[1] Mariampi, Aaronampix Moisés jilapat jan wal parlapxäna, jupan mä etiope warmimpi jaqichasitap layku.
[2] Ukhamarus sapxänwa: “Tatitux janiw Moisesampik parlkiti; jiwasampix parlarakiwa” sasa. Tatitusti uka parlatanakap ist'änwa.
[3] Chiqpachansa, Moisesax taqi akapachan wali llamp'u chuyman jaqïnwa.
[4] Ukat Tatitux Moisesampiru, Aaronampiru, Mariampirux säna: “Jumanak kimsanix Tatitump Jikisiñ Carpar sarapxam” sasa. Ukatsti kimsanpachaw ukar sarapxäna.
[5] Ukapachaw Tatitux qinay taypinjam saraqanïna, ukatsti Jikisiñ Carpa mantañawjaruw sayt'asïna; ukatsti Aaronampiru, Mariampiruw jawsäna, jupanakax uñstapkän ukkhasti,
[6] Tatitux jupanakaruw säna: “Ist'apxam kuntix sapkäm uka arunaka: Jumanak taypin mä profetax nayan arunakax yatiyir utjki ukapachax, nayaw jupampix unañchäwinak tuqi parlta, samkanak tuqi parlarakta;
[7] ukampis Moisés luqtirixampix janiw ukham lurkti. Jupax taqpach luqtirinakaxat sipan aski jaqipuniwa,
[8] jupampisti ajanuy ajanuw parlta, qhana arunakampiraki. Jupatix ajanuy ajanu uñjchitu ukasti, ¿kunatarak jumanakasti jupar k'umipxtasti?” sasa.
[9] Diosasti jupanakatak walpun q'apisïna, ukatsti sarxarakïnwa.
[10] Qinayax qullan utjäwit jithiqtawayxän ukapachasti, Mariax lepra usuniw uñstäna, janchipax khunjam janq'uw tuküna. Aaronax Mariar uñtañatakiw kutikipstäna, lepra usun jupar uñkatasinsti,
[11] Moisesarux sänwa: —Tata, janikiy jan amuyunjam jucha luratanakaxat mutuyapxistati.
[12] Marian janchipax q'ala tukjatawa, janïr yurkasa jiwir wawanakan janchipar uñtatawa. Diosar achikt'amaya jupar k'umarachañapataki —sasa.
[13] Moisesasti Tatituruw achikt'asïna, akham sasa: “Dios Tatay, Mariar k'umarachakimaya” sasa.
[14] Tatit Diosasti ukxarux sänwa: “Awkipatix ajanut thuskataspa ukkhax, paqallq uruw jupax p'inqachat uñjasispa. Ukhamasti juparux paqallq uru campamentot anqar jaqunukupxpan, uka qhipat kutt'asinkaniwa” sasa.
[15] Ukhamaw Mariax paqallq uru campamentot jaqunukut uñjasïna. Ukchañkamasti, markax janiw ukawjat sartkänti.
[16] Mariax jupanakamp chikäxän ukapachaw, Haserot chiqat sartawayapxäna, ukatsti Parán wasarar puriñkamax janiw sayt'apkänti.