[1] Tatitux Moisesaruw säna:
[2] “Israelitanakan sutipxar madianita jaqinakat phuqsusim, uka qhipat jiwxäta” sasa.
[3] Ukat Moisesax markar parläna, akham sasa: —Jumanakat mä qawqhanix nuwasiñatak wakichrantasipxam, ukatsti Madián markar katuntapxam, jupanakat Tatitun sutipxar phuqsusiñataki, jiwasar jan yanapt'añ munapxatap layku.
[4] Sapaqat ayllut waranqa jaqinak uka nuwasïwir khithañapa —sasa.
[5] Ukat Israelan utjir ayllunakapat waranqa chachanak sapa ayllut khithapxäna, taqpachanisti tunka payan waranqa chachanakaw sarthapipxäna, nuwasiñatak wakichrantatanaka.
[6] Moisesasti jupanakar nuwasïwiruw khithäna, Finees chachamp chika, Eleazar sacerdoten yuqapa. Finees chachax qullan yänak apäna, nuwasïwi qallantañ yatiyañatakisti trompetanak aparakïna.
[7] Ukatsti kunjämtix Tatitux Moisesar siskatayna ukhamarjamaw israelitanakax nuwasiñ qallantapxäna, ukatsti taqpacha madianita jaqinakaruw jiwarayapxäna.
[8] Jiwarayat chachanak taypinsti madianita phisqa reyinakaw ukankäna: Eví, Réquem, Sur, Hur, Reba jupanaka. Beor chachan Balaam sat yuqapas ukankarakïnwa.
[9] Israelitanakax madianita warminakampiru, jisk'a wawanakapampiruw katuntasin apapxäna, ukatsti uywanakapampi, jila alani yänakapamp jupanakat aparapxäna;
[10] ukhamarusa, taqpach markanakapampi, campamentonakapamp phichhantapxarakïna.
[11] Ukatsti taqi kunanaktix aparanipkäna, jaqinaksa, uywanaksa,
[12] ukanak Moisesan ukaruw apapxäna, Eleazar sacerdoten ukampiru, Israel marka nayraqatampiru, jupanakasti ukapachax Moab uraqi pampan jikxatasipxäna, Jordán jawira thiyana, Jericó marka uñkatasina.
[13] Israelit ejercitor kuttanir uñjasasti, Moisesampi, Eleazar sacerdotempi, markan taqpach jilïrinakapampix, campamentot anqäxaruw katuqir mistuwayapxäna.
[14] Moisesasti ejerciton jilïrinakapatak wal q'apisïna,
[15] ukat jupanakar säna: —¿Kunatarak warminakarusti jan jiwarayapxtasti?
[16] Uka warminakaw Balaaman jan wali amuyt'ayatax, israelitanakar iyawsayasin Tatitut saraqayapxäna, Baal-peor diosar yupaychayasa. Ukat Tatitux mä jan wali usumpi markapar mutuyäna.
[17] Jichhpach taqpach yuqall wawanakar jiwarayapxam, ukhamarak chachamp sarnaqir taqpach warminakaru,
[18] chacha jan uñt'ir tawaqunakarusti jan jiwarayapxamti, jumanakatak qhiparayasipxam.
[19] Jumanakat khitinakatix jaqi masipar jiwayki, jan ukax, jiwat jaqin amayap llamkt'ki ukax, paqallqu uruw campamento anqäxan qhiparapxäta. Jumanakasa, katuntanipkta uka jaqinakasa, Tatit nayraqatan kimsïr urumpina, paqallqür urumpin q'umachasipxäta.
[20] Taqpach isinakam t'axsurasipxäta, ukatsti lip'ichit lurat yänaka, cabriton t'arwapat lurat yänaka, lawat lurat yänak q'umachapxarakïta —sasa.
[21] Ukatsti Eleazar sacerdotex nuwasïwit kuttanirinakar taqpachaniruw sarakïna: —Tatitux Moisesar churkän uka kamachix akham siwa:
[22] quri, qullqi, bronce, hierro, estaño, plomo ukanakat lurat yänaka,
[23] ninatak ch'ullqhïki uka yänakxa, ninar apantasin q'umachapxäta, ukatsti q'umachir umampiw jariqxapxäta. Ukampis ninatak jan ch'ullqhïki uka yänaksti, q'umachir umampikiw jariqapxäta.
[24] Paqallqür urun isinakam t'axsusipxäta, ukat q'umachat uñjasxapxäta. Uka campamentorux mantxapxarakïta —sasa.
