[1] Tatitux Moisesampiru, Aaronampiruw säna:
[2] “Israelitanakax Tatitumpi Jikisiñ Carpäkis ukkhat jaya chiqat muyuntasaw utjnuqtapxani, sapaqat maynisa wiphalapampi, wila masitkam mä chimpun uchata.
[3] “Inti jalsu tuqirux Judá ayllun wiphalapanïki uka tamanakaw utjnuqtapxani. Judá ayllun ejercitopan jilïripasti Nahasón chachawa, Aminadab chachan yuqapa,
[4] jupanakasti jakthapitarjamax paqallq tunka pusin waranqa suxta patakan chachanakawa.
[5] Judá ayllunkirinakat kupi tuqirusti Isacar ayllun ejercitopaw utjnuqtani, jilïripasti Natanael chachawa, Suar chachan yuqapa,
[6] jupanakasti jakthapitarjamax phisqa tunka pusin waranqa pusi patakan chachanakawa.
[7] Ch'iqa tuqirusti, Zabulón ayllun ejercitopaw utjnuqtarakini, jilïripasti Eliab sat chachawa, Helón chachan yuqapa,
[8] jupanakasti jakthapitarjamax phisqa tunka paqallqun waranqa pusi patakan chachanakawa.
[9] Ukhamat uka ayllunakan tamanakapax Judá ayllunkir wiphalapar arkapxani. Taqpachanisti pataka kimsaqallq tunka suxtan waranqa pusi patakan chachanakawa. Taqpachaniw israelita ejerciton nayraqatap sarantapxani.
[10] “Aynach tuqirusti Rubén ayllun wiphalapanïki uka ejercitow utjnuqtani. Rubén ayllun ejercitopan jilïripax Elisur chachawa, Sedeúr chachan yuqapa,
[11] jupanakasti jakthapitarjamax pusi tunk suxtan waranqa phisqa patakan chachanakawa.
[12] Rubén ayllunkirinakat kupi tuqirusti Simeón ayllun ejercitopaw utjnuqtani, jilïripasti Selumiel chachawa, Surisadai chachan yuqapa,
[13] jupanakasti jakthapitarjamax phisqa tunk llätunkan waranqa kimsa patakan chachanakawa.
[14] Ch'iqa tuqirusti Gad ayllun ejercitopaw utjnuqtani, jilïripasti Eliasaf chachawa, Reuel chachan yuqapa,
[15] jupanakasti jakthapitarjamax pusi tunka phisqan waranqa suxta patak phisqa tunkan chachanakawa.
[16] Ukhamat uka ayllunakan tamanakapax Rubén ayllunkir wiphalapar arkapxani. Taqpachasti pataka phisqa tunka mayan waranqa pusi patak phisqa tunkan chachanakawa; jupanakasti nayrïr tamar arktasaw taqpachan sarantapxani.
[17] “Leví chachat saraqirinakax jupanak qhipat Tatitump Jikisiñ Carpa apt'at sarantapxani. Uka pusi tamanakax mayat mayat sarantapxani, utjnuqtatanakaparjamaw wiphalapamp sarantapxani.
[18] “Inti jalanta tuqirusti Efraín ayllunkirinakan wiphalapanïki uka ejercitonakaw utjnuqtapxani. Efraín ayllun ejercitopan jilïripax Elisamá chachawa, Amihud chachan yuqapa,
[19] jupanakasti jakthapitarjamax pusi tunka waranqa phisqa patakan chachanakawa.
[20] Efraín ayllunkirit kupi tuqirusti Manasés ayllun ejercitopaw utjnuqtarakini, jilïripasti Gamaliel sat chachawa, Pedasur chachan yuqapa,
[21] jupanakasti jakthapitarjamax kimsa tunka payan waranqa pä patakan chachanakawa.
[22] Ch'iqa tuqirusti Benjamín ayllun ejercitopaw utjnuqtani, jilïripasti Guidoní chachan Abidán sat yuqapawa,
[23] jupanakasti jakthapitarjamax kimsa tunk phisqan waranqa pusi patakan chachanakawa.
[24] Ukhamat uka ayllunakan tamanakapax Efraín ayllunkir wiphalapanïki ukar arkapxani. Taqpachanisti pataka kimsaqallqun waranqa patakan chachanakawa; jupanakasti kimsïr t'aqa tamxaruw sarantapxani.
[25] “Amsta tuqirusti Dan ayllun wiphalapanïki uka ejercitonakaw utjnuqtani. Dan ayllun ejercitopan jilïripax Ahiézer sat chachawa, Amisadai chachan yuqapa,
[26] jupanakasti jakthapitarjamax suxta tunka payan waranqa paqallqu patakan chachanakawa.
[27] Dan ayllunkirit kupirusti, Aser ayllun ejercitopaw utjnuqtarakini, jilïripasti Paguiel sat chachawa, Ocrán chachan yuqapa,
[28] jupanakasti jakthapitarjamax pusi tunka mayan waranqa phisqa patakan chachanakawa.
[29] Ch'iqa tuqirusti Neftalí ayllun ejercitopaw utjnuqtani, jilïripasti Ahirá sat chachawa, Enán chachan yuqapa,
[30] jupanakasti jakthapitarjamax phisqa tunka kimsan waranqa pusi patakan chachanakawa.
[31] Ukhamat uka ayllunakan tamanakapax Dan ayllun wiphalap arkapxani. Taqpachanisti pataka phisqa tunka paqallqun waranqa suxta patakan chachanakawa; jupanakaw taqi tamanakan qhipap wiphalapamp sarantapxani.”
[32] Taqi israelita wila masinakat jakthapitax, taqpachanix suxta patak kimsan waranqa phisqa patak phisqa tunkan chachanakänwa.
[33] Ukampis Leví chachat saraqirinakax janiw jakthapitäpkänti, kunjämtix Tatitux Moisesar iwxkatayna ukhamarjama.
[34] Israelit jaqinakasti kunjämtix Tatitux Moisesar siskatayna ukhamarjamaw taqpach lurapxäna: Sapaqat tamaw wiphalanakapamp utjnuqtapxäna, ukatsti wila masitkama, ayllutkam sarantapxarakïna.