[1] Ӧні мӧда баитны ас керӧм еннэзлӧ вайӧм сёян йылісь. Эта йылісь мийӧ быдӧнным мыйкӧ тӧдам. Но уна тӧдӧмсяняс мортыс асьсӧ пондӧ лэбтыны, а радейтӧмыс эд вынсьӧтӧ.
[2] Кин юрас пыртіс, ме пӧ мыйкӧ тӧда, сія оз тӧд сідз, кыдз колӧ бы сылӧ тӧдны.
[3] Кин радейтӧ Енсӧ, сійӧ Еныс тӧдӧ.
[4] Ас керӧм енлӧ вайӧм сёянсӧ сёйӧм йылісь мийӧ тӧдамӧ: ас керӧм еннэс ─ абу еннэз. Ӧтка Енысся абу мӧдік ен.
[5] Му вылас да енӧжас уна мый эм. Нійӧ тай пуктісӧ еннэзӧ. Отирыслӧн уна сэтшӧм еннэз да кӧзяиннэз.
[6] Миян эд ӧтік Ен ─ Ен Айным. Быдӧс Сысянь аркмис. Мийӧ и асьным Сы понда олам. Миян ӧтік Дӧсвидзисьыс ─ Кристос Исус. Быдӧс эд керӧм Сы пыр. Сы пыр и мийӧ босьтім олансӧ.
[7] Но эта йылісь быдӧнныс озӧ тӧдӧ. Мукӧдыс одззамоз юраныс видзӧны, ас керӧм еннэс ловьяӧсь пӧ. Сэтшӧм еннэзлӧ вайӧм сёянсӧ нія сёйӧны кӧ, сэк сьӧлӧмныс шуӧ нійӧ сэрпӧссезӧн. Нія эд эшӧ вынтӧмӧсь, сійӧн умӧля вермӧны торйӧтны бурсӧ умӧльсис.
[8] Сёяныс миянӧс Еныс дынӧ оз сибӧт. Сёямӧ мийӧ ─ нем огӧ босьтӧ, огӧ сёйӧ ─ нем огӧ ӧштӧ.
[9] Тіянӧс сёяныс некыдз оз домав. Но асьныт видзӧтӧ, медбы тіян сёян кузя вынтӧммес эзӧ ылалӧ.
[10] Шуам, тэ сійӧ быдӧс тӧдан. Ачыт тай пукалан пызан сайын ас керӧм еннэзлӧ вайӧм сёян дорын. Вынтӧмыслӧн оз я понды кыскыны сьӧлӧмыс сёйны сійӧ сёянсӧ?
[11] Сэк тэнат тӧдӧмсянь усяс вынтӧм воныт, кӧда понда куліс Кристосыс.
[12] Асланыт воннэзлӧ эттшӧм умӧльсӧ кератӧ, вынтӧммеслісь дойдат сьӧлӧммезнысӧ. Тійӧ умӧльсӧ керат эд Кристосыслӧ.
[13] Сійӧн, менам сёянӧ вайӧтӧ кӧ вонӧс ылалӧмӧдз, ог понды сёйны яйсӧ, медбы вонӧ эз ылав.