[1] Ememere etoréka, damu hate tafe ahasu gahakumu kibikubumoho etoréni Ala Éné busu mene éné afite abuwomohoni baha. Damu nu Éné pou mumangge daréké égéki hamemere katugo daréni Éné pou ba-trompet ugu gahakumu hanggerakéri u yoho, "Nokumu namusu! Gu embahae ukukuwoho fe awe esumu éyonané mahana égéki Nu gu bake yobuwoméri yahae," emiyoho.
[2] Damu Ala Éné Ubana Hayo bagumu nuki ahukuni baha, damu nu mése Ala Éné busu mene ékému osuri éré gahakumu éré. Nu etoréni Ahuhabang Éné abuge-kursi de égé, damu Ahuhabang kamisige habigiyoméri Ahuhabang Éné abuge-kursi ékému baha.
[3] Damu nu etoréni Ahuhabang Éné kibi égéki iyobégé éné ka siyahakigi kanggo damu hijau kotoféri sesebuméri wanesuméri égé damu iyobégé éné ka siyahakigi kanggo wanesuméri égé ememere wanesuméri égé. Damu wisiyei Ahuhabang Éné abuge-kursi ékému awiwiméri iyobégé éné ka siyahakigi hijau damu biru kotoféri sesebuméri wanesuméri égé gahakumu sahataméri waneri égé.
[4] Damu Ahuhabang Éné abuge-kursi de baha ékému ahuhabang amiféri bahana yohona abuge-kursi 24 de égena. Abuge-kursi 24 égena ége Ahuhabang Éné abuge-kursi égéki awiwiméri de égena. Damu abuge-kursi 24 égena ékému ahu yeyoho 24 yoho bahana. Yeyoho yoho ifita hayo kunggunaka, damu yoho hate ahuhabang éné habanghauwo iyobégé-emas féri emoho égéki kungguna. Iyobégé-emas éné ka esumu siyahakigi.
[5] Ahuhabang Éné abuge-kursi ékému bang wimo-wimoméri hou hanggerakéri u yori bubukuméri égé. Damu Ahuhabang Éné abuge-kursi sama kumu siya birikuma-berahafi-ukuma (7) gofungguna hakiboroho yaki. Siya birikuma-berahafi-ukuma (7) égéki Ala Éné Ubana Hayo esumu habigiyomoho Égéki kubumoho.
[6] Damu Ahuhabang Éné abuge-kursi sama ékému kukuwoho-bégé-asiyona égéki kiyohouyaha ohousi esemu awokéri égé gahakumu égé. Ahuhabang Éné abuge-kursi sama, mo, afi, damu imaafi takenamu kukuwoho-sifing-féri-bahana sanggere égena. Kukuwoho isige-isige sifing féri bahana yohona aduwosoho sama kumu damu yohona aduwosoho mo kumu kiyo aburohomu bahana.
[7] Kukuwoho-sifing-féri-baha moguri égé égéki wi-singa gahakumu baha. Kukuwoho-sifing-féri-baha ukumamu égé égéki wi-sapi amuke besing gahakumu baha. Kukuwoho-sifing-féri-baha fe éné ketobégé ahu éné ketobégé gahakumu baha, damu fe sanggere égéki é surahayo tefiyo ahahangferi bung hoho gahakumu baha.
[8] Kukuwoho-sifing-féri-bahana sanggere yoho yohona tefiyo hamu birikuma-berahafi-woro (6) égena, damu yohona aduwosoho emu-hori-daha kiyo aburohomu égena, damu yohona tefiyo womu kumu hate kiyo bahana, damu asu-sawa yoho fani mungguna de Ala Énaukuni bamahana. Yoho emiyohona, "Nuguna Ahuhabang Ala, Gusé fani dosa yaha de esumu manggohomu baha, esumu manggohomu baha, esumu manggohomu baha! Gusé esumu habigiyoméri baha, damu Gu de mumangge baki damu katugo de baha damu awe defené moho," ememere yohona.
[9] Kukuwoho-sifing-féri-bahana sanggere yoho Ahuhabang kiri Éné abuge-kursi kumu baha damu bohoné embahae posu-posukiné moho Égé bake Ala esumu asuféri baha ememere yohona, damu Égé bake degi kuroho ememere yori Énaukuni Éné kubu iri bahana. Ememere kukuwoho-sifing-féri-bahana sanggere yoho kubu iri Ala Énaukungguna égéki,
[10] yeyoho 24 bahana yoho bukumu tini uhung hori Ala Ahuhabang Éné abuge-kursi baha damu bohoné embahae posu-posukiné moho Égé bake sembayang yeri Énaukungguna. Damu ahu yeyoho yoho Ala Égé asuféri baha ememere kubumenan niye ahuhabang kiri habanghauwo kuni bahana égéki aroméri Ahuhabang Éné abuge-kursi éné sama kumu hamu kufiyahana. Yohona habanghauwo égéki yoho ahuhabang iyobégé-emas éné ka siyahakigi égé féri emoho kéré. Damu yoho kubu iri emiyohona,
[11] "Yahae, Nugunabo Ala Gusé kukuwoho emu-hori-daha nogoki emaki. Damu de kamu Gané sifingmu fimiri kukuwoho emu-hori-daha égéki emaki, damu yoku damu égena. Emohoni, nugu Gu bake Ganaukuni kubu geiriya, damu Gusé asuféri baha ememere yoriya damu Gusé habigiyoméri emesumoho ememere yoriya. Damu Gané na habigiyo égéni, nugu ememere yori Ganaukumériya égéki haiyangne."