[1] Tatitux Sinaí qullun Moisesar parlkän ukapachaxa, Aarón chachax pusi wawanïnwa:
[2] Nadab, Abihú, Eleazar, Itamar jupanakänwa. Nadabasti tayna wawapänwa.
[3] Pusinpachaw sacerdotëñatak ajllitäpxäna, utt'ayatäpxarakïna,
[4] ukampis Nadab, Abiú chachanakax Tatitu nayräxan jiwapxäna, jupanakan mä jan uñt'ata nina Sinaí qullun luqtapxatap layku. Jupanak paninisti janirakiw wawanïpkänti, ukatwa Eleazarampi, Itamar chachampix sacerdote kankañ phuqhapxäna.
[5] Tatitux Moisesar sänwa:
[6] “Leví ayllunkirinakar jawsayam, Aarón sacerdoten arsutaparjam jupar yanapapxañapataki.
[7] Jupanakaw Tatitump Jikisiñ Carpan, Aaronan lurañanakap jupataki, taqpach markachirinakampitak lurapxani, qullan chiqawjan luqtäwinak phuqhasa.
[8] Tatitump Jikisiñ Carpan yänakap uñjapxarakini, ukatsti israelitanakan lurañanakap lurapxani, qullan chiqawjan luqtäwinak phuqhasa.
[9] Taqpach Israel markankirinak taypitxa, Aaronampi, wawanakapampikiw sacerdote kankañ katuqapxani. Ukat ukxar utjir levitanakarux yaqhachätawa, Aaronampiru, jupat saraqirinakampir luqtapxañapataki. Yaqha jaqitix, jan Aaronan yuqapäkasin sacerdoten lurañap lurani ukasti, jiwaniwa.”
[11] Tatitux Moisesar sarakïnwa:
[12] “Nayaw israelitanak taypit levitanakarux ajllista, sapa utankirin jilïr wawap lanti. Jupanakax nayankiwa,
[13] taqi jilïr wawanakan nayankatap layku. Egipcionakan jilïr wawanakap jiwaraykäyät ukapachaw nayax, israelitanakan jilïr yuqall wawanakap nayatak yaqhachasta, uywanakapan nayrïr wawachat qallunakapsa yaqhachasirakta. Ukhamasti nayankituwa. Nayätwa Tatituxa.”
[14] Tatitux Sinaí wasaran Moisesar parläna, akham sasa:
[15] “Leví chachat saraqirinakar jakthapim, wila masitkama, tunu awkit saraqiritkama, ukatsti taqi yuqall wawanakar mä phaxsinit amstar qillqantam.”
[16] Moisesasti Tatitun arsutaparjamaw jakthapïna.
[17] Leví chachan wawanakapax: Guersón, Quehat, Merarí ukanakänwa.
[18] Guersón chachan wawanakapax: Libní, Simí ukanakänwa.
[19] Quehat chachan wawanakapax: Amram, Ishar, Hebrón, Uziel ukanakänwa.
[20] Merarí chachan wawanakapax: Mahli, Musí ukanakänwa. Leví chachan tamapankir wila masitkam jakhutanakax taqi ukanakänwa.
[21] Guersón chachan wila masinakapax Libní, Simí ukanakänwa.
[22] Taqpach yuqall wawanakapat mä phaxsinit amstaru qillqantatanakax, paqallq waranqa phisqa patakanïnwa.
[23] Uka tamanakasti, inti jalanta tuqin utjnuqtapxäna, qullan chiqawja qhipäxana.
[24] Guersón chachat saraqir wila masi tamanakan jilïr irpiripax Eliasaf chachänwa, Lael sat chachan yuqapa.
[25] Jupanakaw Tatitump Jikisiñ Carpan qullan chiqawja uñjapxäna, uka carpan janxata lip'ichinakapa, mantañar uchatäkis uka cortina,
[26] anqäxan utjir cortinanakapa, mantañapan utjir cortinapa, qullan chiqawjampiru, altarampir muyuntki uka cortinanaka, ukhamarus cortinanak chinuña wiskanak uñjapxarakïna.
[27] Quehat chachat saraqir wila masi tamanakax Amram, Ishar, Hebrón, Uziel ukanakänwa,
[28] taqpach yuqall wawanakapat mä phaxsinit amstar qillqantatanakax, kimsaqallq waranqa kimsa patakanïnwa. Uka tamanakaw qullan chiqawja uñjapxäna,
[29] jupanakasti qullan chiqawjat aynach tuqin utjnuqtapxäna.
