[1] Ukatsti israelitanakax warariñ qalltapxäna, uka arumasti jacht'asisaw qhantatipxarakïna.
[2] Jupanakax taqpachaniw Moisesampitaki, Aaronampitakix jan wal parlapxäna, akham sasa: “¡Egipto uraqinsa jiwaraskasäna, jan ukax, aka wasaransa jiwaraskasäna!
[3] ¿Kunatakirak Tatitusti aka uraqir irpanpachïstusti? ¿Jiwasan nuwasïwin jiwarañasataki, warminakasasa, wawanakasas uñisirisan amparapar katuntat uñjasiñasatakit irpanpachïstusti? ¡Egiptor kuttxañasakiw walïspa!” sasa.
[4] Ukatsti maynit maynikamaw parlarasipxäna: “Egiptor kuttxañatakix mä jilïr utt'ayasiñäni” sasa.
[5] Ukapachasti Moisesampi, Aaronampix israelitanak nayräxan ajanunakap uraqir puriyañkamaw alt'apxäna,
[6] ukatsti Josué chachampi, Caleb chachampix, llakisiñat isinakap ch'iyanuqasipxäna, jupanakax mayninak chikaw uka uraqinak uñakipanipxatayna,
[7] jupanakasti israelitanakarux akham sapxarakïnwa: —¡Nanakax uñakipir sarapkta uka uraqix, wali suma uraqipuniwa!
[8] Tatitutix khuyapayasistanixa, uka uraqir mantañ yanapt'istaniwa, jiwasanakaruw churarakistani. Uka uraqin leches, misk'is umjamaw jalsuski.
[9] Janiy Tatitur qallasipxamti, janirak uka markankir jaqinakar axsarapxamti, jupanakar atipjañax jiwasatak janiw kuna ch'amakänisa; jupanakar arxatirix janiw khitis utjkiti, ukatsipana, Tatituw jiwasampïski. ¡Jan jumanakax axsarapxamti! sasa.
[10] Ukhamäkipansa, jaqinakax qalampiw jupanakar k'upjañ munapxäna. Ukapachaw Tatitun qhapaq kankañapax Tatitump Jikisiñ Carpana uñstäna, taqpach israelitanakan uñjkata,
[11] Tatitusti Moisesarux sänwa: —¿Kunapachkamarak aka markasti nayar jisk'achaskakitanisti? ¿Kunapachkamarak nayat pächasisipkakini, jupanak taypin walja muspharkañanak lurkipansa?
[12] Nayaw jupanakar jiwarayir usu apayanï, uka uraq jan katupxañapataki; ukampis jumarux taqit sipan mä jach'a markaruw tukuyäma, jupanakat sipan juk'amp ch'amani —sasa.
[13] Ukampis Moisesax Tatitur sänwa: —Jumaw aka markarux jach'a ch'amamampi Egipto markat irpsuntaxa. Kunapachatix egipcionakax kuntix lurkäta uk yatipxani ukkhasti,
[14] Canaán uraqinkir jaqinakaruw yatiyapxani. Jupanakax ist'apxarakiw juma, Tatitun aka marka taypinkaskatama, ajanuy ajanu uñjayasitama, qinayamas jupanak patxankaskatapa; urunsti jupanakan nayraqatap mä qinay tuqi saraskatama, arumansti mä nina tuqirak saraskatama.
[15] Jumatix aka markar may jawq'antasin jiwayäta ukkhax, juman jach'a kankañamat yatir markanakax sapxaniwa:
[16] “Diosasti kawkïri uraqtix churä siskatayna uka markarux janiw irpantkiti, ukat wasaran jiwarayi” sasa.
[17] Ukat jichhax Tatay, jach'a ch'amam uñacht'ayañamatak mayt'asinsma. Juma pachpaw sistaxa:
[18] “Janiw jank'ak phiñasirïkti, khuyapayasiñaxax jan tukuskiriwa, ñanqha luratsa, nayatak sayt'asiñanaksa pampachtwa, juchanirux mutuyapuntwa, awkimpina taykampin jucha luratanakapatxa, wawanakaparu, allchhinakaparu, allchhinakan allchhinakaparuw mutuyarakta” sasa.
[19] Tatay, munasiñamax sinti jach'awa, aka markan juchanakap pampachakimaya, kamisatix Egiptot akakam khuyapt'ayaskta ukhama.
[20] Tatitux Moisesar sarakïnwa: —Walikiwa, nayax juman mayitamarjamaw jupanakan juchap pampachä.
[21] Ukampis naya layku, taqpach uraqi phuqhantir jach'a kankañax laykuw juramento lurta,
[22] khitinakatix jach'a kankañax uñjkasinsa, Egiptompina, wasarampin muspharkañanak luratax uñjkasinsa, nayar wasaran mayampi mayamp yant'apxitu, arunakaxar jan jaysañ munirinakax,
[23] janipuniw jupanakat maynis arsut uraqi uñjkaniti, awkipar taykapar churañatak arskta uka uraqi. Janirakiw nayar jisk'achirinakat maynis uka uraq uñjapkaniti.
