[1] Israelitanakan Egipto markat mistunipxatapatsti, pä mara saraqataru, nayrïr phaxsina Sinaí wasaran Tatitux Moisesar parläna, akham sasa:
[2] “Israelitanakax Pascua uruyañxa, kuna urutakitix amtatäki ukhamarjamaw uruyapxañapa,
[3] nayrïr phaxsina, tunka pusin uru saraqat jayp'thapiru, kawkïr yatichäwinaktix churapksma ukhamarjamaw uruyapxäta” sasa.
[4] Ukat Moisesax israelitanakar Pascua uruyapxañapatak säna,
[5] jupanakasti uka phaxsina, tunka pusin uru saraqat jayp'thapiruw Sinaí wasaran uruyapxäna, kunjämtix Tatitux Moisesar siskatayna ukhamarjam sum phuqhasa.
[6] Ukampisa, mä qawqha jan q'umachat jaqinakaw utjäna, jupanakan jiwat jaqir llamkt'apxatap layku; ukat ukürux Pascua jan uruyapkänti. Jupanakasti Moisesampiru, Aaronampir parliriw sarapxäna,
[7] Moisesarusti akham sapxäna: —Nanakax mä jiwat jaqin amayap llamkt'apxta, uka laykuw q'añuchat uñjasipxta. Ukhamasti, ¿janit nanakasti mayni israelitanakamp chika amtatäki uka urun Tatitur waxt'a luqtapkiriststi? —sasa.
[8] Moisesasti jupanakarux sänwa: —Suyt'apxita, Tatituruw kuntix lurapxañamäki uk jiskt'ä, —sasa.
[9] Tatitusti Moisesar akham sarakïna: “Israelitanakar akham säta:
[10] Taqi jumanakawa, wawanakamamp kuna nayar jach'añchas Pascua uruyapxäta. Khitinakatix mä jiwatar llamkt'atap layku jan q'umäpki, jan ukax, khitinakatix jayan jikxatasipki, saräwinkasipki,
[11] ukanakasti, payïr phaxsina, tunka pusin uru saraqat jayp'thapiruw uruyapxani. Jupanakasti ovejxa, jaru quranakampi, jan levaduran t'ant'amp manq'apxani,
[12] janiw qhipärmanthitak kunas jilt'ayatäñapäkiti, janirakiw uywan ch'akhanakapas p'akjatäñapäkiti. Yatichäwinak churapksma ukhamarjamaw Pascua uruyapxäta.
[13] Ukampis khititix q'uma jikxataskasina, jan saräwinkkasina Pascua jan uruykani uka jaqix, markap taypit apanukutaw uñjasini. Uka urun Tatitur waxt'a jan luqtatap laykusti, uka juchapat mutuyataw uñjasini.
[14] “Jumanak taypin jakasir jaya markat jutir jaqinakax, Pascua uruyapxarakiniwa, nayar jach'añchasa, kawkïr yatichäwinaktix churkta ukhamarjama. Uka yatichäwinakax yaqha markat jutir jaqinakatakisa, pachpa markan yurir jaqinakatakis pachpakïniwa.”
[15] Kunürutix Arust'äwi Carpa sayt'ayapkän uküruxa, mä qinayaw imxatäna. Jayp'untxän ukapachasti, Arust'äwi Carpa patxan mä ninaw uñstäna, ukampis willjtarux chhaqtawayxänwa.
[16] Ukhamaw sapa kuti lurasïna: Urux qinayaw carpar imxattäna, arumasti ninar uñtataw ukar qhant'äna.
[17] Qinayax carpa patxat unxtkän ukkhasti, israelitanakax sarxarupxänwa, ukatsti kawkharutix qinayax sayt'kän ukkharuw israelitanakax utjnuqtapxäna.
[18] Tatitun aruparjamaw israelitanakax sarxarupxäna, jan ukax utjnuqtapxänsa; kunapachkamatix qinayax Arust'äwi Carpa patxar imxatkän ukkhakamaw uka chiqan qhiparapxäna.
[19] Qinayatix walja urunak Arust'äwi Carpa patxan qhiparkän ukkhaxa, israelitanakax pachparuw Tatitur yupaychañatak qhiparapxarakïna.
[20] Qinayatix mä qawqha urunakak Arust'äwi Carpa patxan qhiparkän ukkhaxa, israelitanakax Tatitun arsutaparjamaw jank'ak sarxarupxäna, sayt'apxarakïna.
[21] Yaqhip urun qinayax arumakiw qhiparäna, qhipärmanthisti uka chiqat unxtäna; ukapachasti jupanakax sarxarupxänwa. Arumäpasa, urüpasa, qinayax unxtkän ukkhaxa, jupanakax sartawayapxarakïnwa.
[22] Qinayatix Arust'äwi Carpa patxan pä uru, mä phaxsi, jan ukax, mä maras sayt'kän ukapachaxa, israelitanakax sayt'apxarakïnwa, janiw juk'amp sarkxapxänti, pachpan utjnuqtapxäna. Qinayatix unxtkän ukkhasti, jupanakax sartawayapxänwa.
[23] Tatitun arsutaparjamaw utjnuqtapxäna, arsutaparjamarakiw sarxarupxäna. Tatitun arsutap phuqhasa, kunjämtix Tatitux Moisés tuqi jupanakar siskatayna ukhamarjam jaysasa.