[25] Tatitux Moisesar sänwa:
[26] —Eleazar sacerdotempi, markan jilïrinakapamp yanapt'ayasisin, madianita jaqinakar aparanit warminakampi, uywanakamp jakthapim,
[27] ukatsti payaruw jaljäta, mä chikatxa, nuwasir sarir soldadonakaruw lakintäta, mä chikatsti, markan qhiparir jaqinakaruw lakintarakïta.
[28] Soldadonakar wakt'ki ukanakatxa, sapa phisqa patakat maya jilt'ayarapita, warminakatsa, vacanakatsa, asnonakatsa, ukhamarak ovejanakatsa,
[29] ukanaksti Eleazar sacerdoteruw churäta, nayar luqtatäkaspas ukhama.
[30] Israelitanakar wakt'ki uka chikatatxa, sapa phisqa tunka warminakatsa, vacanakatsa, asnonakatsa, ovejanakatsa, taqpach uywanakatsa maya jilt'ayäta, ukanaksti qullan utaxan yanapasir levitanakaruw churäta —sasa.
[31] Moisesampi, Eleazar sacerdotempisti Tatitux Moisesar siskatayna ukhamarjamaw lurapxäna.
[32] Taqi kunanaktix uñisirinakapat soldadonakax aparanipkatayna ukanak jan jakt'atasax, suxta patak paqallqu tunka phisqan waranqa ovejanaka,
[33] paqallqu tunka payan waranqa urqu vacanaka,
[34] suxta tunka mayan waranqa asnonaka,
[35] kimsa tunka payan waranqa chacha jan uñt'iri tawaqunakampïnwa.
[36] Ukhamasti, soldadonakar wakt'ki uka chikatax, kimsa patak kimsa tunka paqallqun waranqa phisqa patakan ovejanakänwa,
[37] ukanakat suxta patak paqallqu tunka phisqan ovejanakaw Tatitur katuyatäxäna;
[38] uka kimsa tunka suxtan waranqa vacanakatxa, paqallq tunka payan vacanakaw Tatitutak katuyatäxäna;
[39] uka kimsa tunka waranqa phisqa patakan asnonakatxa, suxta tunka mayan asnonakaw Tatitur churatäxäna;
[40] uka tunka suxtan waranqa tawaqunakatsti, kimsa tunka payan tawaqunakaw Tatitur katuyatäxäna.
[41] Moisesasti Tatitun arsutaparjamaw Tatitur wakt'ki ukanak Eleazar sacerdoter katuyxäna.
[42] Ukatsti israelitanakar wakt'kän uka chikatasti, kawkïr chikattix Moisesax yaqhachkatayna ukanakax,
[43] pachparakïnwa: kimsa patak kimsa tunka paqallqun waranqa ovejanaka,
[44] kimsa tunka suxtan waranqa urqu vacanaka,
[45] kimsa tunka waranqa phisqa patakan asnonaka,
[46] tunka suxtani waranqa tawaqunakampi.
[47] Aka chikatat Moisesax sapa phisqa tunkat maya, warminakatsa, uywanakatsa apaqäna, ukanaksti Tatitun qullan utapan yanapasir levitanakaruw Tatitun arsutaparjam churxäna.
[48] Ukatsti nuwasïwir sarapkatayna uka ejerciton jilïrinakapax, Moisesan ukar sarasin
[49] juparuw sapxäna: —Nuwasïwir sarir israelita soldadonakaruw nanakax jakthapipxta, jupanakax phuqhatpachäskiwa.
[50] Ukat nanakax jikxatapkta uka taqpach quri yänak Tatitutak apanipxta, chipananaka, surtijanaka, aretenaka, yaqha k'achachasiñanaka, taqi ukanaka Tatitur luqtañataki, jucha luratat nanakar pampachañapataki —sasa.
[51] Moisesampi, Eleazar sacerdotempisti taqpach uka quri yänak jilïrinakat katuqapxäna.
[52] Soldadonakan jilïripax churapkatayna uka quristi, patak kimsaqallq tunka pusin kilot juk'ampïnwa,
[53] sapa soldadow uñisirinakapat aparanit yänakat apanipxäna.
[54] Ukhamaw Moisesampi, Eleazar sacerdotempix jilïrinakat quri katuqapxäna, ukanaksti Tatitun israelitanakat amtasiñapatakiw Tatitump Jikisiñ Carpar apapxäna.