[30] Uka tamanakan jilïr irpiripax Elisafán sat chachänwa, Uziel chachan yuqapa.
[31] Uka tamanakaw Tatitun arust'äwi arcap uñjapxäna, ukhamarak Tatitutak yaqhachat t'ant'a uchañ mesa, candelero, altaranaka, velo, Tatitur yupaychañatak wakiski uka qullan yänakampi, taqi yaqha yänakampi.
[32] Levitanakan jilïr irpiripax Aarón sacerdoten yuqapa Eleazar chachänwa, jupasti qullan chiqawja uñjirinakar uñch'ukiyañatak uchatänwa.
[33] Merarí chachan wila masinakapax Mahli, Musí ukanakänwa.
[34] Taqpach yuqall wawanakapa mä phaxsinit amstar qillqantatanakasti, suxta waranqa pä patakanïnwa.
[35] Jupanakan jilïr irpiripax Suriel sat chachänwa, Abihail chachan yuqapa, jupanakasti qullan chiqawjat amsta tuqin utjnuqtapxäna.
[36] Merarí chachan saraqirinakapax qullan chiqawjan utjir tablanak uñjapxäna, ukhamarak uka tablanakan lawanakapa, kawkïri lawatix mä thiyat mä thiyaru sarki uka lawanakapa, sayir lawanakampi, katxäsirinakapampi, taqi yänakapampi,
[37] uka kipkaraki uta anqäxar muyuntki uka sayir lawanaka, katxäsirinakapampi, ch'akurunakapampi, wiskanakapampi.
[38] Moisesampi, Aaronampi, wawanakapampix, Tatitump Jikisiñ Carpa nayräxaparu, inti jalsu tuqiruw utjnuqtapxäna. Jupanakaw israelitanakan sutipar qullan utjäwi uñjapxäna. Mayni jaqitix jan sacerdotëkasin, sacerdoten lurañap lurkän ukapachaxa, jiwayatäñatak juchañchatänwa.
[39] Moisesampi, Aaronampix Tatitun arsutaparjamaw Leví ayllunkirinakar, wila masitkam jakthapipxäna, jupanakar qillqantapxarakïna, mä phaxsinit amstaru yuqall wawanakasti, taqpachanix pä tunka payan waranqanïnwa.
[40] Tatitux Moisesar sänwa: “Israelitanakan wawanakap taypin jilïr wawanak mä phaxsinit amstar jakthapim, sutinakap qillqantarakim.
[41] Ukatsti Leví chachat saraqirinakar nayatak yaqhacharapita, taqi israelitanakan tayna yuqall wawanakap lanti. Uka kipkaraki, Leví ayllunkirinakan uywanakap nayatak yaqhacharapita, taqi israelitanakan uywanakapat nayrïr wawachat qallunakap lanti. Nayätwa Israelan Tatitupaxa.”
[42] Moisesasti kunjämtix Tatitux siskatayna, ukhamarjamaw taqi israelitanakan tayna yuqall wawanakap jakthapïna,
[43] taqpachanisti mä phaxsinit amstaru qillqantat yuqall wawanakax, pä tunka payan waranqa pä patak paqallq tunka kimsanïnwa.
[44] Uka qhipatsti Tatitux Moisesar sarakïnwa:
[45] “Leví chachat saraqirinakax nayankituwa, jupanakasti taqpach israelitanakan tayna yuqall wawanakap lantïniwa. Jupanakan uywanakapas israelitanakan uywanakap lantiw nayankarakitu.
[46] Ukampis israelitanakan jilïr yuqall wawanakapax, Leví chachan saraqirinakapat sipan jilawa; ukhamasti, jiläki uka pä patak paqallq tunka kimsan jilïr wawanak kutsuyasiñatakixa,
[47] sapaqat jaqita phisqa qullqi mayïta, qullan utjäwin tupuparjama, sapa qullqisti tunka mayan gramonakaniwa,
[48] uka qullqsti Aaronampiru, wawanakapampiruw churäta, jupanakat kutsuyatäkaspas ukhama. Nayätwa Israelan Tatitupaxa.”
[49] Moisesasti israelitanak taypin jilarir tayna yuqall wawanak kutsuyañatakix qullqi apthapïna,
[50] waranqa kimsa patak suxta tunka phisqan qullqi apthapirakïna, qullan utjäwin tupuparjama.
[51] Uka qullqinaksti Aaronampiru, wawanakapampiruw churxäna, kunjämtix Tatitux siskatayna ukhamarjama.