[1] Ukapachaw Balaamax Balac reyir säna: —Aka chiqar paqallqu altaranak sayt'ayarapita, ukatsti paqallqu vaca qallumpi, paqallqu urqu ovejampi wakicharapita —sasa.
[2] Balac reyisti Balaaman aruparjamaw luräna, ukatsti panpachaniw sapaqat altarxar mä vaca qallumpi, mä urqu ovejampi wilañcha luqtapxäna.
[3] Ukxarusti Balaamax Balac reyir sänwa: —Jumax wilañcha luqtat jak'an qhiparam. Nayasti Tatitun jutañap suyañaxawa, kuntix lurañaxäki uk sarakitani —sasa. Ukapachasti Balaamax mä ch'usawja pata chiqaruw saräna.
[4] Jupan uka chiqankañapkamasti, Diosaw jupar uñstäna. Ukat Balaamax Tatitur säna: —Jumar jach'añchasaw paqallqu altaranak sayt'ayta, ukatsti sapa altarxan mä vaca qallumpi, mä urqu ovejampi waxt'a luqtta —sasa.
[5] Tatitusti uka pachax, Balaaman lakapar kuntix parlañapäki uka arunak uchäna, jupar sarakïnwa: —Balac reyin ukar kutt'am, juparusti kuntix sisksma uka pachpa arunak yatiyam —sasa.
[6] Balaamasti kutt'xasina, Balac reyir wilañcha luqta jak'an sayt'at jikxatäna, moabita jilïr jaqinakamp chika.
[7] Ukapachaw Balaamax aka arunak arsüna: “Inti jalsu tuqi qullunakata, Aram chiqatpach Balac sat Moab markan reyipax jutayitu. ‘Jutam, Israelar ñanqhacharapita’ situwa, ‘Jacobun markapatak jan walinak mayirakim’ sasa.
[8] ¿Kamisarak nayasti, Diosax jan ñanqhachki ukar ñanqhachästi? ¿Kamisarak jan walir puriñapatak mayïsti, Tatitux jan lurki uksti?
[9] Aka jach'a qarqanak patat uñjta, aka quntu patanakat uñtarakta; yaqhachat markaw jakasi, janiw yaqha markanakjamäkisa.
[10] Jupanakax laq'ar uñtatawa; ¿khitirak jupanakar jakt'aspasti? ¿Khitirak qawqhätapsa yatirakispasti? ¡Nayax uka aski jaqinakjam jiwañ munirista, tukuy urunakaxas jupanakan tukuyapjamarakïspa!” sasa.
[11] Uk ist'asasti, Balac reyix Balaamar sänwa: —¿Kunarak lurasktasti? Nayax uñisirinakaxar ñanqhachiriw irpansma, jumasti jichhax aski arunak jupanakatak arsuraptaxa —sasa.
[12] Balaamasti sänwa: —Tatitux nayan arsuñax munki uka arunakak saskta —sasa.
[13] Ukampis Balac reyix saskakïnwa: —Jutam, yaqha chiqar sarañäni, ukawjat inas jupanakat mä juk'aniruk uñjasin ñanqhachañ munchisma —sasa.
[14] Ukatsti Balac reyix Sofim chiqaruw Balaamar irpäna, Pisgá sat qullu pataru. Uka patansti paqallqu altaranak sayt'ayäna, sapaqat altarxan mä vaca qallumpi, mä urqu ovejampi wilañcha luqtäna.
[15] Ukatsti Balaamax Balac reyir sänwa: —Jumax akan suyt'ita, altaranak jak'ana, ukchañkamasti nayax Tatitump jikisiriw sarä —sasa.
[16] Tatitusti Balaamar uñstasin, kuntix arsuñapäkän uka arunak yatiyäna, juparusti sarakïnwa: —Balac reyin ukar kutt'am, juparusti kuntix sisksma uka pachpa arunak säta —sasa.
[17] Balaamasti kutt'xasina, Balac reyir wilañcha luqta jak'an sayt'at jikxatäna, moabita jilïr jaqinakamp chika. Ukapachaw Balac reyix Balaamar jiskt'äna: —¿Tatitux kamstamsa? —sasa.
[18] Balaamasti aka arunak arsüna: “Balac, Sipor chachan yuqapa, sum ist'ita.
[19] Tatitux janiw jiwir jaqinakjamäkiti: janiw k'ariskiti, janirakiw amuyt'äwip mayjt'aykisa. Jupax arsutaparjam lurapuniwa. Jupax arsutap phuqhapuniwa.
[20] Tatituw markapatak aski arunak arsuyitu; Tatituw ukham arsu, janiw nayax jupar jark'kiristti.
[21] Tatitux Israel markan reyipawa. Jupax markap taypin jakaski. Tatitux janiw jupanakan jan walt'añap munkiti, janiw jupanakar ñanqhsa lurañ munkiti.
[22] Tatituw markaparux Egiptot qhispiyani, búfalo animalan ch'amapat sipan wali ch'amampi.
[23] Tatitun markapar ñanqhachañatakix janiw layqasiñanakax kunäkisa. ¡Uñtapxam qawqha muspharkañ luräwinaksa Tatitux markap layku luri!
[24] Aka markax axsarkañ leonar uñtataw sartasi, katjatapar manq'antañkamax janiw samarkaniti, uñisirinakapar atipjat uñjañkamax janiw samarkaniti” sasa.
[25] Ukapachaw Balac reyix Balaamar sarakïna: —¡Janitix aka markar ñanqhachirjamäkstaxa, janirakiy aski arunak jupanakatak arsumtixa! —sasa.
[26] Ukxaruw Balaamax sarakïna: —¿Janit nayasti sisksma, kuntix Tatitux siskitani ukak lurä sasasti? —sasa.
[27] Ukat Balac reyix jupar säna: —Jutam, yaqha chiqawjaruw irpäma. Inas Tatitux uka chiqawjatpach israelitanakar ñanqhachayiristam —sasa.
[28] Ukhamaw Balac reyix Balaamar irpäna, Peor sat qullu pataru, kawkhattix wasarax taqpach uñstki ukawjaru.
[29] Ukan Balaamax Balac reyir säna: —Aka chiqan paqallqu altaranak sayt'ayarapita, ukatsti paqallqu vaca qallumpi, paqallqu urqu ovejamp wakicht'arapita —sasa.
[30] Balac reyisti Balaaman aruparjamaw luräna, ukatsti sapa altaran mä vaca qallumpi, mä urqu ovejampi wilañcha luqtäna.