[1] Ememere etoréka, nu ahasu gahakumu etoré égéki, Yohanes nusé daréni Ala Éné Afahang ékému u hanggerakéri malaikat birikumu-berahafi-ukuma (7) yohona biyahae yeri égena yoho bake u hanggeramu emiyoho, "Gugu hori damu biyahae birikumu-berahafi-ukuma (7) ero-anggur noho bong baha égéki yeri ogori soho ékému akusunané. Ero-anggur noho nogoki Ala ahu Éné u fani dagena de yoho bake hakereméri poréyahamu emoné moho égéki kubumoho," emiyoho.
[2] Ememere dari malaikat fe moguri égé égé hori damu biyahae égéki soho ékému akusumoho. Akusumohoni, ung esumu wiyahakéri musuri ahu emu-hori-daha mése ohoru base mo maraha éné bang fiyoho égéki umpohomahana damu ala gahakumu ohoru base éné kusi bake sembayang yeri énaukungguna yohoki afuyahani, yohona haha esumu hahaimoho.
[3] Damu malaikat ukumamu égé égé hori biyahae yeri égé égéki ogori kiyohouyaha ékému akusumoho. Emohoni, kiyohouyaha ahu kunggu éné gong esemu si kiri égé gahakumu gong kiri égé. Emohoni, ohoru ohona emu-hori-daha sifing féri kiyohouyaha kumu bahana égéki honubakigina.
[4] Damu malaikat ukumasiyomu égé égé hori damu biyahae ero-anggur noho bong baha égéki uré damu ohogunto emu-hori-daha ékému akusumoho. Emohoni, uré damu ohogunto emu-hori-daha égéki gong kigi.
[5] Damu nu daréni malaikat fe oho afuyeri égé égé u hanggeramu yori ememere yoho: "Nugunabo Ala, Gusé mahasuyahaki de baki, embahae katugo damu baha. Damu Gusé fani dosa yaha de esemu manggohomu baha. Damu Gu Gané sifing haiyangmu fimoho égé féri ahu yohona u efefeméri yori inggemoho.
[6] Ahu Gané u fani dagena de yoho ahu Yesus Énini fimiri bahana yohoki damu ahu-nabi yohoki uri kufiyahana. Emohoni, kageto Ala Gusé hakereméri ahu énéyuhuwoho yoho bake gong kurohoni, migina. Damu yoho ememere poréyahamu égena égéki haiyangne."
[7] Damu nu daréni abuge-aguto duri Ala bake kurosumahanato ékému u esemu hanggeramu emiyoho, "Yahae, Nabo Ala Gusé esemu habigiyoméri baha. Gusé mése Gané sifing haiyangmu fimiri ahu yohona u efefeméri yori inggemoho égéki haiyangne," emiyoho.
[8] Damu malaikat sanggeremu égé égé biyahae égéki yeri sawa ékému akusumoho. Ala Égé sawa bake Éné habigiyo kurohoni, sawa égé indo kusumohoni miri ahu soho nokumu bahana yohoki doremoné.
[9] Damu ahu indo dohona égéki peso esemu fikokéri apafuméri haha hahaimoho. Damu ememere bahana égéki ukuni nafamahanani yohona ha kungguna nogoki uku Ala Éné habigiyo féri emohoni, yoho Alaki inanggena. Emohote, yoho fani dosa kemahana égéki ukuni modinan deyoho, damu yoho fani Ala Énaukungguna deyoho.
[10] Damu malaikat birikumamu égé égé biyahae ero-anggur noho bong baha égéki yeri ohoru base moguri maraha éné ahuhabang abuge-kursi ékému akusumu ugu. Emohoni, égé soho emu-hori-daha ahuhabang kiri hafuféri égé ékému esemu asukigi. Emoho nemohoni, ohoru base égé damu énahu yoho esemu kugutoméri bahanani, yohona fage asigibahamahana.
[11] Damu hate yoho ung damu peso indo dohona égéki esemu hahaimohoni, yoho tafe Ala Éné busu mene ékému Énahu yoho hafuféri baha Égéki inaféyahana. Emohote, yoho fani yohona dosa kemahana égéki ukuni modinanéka, fani Ala bake deri Éné u dari bahana deyoho.
