[1] Воннэзӧ, ог коль эта йылісь тіянлӧ висьтавтӧг. Миян айезным быдӧнныс вӧлӧмась кымӧр увтын. Мӧдӧрас быдӧнныс вуджӧмась веськыта саридзӧттяс.
[2] Быдӧнныс пыртчӧмась кымӧрас да саридзас, медбы мунны Моисейыс сьӧрӧ.
[3] Быдӧнныс сёйӧмась Ловсянь сетӧм ӧтік сёян.
[4] Быдӧнныс юӧмась Ловсянь сетӧм ӧтік юан. Быдӧнныс юӧмась Лов изісь, кӧда ветлӧтӧм ныкӧт. Сія изыс ─ Кристос.
[5] Ны коласісь уна отир абу вӧлӧмась Еныслӧ сьӧлӧмви. Сійӧн нылӧн оланныс вӧлі орӧтӧм кушмуас.
[6] Ны йылісь гижӧмыс велӧтӧ, медбы миянӧс эз кыскы керны умӧльсӧ ны моз.
[7] Эд копрасьӧ ас керӧм еннэзлӧ, кыдз керӧмась мукӧдыс ны коласісь. Гижӧм тай ны йылісь: «Отирыс пуксисӧ сёйны да юны, сэсся чеччисӧ орсны-йӧктыны». Сідз керӧмась ас керӧм енныс одзын.
[8] Огӧ лэдзчисьӧ кыскасьны. Ны коласісь мукӧдыс тай сідз керӧмась. Эта понда ӧтік лунӧ кыкдас куим сюрс мортлӧн оланныс орӧм.
[9] Огӧ пондӧ лӧгӧтлыны Кристоссӧ ны моз. Ны коласісь тай мукӧдыс лӧгӧтлӧмась да кулӧмась кыйез чушкӧмсянь.
[10] Ны коласісь мукӧдыс моз эд норасьӧ. Норасьӧмыс понда нійӧ вийӧм кулӧтісь ангел.
[11] Ныкӧт быдӧс лоӧмыс велӧтӧ миянӧс. Сы йылісь гижӧмась, медбы ӧвны миянӧс, медбӧрья кадӧ оліссесӧ.
[12] Сідзкӧ, кин юрас видзӧ, бура пӧ сулала, видзӧт ─ верман усьны.
[13] Тіян вылӧ локтӧ сьӧкытыс-ылӧтлӧмыс, сія быд морткӧт вермас лоны, но Еныс надейнӧй, Сія оз коль. Сія мортыслӧ сетӧ сьӧкытсӧ выныс сьӧрті, оз сет унажыксӧ. Сьӧкыт кад коста вынсьӧтӧ, сетӧ отсӧтсӧ, медбы вермит сьӧкытсис петны.
[14] Менам донаэзӧ! Сідзкӧ, ас керӧм еннэслӧ эд копрасьӧ.
[15] Ме тіянлӧ баита мывкыда отирлӧ моз. Асьныт авйӧ, вежӧртӧ баитӧмӧс.
[16] Мийӧ дари доз дорын ошкам Енсӧ. Сэтісь юыштӧм коста мийӧ огӧ разь ӧтлаасьӧ Кристослӧн Виркӧт? Няньсӧ чеглалӧм коста огӧ разь ӧтлаасьӧ Кристослӧн Вывтыркӧт?
[17] Няньыс ӧтік. Сія ӧтік нянись мийӧ сёям быдӧнным. Сійӧн мийӧ ӧтік вывтыр.
[18] Видзӧтӧ му вылын олісь Израиль отирсӧ. Нія сёйӧны езъяланін вылӧ вайӧм козинсӧ. Сійӧ сёйӧны кӧ, озӧ разь ӧтлаасьӧ нія езъяланіныскӧт?
[19] Мый ме этӧн мӧда висьтавны? Ас керӧм еныс да сылӧ вайӧм сёяныс ваясӧ разь мыйкӧ бурсӧ?
[20] Озӧ эд! Сэтӧн Енсӧ тӧдтӧммес вайӧны езъялан козиннысӧ сэрпӧсь ловвеслӧ, озӧ Енлӧ. А меным оз ков сэрпӧсь ловвескӧт тіян ӧтвыв керсьӧмныт.
[21] Тійӧ одӧ вермӧ ӧтдруг юны Дӧсвидзисьлӧн дозісь да кульлӧн дозісь. Одӧ вермӧ ӧтдруг сёйны Дӧсвидзисьыс пызан вылісь да кульыс пызан вылісь.
[22] Неужто мийӧ пондам лӧгӧтлыны Дӧсвидзисьсӧ? Мийӧ вынажыкӧсь разь Сысся?
[23] «Меным быдӧс позьӧ». Быдӧсісь эд абу бурыс. «Меным быдӧс позьӧ», а быдӧсыс эд мортсӧ оз велӧт бурас.
[24] Некин ась оз тӧждісь дзир ас пондасис. Быдыс кошшы керны бурсӧ мӧдіклӧ.
[25] Вузасяніннэзісь босьтӧм яйсӧ сёйӧ повтӧг, эд юасьӧ, медбы сьӧлӧм выланыт бур вӧлі.
[26] Гижӧтыс эд висьталӧ: «Муыс да быдӧс, мый сы вылын, Дӧсвидзисьлӧн эд».
[27] Тіянӧс вермасӧ корны гортаныс нія, кӧдна абу Кристос отир коласісь. Тійӧ лӧсьӧтчит мунны. Сёяныс йылісь эд юасьӧ. Одзаныт вайӧмсӧ сёйӧ кокнит сьӧлӧмӧн.
[28] Тіянлӧ кӧ висьталасӧ, эта сёяныс пӧ вайӧм ас керӧм еннэзлӧ, сэк эдӧ сёйӧ висьталісьыс понда. Сылӧн сьӧлӧм вылас сэк оз ло умӧль. «Муыс да быдӧс, мый сы вылын, Дӧсвидзисьлӧн эд».
[29] Ме баита мӧддэслӧн сьӧлӧм йылісь, ог тіян йылісь. Менӧ эд нем оз видз. Понда кӧ сёйны, ась мортыс ме йылісь сьӧлӧм вылас умӧльсӧ оз видз.
[30] Ме сёяныс понда Енсӧ буркывта да вӧлись сёя. Мыйлӧ сэк ме йылісь умӧльсӧ юрӧ пыртны, ме сы понда кӧ Енсӧ буркывта.
[31] Сідзкӧ, сёят, юат я, мыйкӧ мӧдікӧ я керат, ─ быдӧс керӧ Енсӧ ошкӧм могись.
[32] Тіян керӧмсянь ась озӧ падмӧ иудейес, мӧдік отир да и Кристос отирыс.
[33] Керӧ ме моз: ме пыр вынсьӧтча лӧсявны быдӧнныскӧт. Ог кошшы бурсӧ ас пондасим, а мӧдіккез понда, медбы нія мезмисӧ.