[1] Ме кера Кристосыс моз, а тійӧ керӧ ме моз.
[2] Воннэз, ошка тіянӧс. Менчим висьталӧмӧс тійӧ видзат тӧдвыланыт. Быдӧс керат велӧтӧмыс сьӧрті.
[3] Меным колӧ, медбы тійӧ тӧдіт: быд жӧниклӧ юрыс ─ Кристос, иньлӧ юрыс ─ жӧникыс, а Кристослӧ юрыс ─ Ен.
[4] Ай морт вевттьӧм юрӧн кеймӧ кӧ, Енсянь юӧртӧ я, сія ассис рожасӧ кульӧ.
[5] Инька вевттьытӧм юрӧн кеймӧ кӧ, Енсянь юӧртӧ я, сія ассис рожасӧ кульӧ. Сія эд ӧтвесьтын кушӧдз шырӧм юраыскӧт.
[6] Инька оз кӧбы вевттьы юрсӧ, сэк ась шырсьӧ кушӧдз. Инькалӧ рожа кулян кӧ ветлӧтны кушӧдз шырӧм юрнас, сэк юрсӧ ась вевттьӧ.
[7] Сідзкӧ, ай мортлӧ юрсӧ оз ков вевттьыны. Сійӧ Еныс аркмӧтіс Ас сьӧртӧттяс. Сія Еныслӧ вайӧ ошкӧмсӧ. Жӧниклӧ ошкӧмсӧ вайӧ инь.
[8] Ай мортыс эз вӧв аркмӧтӧм инькасянь. Инькаыс эд сысянь.
[9] Ай мортыс эз вӧв аркмӧтӧм инькаыс понда. Инькаыс эд сы понда.
[10] Сійӧн инькалӧ колӧ вевттьыны юрсӧ. Эта лоӧ пас ─ сы вылын эм юралан вын, медбы эта йылісь тӧдісӧ ангеллэз.
[11] Висьтавны кӧ, Дӧсвидзиськӧт ӧтлаасьӧмын ай мортыс инькакӧт, инька ай морткӧт, нія колӧны ӧтамӧдныслӧ.
[12] Медодзза инька вӧлі аркмӧтӧм ай мортсянь, ай морт чужӧ инькасянь. Быдӧнныс эд Енсянь.
[13] Видзӧтӧ асьныт, бур я инькалӧ Еныслӧ кеймыны юрсӧ вевттьытӧг.
[14] Оз разь тіянӧс велӧт быдӧс аркмӧтӧмыс: ай морт быдтӧ кӧ юрсисӧ, сія сылӧ рожа кулян,
[15] а инька быдтӧ кӧ юрсисӧ, сія сылӧ вайӧ ошкӧм. Юрсиыс эд сылӧ сетӧм вевттисян туйӧ.
[16] Кинкӧ пондас кӧ мекӧт етшасьны, сылӧ висьтала: миян дынын да и мӧдік Енлӧн вичкуэзын мӧд моза озӧ керӧ.
[17] Этадз велӧтікам тіянӧс ог ошкы. Тіян ӧксьывлӧмись етшажык бурыс петӧ, унажык умӧльыс.
[18] Медодз висьтала, кывсис эд: вичкуныт ӧксьывлӧм коста тійӧ ӧтамӧдныт коласын янсӧтчат. Ме верита, сэтшӧмыс вермас лоны.
[19] Тіян коласын мӧдмоза вежӧртӧмыслӧ и колӧ лоны, медбы оссисӧ надейнӧй морттэз.
[20] Но тіянлісь ӧксьывлӧммезнытӧ он шу Дӧсвидзисьлӧн дари дорӧ ӧксьӧмӧн.
[21] Быдӧнныт тэрмасятӧ пӧ сёйны ассиныт сёяннытӧ мӧдіккезся одзжык. Мукӧдыс кольччӧны пӧ тшыгйӧн, мукӧдыс пӧ кодззӧны.
[22] Мыля тійӧ одӧ сёйӧ горттэзаныт? Поди, абутӧм туйӧ пуктат Еныслісь вичкусӧ да нійӧ, кӧдналӧн нем абу? Мый сэтчӧ шуны? Ошкыны я тіянӧс эта понда? Ог ошкы.
[23] Тіянлӧ ме висьтавлі ни, кыдз колӧ керны. Меным сійӧ висьталіс Ачыс Дӧсвидзисьыс. Дӧсвидзись Исусыс сія ойӧ, кӧр вӧлі вузалӧм, босьтӧм нянь.
[24] Сія Енсӧ буркывтӧм, чегӧтӧм няньсӧ да висьталӧм: «Босьтӧ, сёйӧ. Эта менам Вывтырӧ, тіян понда сетӧм чегны. Сідз керӧ Менӧ тӧдвыланыт видзӧм могись».
[25] Рытнас, сёйӧм бӧраныс, босьтӧм юан дозсӧ да висьталӧм: «Дозас ─ Енкӧт Виль Йитӧт, керӧм Менам Вирын. Сэтісь юӧ Менӧ тӧдвыланыт видзӧм могись».
[26] И сідз пыр, кӧр сёят этӧ няньсӧ да юат эта дозісь, висьтасят Дӧсвидзисьлӧн кулӧм йылісь. Сідз керӧ Сы локтытӧдз.
[27] Сідзкӧ, кин пондас сёйны Дӧсвидзисьлісь няньсӧ да юны Сылӧн юан дозісь, но оз сёй-ю сідз, кыдз колӧ, ─ сія мортыс Дӧсвидзисьлӧн Вывтыр да Вир одзын умӧльсӧ керись.
[28] Мортыс ась тӧдмалӧ-видзӧтӧ асьсӧ. Сэк вӧлись ась сёйӧ этӧ няньсӧ да юӧ эта юан дозісь.
[29] Кин этӧ сёйӧ да юӧ, но оз сідз, кыдз колӧ, ─ сія ачыс асьсӧ вайӧтӧ суд вылӧ. Дӧсвидзисьлӧн вывтыркӧт керсьӧмсӧ сія оз ылӧст.
[30] Сійӧн эд тіян коласын унаӧн вынтӧмӧсь, шогалӧны, унаӧн кулісӧ ни.
[31] Ас сьӧраным видзӧтім кӧбы, сэк эгӧ бы сюрӧ Дӧсвидзисьлӧн суд вылӧ.
[32] Ӧні Сія миянӧс судитӧ да мыжйӧ, медбы мийӧ эгӧ сюрӧ суд вылас му выліссескӧт мыжйыны.
[33] Воннэзӧ, сідзкӧ, рытнас сёян дорас ӧксьывлӧмныт коста ӧтамӧднытӧ видзчисьӧ.
[34] Кин тшыг, ась сёйӧ гортас. Сэк нем лоас висьтавны умӧльсӧ тіян ӧксьывлӧммез йылісь. Мӧдікас велӧта-туйдӧта локтӧмӧ коста.