
[10] Ме эг гижлы вериттӧммез йылісь: кыскасиссез йылісь, горшасиссез йылісь, гусясиссез йылісь, ас керӧм еннэзлӧ копрасиссез йылісь. Сэк тіянлӧ ковсис бы мунны му вывсис.
[11] Ме гижлі ас коласіссезныт йылісь. Сэтшӧм мортыс асьсӧ пуктӧ вонӧ, ачыс тай абу вежсьӧм. Вермӧ кыскасьны, горшасьны, ас керӧм еннэзлӧ копрасьны, лёка баитны, кодавны, гусясьны. Сэтшӧмыскӧт ӧтлаын нельки сёйны оз ков.
[12] Мый меным бӧрйисьны отиркӧт, кӧдна абу вичкуын? Одӧ я тійӧ бӧрйисьӧ дзир вичкуиссескӧт?
[13] Сідзкӧ, лэдзчисьӧм мортсӧ дынсиныт вашӧтӧ. А ӧтӧриссескӧт бӧрйисяс Еныс.