[12] Damu malaikat birikuma-berahafi-kamisigemu (6) égé égésé biyahae égéki uré Efrat fikoyaha ékému akusumoho. Emohoni, uré oho égé esumu sokigi, nemohoni ahuhabang-raja sawa musuguto ékému bahana yoho yohona tentara yeri deri uré ékému tinggeméri adunané.
[13] Damu nu tafe etoréni bana keiyong ukumasiyo yoho bangge gahakumu bahana. Damu kamisige égé usi-naga éné hato ékému musugu, damu fe ohoru base moguri maraha éné hato kumu musugu, damu bana keiyong fe hate ohoru base mo maraha éné hato kumu musugu. Ohoru base mo maraha égé "nu ahu-nabi kéré" ememere yahamu yori ahu yoho degemu hafuféri égé égé séré.
[14] Bana keiyong ememere musuguna yoho hohoi yohona bana kéré. Damu yoho habigiyo féri ukukuwoho-mujizat emesumahana. Damu yoho ahuhabang-raja soho hamu bahana yoho bake hori yokungguna, nemohoni ahuhabang-raja yoho hohoi yohonahu kiri bohonané. Emohoni, sawa akimamaga égéki ahuhabang-raja énéyuhuwoho yohona tentara yeri dukuméri Ala Énahu yoho kumu kotoféri kutumu taki arufonané. Sawa akimamaga égéki Ala esumu habigiyoméri baha Égésé Éné kufe yoho bake hakereméri poréyahamu emoné moho éné sawa kéré.
[15] Ememere eméri bana ukumasiyo keiyongkigina yoho ahuhabang-raja damu yohona tentara kotoféri hafuféri busu Harmagedon ememere iri yohona ékému dukumahana. Harmagedon nogoki Ibrani u we. Damu nu daréni Nabo Yesus emiyoho, "Maha femu nara: Nu ahu kei kemesumoho nesi égé hakureyaha daha hamemere awe fake marefe. Emohoni, ahu mekenohosé asu-sawa éné ifita kumoné moho égéki fengféyori bohongkumaki, emohoni ahu égé fani monuwekéri bohon deyoho, damu ahu yoho etohona égéki égé fani hosumon deyoho. Ahu ememere bahana yohona modu hanikinané," emiyoho.
[17] Damu malaikat birikuma-berahafi-ukumamu (7) égé égé biyahae égéki akusuméri pemoho siyaha kumu osuri soho nokumu migi. Damu Ala Éné Afahang womu kumu Ahuhabang Éné abuge-kursi ékému u hanggeramu yori emiyoho, "Age mése feyahafumoho!"
[18] Damu ememere bang wimo-wimoméri hou éné pou esemu hanggeramu bukuméri damu yei deri soho kirimu aiyomoho. Anggo posuyaha ahu soho nokumu bahana égéki fani ememere soho kirimu aiyomusumoho deyoho.
[19] Emohoni, busu fikoyaha esemu keiyongkéri égé, uku Babel busu fikoyaha égéki uwahahaméri ememere gogo ukumasiyomu égena. Damu Ala hate ahu dukuméri gogoyahakéri bahana yohona busu fikoyaha uwahahaméri abutakungguna. Ahu Ala fani nafamahana de yoho busuyaha ékému beri esumu keiyongmu bahana égéki Alasé fimiri hamemere emoho. Emohoni, Ala ahu énéyuhuwoho bake ero-anggur noho yahang keiyong kotoféri damu yohoki tinibiyakuni kurohoni migina. Ero-anggur noho yahang keiyong kotoféri égé nogoki Ala esumu hakereméri ahu énéyuhuwoho bake poréyahamu emoho égéki kubumoho.
[20] Damu yei deri soho esemu kirimu aiyomohoni, soho dubuge emu-hori-daha égéki anibokigi. Damu soho haibe siyaha emu-hori-daha égé hahanere miri damu fiyahangkigi.
[21] Damu a iyobégé-es fikoyaha hou siyaha hosumu pesanggeri miri ahu inggifiyoho. A iyobégé-es isige éné bodukigi égéki 40 kilo moho. A iyobégé-es pesanggeri miri esemu abutakunggu, emohoni ahu yoho Alaki inanggena.