[1] Israelitanakax Sinaí wasarankasipkänwa, ukapachaw Tatitux Moisesar parläna, Diosampi Jikisiñ Carpana. Jupanakan Egipto markat mistunitapax, tunka kimsan phaxsïxänwa. Tatitusti Moisesar akham säna:
[2] “Israelitanakar taqpachanir jakthapipxam, ayllutkama, wila masitkama, taqi chachanakan sutip qillqantapxam, qawqhanïtaynas uk yatiñataki,
[3] pä tunka maranit amstaru, nuwasïwir sarirjamäpki ukanaka. Tamankiritjam qillqantapxäta, Aarón chachan yanapt'apampi,
[4] sapaqat ayllut ajllita wila masinakan jilïripan yanapt'apampi.
[5] Jumanakar yanapt'ir jilïrinakan sutinakapax akanakawa: “Rubén ayllutxa: Elisur sat Sedeúr chachan yuqapa.
[6] “Simeón ayllutxa: Salumiel sat Surisadai chachan yuqapa.
[7] “Judá ayllutxa: Nahasón sat Aminadab chachan yuqapa.
[8] “Isacar ayllutxa: Natanael sat Suar chachan yuqapa.
[9] “Zabulón ayllutxa: Eliab sat Helón chachan yuqapa.
[10] “Efraín ayllutxa, Elisamá sat Amihud chachan yuqapa. “Manasés ayllutxa, Gamaliel sat Pedasur chachan yuqapa.
[11] “Benjamín ayllutxa: Abidán sat Guidoní chachan yuqapa.
[12] “Dan ayllutxa: Ahiézer sat Amisadai chachan yuqapa.
[13] “Aser ayllutxa: Paguiel sat Ocrán chachan yuqapa.
[14] “Gad ayllutxa: Eliasaf sat Reuel chachan yuqapa.
[15] “Neftalí ayllutxa: Ahirá sat Enán chachan yuqapa.”
[16] Jupanakaw israelita marka taypita, ayllunakan jilïrinakapat ajllitäpxäna, sapaqat wila masi tamat sayt'añataki.
[17] Ukhamaw Moisesampi, Aaronampix uka jaqinakar jawsayapxäna, yanapt'iritak sutitkam ajllitäpkatayna jupanakaru,
[18] ukatsti payïr phaxsina mä uru saraqataruw taqpach markar tantachthapipxäna. Uka urunsti jaqix mayat mayat jakthapitäpxänwa, wila masitkama, tunu awkit saraqiritkama. Ukhamat taqpach chachanakan sutinakapax qillqantasïna pä tunka maranit amstaru,
[19] kunjämtix Tatitux Moisesar iwxkatayna ukhamarjamaw Sinaí wasaran jaqix jakthapisïna.
[20] Kunapachatix jaqinakax ayllutkama, tunu awkit saraqiritkama, wila masitkam jakthapitäxäna, sapa maynin sutinakapas qillqantatäxäna, pä tunka maranit amstaru chachanakas qillqantatäxarakïna ukapachax, taqpachani jakthapitasti akkhanïpxänwa: Rubén ayllunkirita, Israelan tayna yuqapa: pusi tunka suxtan waranqa phisqa patakan chachanakänwa, nuwasïwir sarañatak wakicht'atanakaxa.
[22] Simeón ayllunkiritxa: phisqa tunka llätunkan waranqa kimsa patakani.
[24] Gad ayllunkiritxa: pusi tunka phisqan waranqa suxta patak phisqa tunkani.
[26] Judá ayllunkiritxa: paqallq tunka pusin waranqa suxta patakani.
[28] Isacar ayllunkiritxa: phisqa tunka pusin waranqa pusi patakani.
[30] Zabulón ayllunkiritxa: phisqa tunka paqallqun waranqa pusi patakani.
[32] José chachan wawanakapa, Efraín ayllunkirita: pusi tunkan waranqa phisqa patakani. Manasés ayllunkiritxa: kimsa tunka payan waranqa pä patakani.
[36] Benjamín ayllunkiritxa: kimsa tunka phisqan waranqa pusi patakani.
[38] Dan ayllunkiritxa: suxta tunka payan waranqa paqallq patakani.
[40] Aser ayllunkiritxa: pusi tunka mayan waranqa phisqa patakani.
[42] Neftalí ayllunkiritsti, phisqa tunka kimsan waranqa pusi patakan chachanakaw jakt'atarakïna.
[44] Taqi ukanakaw Israelan wawanakapan ayllutkama, wila masitkam jakthapitäpxäna, uksti Moisesampi, Aaronampiw jakthapïna, israelitanakan ayllunakapata, wila masi tamanakapat sayt'iri uka tunka payan jilïrinakapamp yanapt'ayasisa.
[45] Israelitanakat khitinakatix pä tunka maranit amstar jakhutäkäna, ukhamarak, nuwasïwirus sarirjamäpxarakïna ukanakax,
[46] taqpachanix suxta patak kimsani waranqa phisqa pataka phisqa tunkan chachanakänwa.
[47] Leví chachat saraqirinakax janiw mayni ayllunkirinakjamax nayra awkinakapan ayllunakap taypin jakhutäpkänti,
[48] Tatituw Moisesar satayna:
[49] “Israelitanakar jakthapkäta ukkhaxa, janiw jupanak taypir Leví chachat saraqirinakarux jakhütati.
[50] Jupanakarux Tatitumpi Jikisiñ Carpan luqtapxañapatakiw uchäta, taqi kunanakatix uka qullan chiqawja manqhan utjki ukanak uñjapxañapataki. Jupanakaw arust'äwi qullan carpampi, uka manqhan utjir yänakamp apapxani, ukhamarakiw jupanakax qullan chiqawjar muyuntas utjnuqtapxani.
[51] Markax sarantkani ukapachasti, Leví ayllunkirinakaw arust'äwi qullan carpa apthapipxani; utjnuqtapkani ukkhasti, jupanakarakiw wasitat sayt'ayapxani. Khiti jaqitix jan Leví ayllunkirïkasin uka qullan chiqawjar jak'achasini ukaxa, jiwaniwa.
[52] Israelan maynïr ayllunakapasti, militaranakan saraparjamaw sapaqat maynis pachpa tamapana, wiphalap jak'an utjnuqtapxani.
[53] Leví ayllunkirinakasti Tatitun arust'äwi qullan carpar muyuntasaw utjnuqtapxani, uk uñjapxarakini, Tatitux israelitanakatak jan q'apisiñapataki.”
[54] Israelitanakasti kunjämtix Tatitux Moisesar siskatayna ukhamarjamaw lurapxäna.