[1] Manasés ayllun phisqa imill wawanakaw utjäna, sutinakapasti Mahlá, Noá, Hoglá, Milcá, Tirsá jupanakänwa. Jupanakasti Selofhad sat chachan imill wawanakapänwa, Héfer, Galaad, Maquir, Manasés, José uka chachanakat saraqirinakarakïnwa.
[2] Mä urusti, uka phisqa kullakanakax qullan utjäwi mantañaruw sarapxäna, Moisesampi, Eleazar sacerdotempi, markan jilïrinakapampi, taqpach israelitanakamp parlañataki. Ukat jupanakar sapxäna:
[3] —Nanakan awkixax wasaran jiwxi, jupasti janiw Tatitutak sayt'asir Coré chachan tamapankirïkänti. Jupax pachpa juchap laykuw jiwaski, janirakiw yuqall wawanak jaytawaykiti.
[4] Janiw askïkiti awkixan jan yuqall wawanïtap layku sutipan wila masi tamapat chhaqtañapaxa. Ukhamax awkixan jilanakap taypir mä uraq nanakar churapxita —sasa.
[5] Moisesasti uka warminakan mayitanakap Tatituruw yatiyäna,
[6] Tatitusti jupar sänwa:
[7] “Selofhad chachan phuchhanakapax walik arsusipki. Awkipan jilanakap taypin utjir uraq churam, awkipan tutip jupanak katuqpan.
[8] Israelitanakar sarakim: maynitix jan yuqall wawani jiwxani ukkhax, uka jaqin tutipax imill wawaparuw churatäxani;
[9] janitix kuna imill wawapas utjkani ukkhasti, jilanakaparuw tutip jaytawayxani;
[10] janitix jilanakapas utjkan ukkhax, awkipan jilanakaparuw tutip jaytxani.
[11] Awkipantix jan kuna jilapas utjkan ukkhasti, jak'a wila masiparuw tutip jaytxani. Aka kamachisti taqpach israelitanakatakiwa, kunjämtix nayax jumar sisksma ukhamarjama.”
[12] Tatitux Moisesar sänwa: —Abarim qullur makhatam, israelitanakar nayax churkta uka uraqi ukawjatpach uñatatam.
[13] Uka uraq uñatatasinsti, jiwxätawa, ukatsti nayra awkinakamampiw tantachasxäta, Aarón jilamjama,
[14] jumanak paninix Sin sat wasaran nayar jan jaysapkistati, markax nayatak sartkän ukapacha, janirakiw jumanakax uma mayipkän ukkhax jupanak nayraqatan jach'añchapkistati, —sasa. (Akasti Cadés chiqankir Meribá uma jalsut parli, Sin wasarana).
[15] Moisesasti Tatitur sänwa:
[16] —Tatitu Diosay, jumaw taqi jaqinakarus jakañ churtaxa, markaman nayraqatap sarañapatak mä jilïr utt'ayam, jupasti taqi chiqanjam irparakpan, jupanakan jan awatirin tamar uñtat jan sarnaqasipkañapataki —sasa.
[18] Tatitusti Moisesarux sarakïnwa: —Josué sat Nun chachan yuqapar irpanim, jupax suma chuyman jaqiwa. Jupar amparamamp luqxatam,
[19] ukat Eleazar sacerdoten nayraqatapar irpam, taqpach markan nayraqataparu, ukatsti taqi jupanak nayraqatan lurañap katuyäta;
[20] jumasti jilïr kankañamat jupar churäta, taqpach Israel markan jupar jaysañapataki.
[21] Josué chachax Eleazar sacerdoten nayraqataparuw uñstañapa, Eleazarasti Urim tuqiw sutipxar nayar jiskt'itani. Josué chachaw israelitanakar apnaqani taqi kuna lurañanakapansa —sasa.
[22] Moisesasti Tatitun arsutaparjamaw luräna. Josué chachar irptawayasinxa, Eleazar sacerdoten nayraqataparuw irpkatäna, taqpach marka nayraqatampiru.
[23] Ukatsti, Tatitun arsutaparjamaw amparapamp p'iqipxar luqxatasin lurañap churxäna.