[24] Caleb luqtirixakiw jan mayninakjamäkiti, jupasti taqi chuymampiw iyawsitu. Ukat juparux kawkïr uraqtix uñakipir sarki uka uraqirux mantayä, wawanakapasti ukan utjantasipxani.
[25] Amalecitanakampi, cananeonakampiw qhirwa tuqin jakapxi, ukhamasti jumanakax qharürpacha wasar tuqir kuttapxam, ukatsti Mar Rojo quta thakhinjam sarapxam.
[26] Tatitusti Moisesampiru, Aaronampirux saskakïnwa:
[27] —¿Kunapachkamarak aka ñanqhar jichuntat israelitanakan parlatanakap isch'ukïsti? Niyaw ist'ta nayxat jan wali parlatanakapa.
[28] Niyakixay ‘mutuyapxituw’ sasa sarnaqapxchixa, jichhaw jupanakar mutuyä. Nayaw Israelan Diosapätxa, juramentompiw arsta, parlatanakaparjamaw lurä.
[29] Jaqinak jakthapïwin pä tunka maranit amstar qillqantatäpki jupanakata, nayatak jan wali parlirinakax, jiwapxaniwa; amayanakapasti aka wasaran jaqurpayataw uñjasini.
[30] Jumanakat janiw maynis jumanakar churañatak arskta uka uraqir mantkaniti, Caleb chachampi, Josué chachampikiw uka uraqirux mantapxani.
[31] Ukatsipana, wawanakamarux mantayäwa, jumanakax sapxtawa: wawanakasax uñisirinakasan amparaparuw jalt'ani, sasa. Uka wawanakaruw jumanakan jisk'achat uraqir irpä, uka uraqin achunakapamp kusisit sarnaqapxañapataki.
[32] Jumanakan amayanakamasti, aka wasaran jaqunukutaw uñjasini,
[33] wawanakamasti pusi tunka maraw aka wasaran ovejanak awatis sarnaqapxani. Ukhamat jupanakax jumanakan jan iyawsatanakam phuqhapxani, jumanakan taqpachan aka wasaran jiwarapxañamkamaw suyt'apxani.
[34] Jumanakax pusi tunka uruw uraqinak uñakipasax sarnaqanipxtaxa; ukhamarakiw jichhax pusi tunka mara mutuyäwi phuqhapxäta, sapa uruta mä mara. Ukhamat jumanakax yatipxäta, kunjämäkitix nayar qallkatasiñax uka.
[35] Naya, Tatituw uk arsta, ukham lurä, aka ñanqhar jichuntat nayatak mayachasisin qallkatasir markaruxa. Aka wasaran tukusipxani; akan jiwarapxarakini —sasa.
[36] Moisesax uraq uñakipir khitkatayna uka chachanakax, kuttanisin uka uraqi jisk'achasaw jan walinak yatiyapxäna, ukat jaqinakax jan walinak Tatitutak arusipxäna; uka chachanakarusti Tatitux akatjamat jiwarayäna.
[38] Uraqi uñakipir khithat taqpachani chachanakatxa, Josué chachampi, Caleb chachampikiw jan jiwapkänti.
[39] Moisesax kuntix Tatitux israelitanakar siskatayna taqi ukanak yatiykän ukapachasti, taqpachaniw walpun llakt'asipxäna.
[40] Qhipärmanthisti willjtat sartasin, qullunak tuqiruw sarapxäna, alay qullu chiqar makhatasinsti, sapxänwa: —¡Niyaw akkhanktan! Tatitux churañatak arskistu uka chiqar sarapxañäni, jiwasax jucha luratanakas uñt'astanwa —sasa.
[41] Ukampis Moisesax jupanakar sänwa: —¿Kunatarak Tatitun arunakapar jan jaysapxtasti? ¡Uka amtäwix inaruw tukuni!
[42] Jan sarasipkakimti, Tatitux janiw jumanakampïkxiti, uñisirinakamax atipjapxätamwa.
[43] Jumanakax Tatitut saraqtapxtaxa, ukat jupax jumanakar apanukupxtam. Uka uraqirutix sarapxätaxa, amalecita jaqinakampi, cananeo jaqinakampiw jumanakamp nuwasir mistsunini, jumanakarusti jiwarayapxätamwa —sasa.
[44] Ukham siskatpachasa, israelitanakax qullu patar makhatañ munasipkakïnwa; ukampis arust'äwi arcampi, Moisesampix, janiw campamentot unxtapkänti.
[45] Ukapachaw uka chiqan jakir amalecita jaqinakampi, cananeo jaqinakampix mistunipxäna, israelitanakar Hormá sat chiqakam arktanisa, jupanakar q'al atipjañkama.