[1] Воннэзӧ, тіян дынӧ вовлӧмӧ коста ме эг баит аслам мывкыдсянь басӧк кыввезӧн. Ме вовлі висьтасьны Еныслісь юӧрсӧ.
[2] Ме юрам пыртлі: кӧр локта тіян дынӧ, понда тӧдны дзир дорӧм Кристос Исуссӧ.
[3] Тіян дынын ме вӧлі полісь, вынтӧм, сьӧлӧмӧ ӧддьӧн ёткӧпаліс.
[4] Менам баитӧмӧ да висьтасьӧмӧ эзӧ вӧлӧ морт мывкыдсянь вына кыввез. Висьталӧм кыввезам выныс тыдаліс Ен Ловлӧн,
[5] медбы тіян веритӧмныт вӧлі Ен вынсянь, а эз морт мывкыдсянь.
[6] Мывкыдыс йылісь мийӧ висьтасям веритӧмас зорамӧммезлӧ. Сія мывкыдыс абу эта кадлӧн. Абу ӧння кадӧ юраліссезлӧн, кӧдна вежсьӧны.
[7] Мийӧ висьтасям Еныслісь вӧвлытӧм-тӧдлытӧм мывкыдсӧ, кӧда ӧнӧдз вӧлі сайӧвтӧм. Еныс вӧлі лӧсьӧтӧм сійӧ быдӧс аркмӧтӧмӧдз ни, медбы миянлӧ вайны югьялӧмсӧ.
[8] Му вылас юраліссез коласісь сійӧ мывкыдсӧ некин эз вежӧрт. Вежӧртісӧ бы, дак эзӧ бы дорӧ югьялан Дӧсвидзисьсӧ.
[9] Вежа Гижӧтыс тай висьталӧ: ─ Сэтшӧмсӧ эз адззывлы син, эз кывлы пель, сэтшӧмыс мортлӧ юрас эз пырлы, мый лӧсьӧтӧм Еныс Сійӧ радейтіссезлӧ.
[10] Миянлӧ сійӧ осьтіс Еныслӧн Лолыс. Лолыс эд быдлаӧ сюрӧ да быдӧс тӧдӧ. Тӧдӧ и Еныслісь пыдына сайӧвтӧмсӧ.
[11] Отирыс коласісь кин тӧдӧ, мый мортыс пытшкын? Сійӧ тӧдӧ дзир мортлӧн аслас лолыс. Сідз и Еныс йылісь вермас висьтасьны дзир Сылӧн Лолыс.
[12] Мийӧ огӧ олӧ му вылісь лов сьӧрті, олам Ен Лов сьӧрті, Кӧдӧ сетіс Еныс. Сійӧн вермам вежӧртны Енлісь козьналӧмсӧ.
[13] Эта козьналӧм йылісь огӧ баитӧ морт мывкыдсянь босьтӧм кыввезӧн. Мийӧ юӧртам Вежа Ловсянь велалӧм кыввезӧн. Лолыслісь висьталӧмсӧ вежӧртӧтам Лов отсӧтӧн.
[14] Оз кӧ тӧд мортыс Енлісь Ловсӧ, сія оз вермы кывзыны и Ловсянь висьтасьӧмсӧ. Сылӧ сія лоӧ бӧбсорӧн баитӧм. Висьтасьӧмсӧ оз вермы вежӧртны сійӧн, мыля эта йылісь колӧ авйыны Лов отсӧтӧн.
[15] Эм кӧ мортыс пытшкын Енлӧн Лолыс, сія мортыс быдӧсын вермӧ авйыны-бӧрйисьны, а сыын некин оз вермы.
[16] ─ Кин тӧдӧ Дӧсвидзисьлісь мывкыдсӧ? Кин вермас висьтавны Сылӧ, мый керны? А миян мывкыдным ─ Кристослӧн.